Yelemiya
41 Mu ñondo wa butanu na bubiji, Ishimela+ mwana wa kwa Netaniya, Netaniya mwana wa kwa Elishama, wa mu kikota* kya ku bufumu kabiji umo wa bakulumpe ba mfumu, waishile kwi Gedaliya mwana wa kwa Ahikama ku Mizipa+ na banabalume bakwabo jikumi. Byo bajiilenga pamo kajo mu Mizipa, 2 Ishimela mwana wa kwa Netaniya ne banabalume jikumi bo ajinga nabo, baimene ne kutapa Gedaliya mwana wa kwa Ahikama, Ahikama mwana wa kwa Shafwana na mpoko. Onkao mambo, waipayile yewa ye batongwele ku mfumu wa Babilona kulama kyalo. 3 Ishimela waipayile ne Bayudea bonse bajinga ne Gedaliya mu Mizipa, kabiji waipayile ne bashilikale ba bena Kalodeya bajingamo.
4 Pa juba ja bubiji Gedaliya saka bamwipaya kala ne bantu bonse saka bakyangye kuyuka, 5 banabalume 80 baishile kufuma ku Shekema,+ ku Shilo+ ne ku Samaliya.+ Baishile saka batenda myevu yabo, batabawile bivwalo byabo ne kwichibaula abo bene,+ kabiji basendele milambo ya kajo ne binunka bulongo+ kuleta ku nzubo ya Yehoba. 6 Ishimela mwana wa kwa Netaniya wafumine ku Mizipa kuya na kwibatundaila, wayilenga saka ajila. Byo ebataaine, wibambijile’mba: “Twayai kwi Gedaliya mwana wa kwa Ahikama.” 7 Pano bino, byo batwelele mu muzhi, Ishimela mwana wa kwa Netaniya ne bantu banji baipayile bano banabalume ne kwibataya mu mushima.*
8 Nangwa byonkabyo, pajinga banabalume jikumi baambijile Ishimela amba: “Kange mwitwipaye ne, mambo twafya wichi, mbaale, manyi ne buki bwavula mungye.” Onkao mambo, aye kechi waipayile bano banabalume ne balongo babo ne. 9 Ishimela watayile mibiji yonse ya bantu bo aipayile mu mushima* mukatampe wapoyile Mfumu Asa na mambo a kuchina Baasha Mfumu wa Isalela.+ Mu uno mushima* Ishimela mwana wa kwa Netaniya mo mo ayuzhizhe mibiji ya bantu bonse bo aipayile.
10 Ishimela wakwachile bantu bonse bajinga mu Mizipa+ kuvwangako ne baana ba bakazhi ba mfumu ne bantu bonse bashajile mu Mizipa, bonka mukulumpe wa bakasopa aye Nebuzaladana bo ashijile Gedaliya+ mwana wa kwa Ahikama kuba’mba ebalamenga. Ishimela mwana wa kwa Netaniya wibasendele ne kuya nabo ku bena Amonyi.+
11 Yohanana+ mwana wa kwa Kalea ne bakulumpe ba bashilikale bonse bo ajinga nabo byo baumvwine bintu byonse byatama byaubile Ishimela mwana wa kwa Netaniya, 12 basendele banabalume bonse ne kuya na kulwa ne Ishimela mwana wa kwa Netaniya, kabiji bamutaaine ku mema avula* mu Gibeona.
13 Bantu bonse bajinga ne Ishimela byo bamwene Yohanana mwana wa kwa Kalea ne bakulumpe ba bashilikale bonse bo ajinga nabo, batemenwe bingi. 14 Ponkapo bantu bonse Ishimela bo asendele kwikala bazha kufuma mu Mizipa+ baalulukile ne kubwela ne Yohanana mwana wa kwa Kalea. 15 Pano bino, Ishimela mwana wa kwa Netaniya ne bantu banji batanu na basatu bamunyemene Yohanana ne kuya ku bena Amonyi.
16 Yohanana mwana wa kwa Kalea ne bakulumpe ba bashilikale bo ajinga nabo basendele bantu bonse bo bafumishe ku Mizipa, bo bapokolwele kufuma kwi Ishimela mwana wa kwa Netaniya, pa kikye kimye saka aipaya kala Gedaliya+ mwana wa kwa Ahikama. Babwezhezhe banabalume, bashilikale, banabakazhi, baana ne babinemanga kufuma ku Gibeona. 17 Onkao mambo, abo bayile ne kukekala mu mpunzha mwafikilanga bakañenda mu Kimuhamu kwipi na Betelema,+ kuba’mba baye ku Ijipita+ 18 na mambo a kuchina bena Kalodeya. Bebachiinenga mambo Ishimela mwana wa kwa Netaniya waipayile Gedaliya mwana wa kwa Ahikama ye batongwele kwi mfumu wa Babilona kulama kyalo.+