Yona

1 Yehoba waambijile Yona*+ mwana wa kwa Amitai amba: 2 “Imana, uye ku Ninevwa+ muzhi mukatampe, ne kwibasapwila byambo bya luzhachisho, mambo bubi bwabo bwafika kwi amiwa.”

3 Bino Yona wamunyemene Yehoba ne kuya ku Tashishi; wayile ku Yopa ne kutaana bwato bwayilenga ku Tashishi. Kabiji walipijile mali ne kukanjilamo amba aye nabo ku Tashishi, amba amunyeme Yehoba.

4 Kepo Yehoba aletele luvula mukatampe pa kalunga ka mema, kabiji kwajinga kinkunkwila kya malwa pa kalunga ka mema kya kuba bwato bwajingatu pepi konaika. 5 Bavuwa bwato baumvwine bingi moyo kya kuba bonse batendekele kwita au lesa wanji au lesa wanji kuba’mba ebakwashe. Kabiji batendekele kutaya bipe byajinga mu bwato pa kalunga ka mema, pa kuba’mba bupeleko.+ Bino Yona wajinga mu bwato, mo alaajile mu tulo twine. 6 Mukulumpe wa bwato wafikile ko ajinga ne kumwambila’mba: “Mambo ka o walaajila? Buuka, wite lesa wobe! Apo kampe Lesa wa kine usakwitubila lusa, kabiji kechi tusakufwa ne.”+

7 Kepo besambilenga mulwabo amba: “Twayai tute bubale+ pa kuba’mba tuyuke walengela kino kya malwa.” Byonkabyo, batele bubale, ne bubale bwaponejile pe Yona.+ 8 Abo bamwambijile’mba: “Twapopwela, tubuule, ñanyi walengela bino bya malwa kwiya pe atweba? Obewa wingila ñanyi mwingilo, kabiji wafuma pi? Ufuma ku ñanyi kyalo, kabiji wi mutundu ka?”

9 Aye wakumbwile’mba: “Amiwa ne Muhebelu, kabiji ngakamwa* Yehoba Lesa wa mwiulu, yenka walengele kalunga ka mema ne mushiji.”

10 Ponkapo bantu baumvwine bingi moyo, kabiji bamwipwizhe’mba: “Ñanyi kintu kyo wauba?” (Bano bantu bayukile’mba wanyemenenga Yehoba, mambo wibabuujile.) 11 Onkao mambo, bamwipwizhe’mba: “Twafwainwa kukuba byepi pa kuba’mba kalunga ka mema kazhindame?” Mambo luvula pa kalunga ka mema wayilengatu na kukilamo. 12 Aye wakumbwile’mba: “Nshikulai muntaye pa kalunga ka mema, ne kalunga kasakuzhindamapo; mambo nayuka’mba ke na mambo a amiwa uno luvula mukatampe o aishila pe anweba.” 13 Nangwa byonkabyo, bano bantu baesekele na ngovu kuvuwa bwato amba bebulete ku kitulu, bino bakankelwe, mambo luvula wakijilemo bingi pa kalunga ka mema ne kwibakatazha.

14 Kepo babijikile kwi Yehoba ne kwamba’mba: “Anweba Yehoba, twapopwela kange mwitonaune na mambo a uno muntu* ne! Kange mwitushinkamike mashi abula mambo ne, mambo mwauba kyonka kimutokela ku muchima, anweba Yehoba.” 15 Ponkapo bashikwile Yona ne kumutaya mu kalunga ka mema; ne kalunga ka mema kazhindamine. 16 Kepo bantu baikele na moyo mukatampe wa kwakamwa Yehoba,+ kabiji batapishe kitapisho kwi Yehoba ne kuchipa luchipo.

17 Yehoba watumine jisabi jikatampe jamiine Yona, kabiji Yona waikele munda mwa jisabi moba asatu, mute ne bufuku.+