Yelemiya

25 Mu mwaka wa buna wa bukalama bwa kwa Yehoyakimu+ mwana wa kwa Yosiya, mfumu wa Yuda, byambo byaishile kwi Yelemiya pa mambo a bantu bonse ba mu Yuda. Uno wajinga mwaka mutanshi wa bukalama bwa kwa Nebukaneza Mfumu wa Babilona. 2 Yelemiya ngauzhi waambile pa bantu bonse ba mu Yuda ne bonse bekala mu Yelusalema amba:

3 “Kufuma mu mwaka wa bu 13 wa bukalama bwa kwa Yosiya+ mwana wa kwa Amonyi, mfumu wa bena Yuda kufika ne lelo jino, ino myaka yonse 23, Yehoba wambuujilenga byambo byanji, ne amiwa kimye kyonse* nemubuujilengabyo, pano bino, anweba mwakainenga kwibyumvwa.+ 4 Kabiji kimye kyonse Yehoba wimutumijilenga* bakalume banji bonse bangauzhi, nangwa byonkabyo, anweba kechi mwakebelenga kuteleka nangwa kumvwa ne.+ 5 Abo bemwambijilenga’mba, ‘Twimusashijila anweba bonse pa muntu pa muntu namba, fumai ku mashinda enu atama ne kuleka byubilo byenu byatama;+ umvwe mwauba bino, mukatwajijila kwikala kimye kyabaya mu kyalo kyo emupele Yehoba kala kene, anweba ne bashakulu benu. 6 Kange mongolokele ku balesa bangi, kwibengijila, kwibafukamina ne kunzhingijisha na kwilengela bankishi ne; mambo umvwe mwauba bino, nkemuletela bya malwa.’

7 “Yehoba waamba’mba, ‘Pakuba anweba kechi mwañumvwijile ne, mwanzhingijishe na kwilengela bankishi ne kwiletelela bya malwa anwe bene.’+

8 “Onkao mambo, Yehoba wa mabumba waamba’mba, ‘“Byo mwabujile kukookela byambo byami, 9 Yehoba waamba’mba, “Amiwa mbena kwita bisemi byonse bya ku kabeta ka ku buyeke,+ kalume wami+ Nebukaneza Mfumu wa Babilona kwiya na kulukuka kino kyalo,+ bantu bekalamo ne bisaka bya bantu byonse bikizhokoloka.+ Nkebyonauna ne kwibyalula kwikala bintu bikakankamika bantu ne kwita milozhi pa kwibimona, kabiji bikonaika myaka ne myaka. 10 Amiwa nkalengela jiwi ja kusekela ne ja kusangalala,+ jiwi ja musongoshi ne ja musongwa+ ne kuvuma kwa mpelo kubula kumvwanyika mwi abo kabiji kyeya kya lampi kikazhima. 11 Kino kyalo kyonse kikonaikatu pelu ne kulengela bantu kukankamana, kabiji bino bisaka bya bantu bikengijilanga mfumu wa Babilona myaka 70.”’+

12 Yehoba waamba’mba, “‘Bino myaka 70 byo ikapwa,+ nkatotolwesha* mfumu wa Babilona ne bisaka bya bantu na mambo a bubi bwabo,+ kabiji nkonauna kyalo kya bena Kalodeya ne kwikilengela kushalatu masala myaka ne myaka.+ 13 Amiwa nkafikizha byambo byami byonse byo naambile kuba kino kyalo ne bintu byonse byanembwa mu uno buku Yelemiya byo aawile pa bisaka byonse bya bantu. 14 Mambo bisaka byavula bya bantu ne bamfumu bakatampe+ bakalula bantu bami ke bazha,+ ne amiwa nkakambula bisaka bya bantu monka mwayila byubilo byabo ne mingilo yabo.’”+

15 Mambo Yehoba Lesa wa Isalela wañambijile’mba: “Tambula kano katomeno ka binyu ka bukaji kaji mu kuboko kwami kabiji wikapane ku bisaka bya bantu byo nakutumineko kuba’mba bitome. 16 Abo bakekatoma ne kubalangila pa kwenda kabiji bakobanga bintu nobe bakonye na mambo a mpoko yo nkebatumina.”+

17 Ponkapo natambwile katomeno kajinga mu kuboko kwa Yehoba ne kwikapana ku bisaka byonse bya bantu Yehoba byo antumineko kuba’mba bitome:+ 18 kutendekelapo Yelusalema ne mizhi ya Yuda,+ bamfumu bayo ne babinemanga bayo, ne kwiyonauna, kwiyalula kwikala kintu kilengela bantu kukankamana, ne kwita milozhi pa kwiimona ne kwiilengela kwikala kintu kyo bafinga+ byonkatu byo kiji lelo jino; 19 apa bino pakalondele Felo mfumu wa Ijipita ne bakalume banji, babinemanga banji ne bantu banji bonse,+ 20 ne bantu babujile bena Isalela, bamfumu bonse ba mu kyalo kya Uze; bamfumu bonse ba mu kyalo kya bena Filishitiya,+ Ashekelona,+ Gaza, Ekelona ne bonse bashajile mu Ashadoda; 21 Edomu,+ Moabu+ ne bena Amonyi;+ 22 bamfumu bonse ba mu Tila, bamfumu bonse ba mu Shidona+ ne bamfumu bonse bekala pa jikuji ja pa kalunga ka mema; 23 Dedanyi,+ Tema, Buzi ne boba bonse batenda nsuki munshi ya mitwe;+ 24 bamfumu bonse ba bena Alabya+ ne bamfumu bonse ba bantu bonse babujile bena Isalela bekala mu kiselebwa; 25 bamfumu bonse ba mu Zimuli, bamfumu bonse ba mu Elama+ ne bamfumu bonse ba mu Meda;+ 26 ne bamfumu bonse ba ku kabeta ka ku buyeke bekala kwipi ne bekala kwalepa bonse umo umo, ne bufumu bukwabo bonse bwa pano pa ntanda; kabiji mfumu wa Sheshaka*+ ye ukapelako kutoma kano katomeno bonse saka batoma kala.

27 “Kabiji wafwainwa kwibabuula’mba, ‘Yehoba wa mabumba, Lesa wa Isalela waamba’mba: “Tomai, mupendwe ne kulasa pa kuba’mba mupone ne kukankalwa kubuukapo+ na mambo a mpoko yo mbena kwimutumina.”’ 28 Kabiji umvwe bakakane kutambula ne kutoma katomeno kaji mu kuboko kobe, ukebambile’mba, ‘Yehoba wa mabumba waamba’mba: “Mwafwainwa kwikatoma! 29 Mambo umvwe amiwa patanshi naleta bya malwa pa muzhi utelwa na jizhina jami,+ pano nga anweba nakonsha kubula byepi kwimukambula?”’+

Yehoba wa mabumba waamba’mba, “‘Amiwa kechi nkabula kwimukambula ne, mambo mbena kuleta mpoko pa bantu bonse bekala pano pa ntanda.’

Aye ukabuluma bingi mu mpunzha yanji mo ekala nobe bokwe.

Aye mwine ukachibila mambo bantu* bonse.+

Kabiji ukalengela bantu babi kufwa ku mpoko.’

32 Yehoba wa mabumba waamba’mba,

33 “‘Kabiji pa joja juba, Yehoba ukepaya bantu monse mwaya ntanda. Kechi bakebajila nangwa kwibakonkanya pamo nangwa kwibazhiika ne. Bakekala nobe mbolezha pa mushiji.’

34 Anweba bakafunga, wowakanai ne kujila!