Nkalata Itanshi ku Bena Kolinda
16 Pa mambo a bupe bwa kukwasha bazhijikwa,+ mwakonsha kulondela mikambizho yo napaine ku bipwilo bya mu Ngalatiya. 2 Pa juba jitanshi mu mulungu yense, anweba bonse pa muntu pa muntu mwafwainwa kutulapo bya bupe bimo monka mwayila bintu byo muji nabyo, pa kuba’mba mukabulenga kukonkanya bya bupe byo nkafika. 3 Bino byo nkafika koko nkemutumina banabalume bo mwaswishishe mu makalata enu+ kutwala bya bupe byenu ku Yelusalema. 4 Nangwa byonkabyo, umvwe kyamfwainwa amiwa kuyako, nkayila nabo pamo.
5 Bino nkeya ko muji inge nafuma ku Makedonya, mambo nkapita ku Makedonya;+ 6 kampe nkekala nenu ne mu bañondo bamashika, pa kuba’mba mukanshinjikinyeko ko nkayanga. 7 Mambo pa kino kimye kechi nkeba kwimumonatu pa kupita ne, mambo mbena kukeba kwikalako nenu kimye kimo+ umvwe Yehoba* waswa. 8 Bino nsakukikala mu Efisesa+ kufikatu ne kimye kya Kijiilo kya Pentekosita, 9 mambo banshinkwila kibelo kikatampe kya mwingilo,+ bino kuji balwanyi bavula.
10 Umvwe Timoti+ akafike koko, mukamone’mba mwaikala nanji bulongo kuba’mba akekale kwa kubula moyo, mambo aye ubena kwingila mwingilo wa Yehoba*+ byonka byo mbena kwingila. 11 Onkao mambo, kafwako muntu nangwa umo wafwainwa kumulengulula ne. Mukamutume mu mutende, kuba’mba akeye konji, mambo mbena kumupembelela pamo na balongo.
12 Pa mambo a kwa Apolosa+ mulongo wetu, namukambizhe namba akeye kwi anweba pamo na balongo. Bino aye mwine kechi ye wakeba kuba’mba eye lonka luno ne, pakuba ukeya umvwe waikala na kimye.
13 Labainga,+ kosai mu lwitabilo,+ ikalai byafwainwa banabalume,*+ kabiji kosai.+ 14 Bintu byonse byo muba mwibyubenga na butemwe.+
15 Balongo bami, mbena kwimukambizha namba: Mwayuka’mba ba mu nzubo ya kwa Setefanusa bo batanshi* mu Akaya kabiji bateleko bingi muchima ku kwingijila bazhijikwa. 16 Ne anweba nekenenainga bantu ba uno mutundu ne bonse baswa kwingila kabiji babena kwingila na ngovu.+ 17 Kabiji nasekela pa kumona Setefanusa+ ne Fotunatusa ne Akayikusa, mambo abo bapingakena pe anweba mambo mufwako. 18 Mambo abo bangikizha muchima wami ne wenu pamo. Onkao mambo, nemekainga bantu ba uno mutundu.
19 Bipwilo byonse bya mu Asha bimwimuna. Akwila ne Pilisika bemwimuna ne kipwilo kipwijila mu nzubo yabo+ kimwimuna mwi Nkambo na muchima yense. 20 Balongo bonse bemwimuna. Iimunai mu lwenu na kwifyompa kwazhila.
21 Amiwa Paulo yami nanemba luno lwimu na kuboko kwami.
22 Umvwe muntu kechi watemwa Nkambo ne, afingwe. Anweba Nkambo yetu, iyai! 23 Lusa lukatampe lwa Nkambo Yesu lwikale pe anweba. 24 Butemwe bwami bwikale ne anweba bonse mwi Kilishitu Yesu.