Yelemiya
49 Yehoba waamba pa bena Amonyi+ amba:
“Nanchi Isalela ufwabo baana nyi?
Nanchi ufwaye nswanyi nyi?
Pano mambo ka Malakama+ o atambwila kyalo kya bena Gadi?+
Kabiji mambo ka bantu banji o babena kwikela mu mizhi ya Isalela?”
2 “Onkao mambo, Yehoba waamba’mba, ‘Umvwai! Moba abena kwiya,
O nkalengela mbila ya nkondo* ya kulukuka muzhi wa Laba+ wa bena Amonyi+ kumvwanyika.
Muzhi wa Laba ukashalatu kituntaulo,
Ne mizhi yanji icheche yamuzhokoloka bakeisoka.’
Yehoba waamba’mba, ‘Isalela ukangata kyalo boba bamwangachile.’+
3 ‘Obewa Heshibonyi, jila mabingo, mambo muzhi wa Ai bamonauna!
Anweba mizhi icheche ya kwa Laba, jilai.
Vwalai bisapi bya majila.
Jilai mabingo ne kupitañana mukachi ka bipaka* byo bashimika na mabwe,
Mambo Malakama bakamutwala mu buzha,
Pamo na bañanga banji ne babinemanga banji.+
4 Mambo ka obewa muzhi wabula bukishinka o witotela na mambo a bimpachiko,*
Ne na mambo a musanza wobe upita mema,
Yenka obewa waketekela mu bya bunonshi byobe
Kabiji yenka obewa wamba’mba: “Ñanyi ukandukuka?”’”
5 “Nkambo Mfumu, Yehoba wa mabumba waamba’mba, ‘Amiwa mbena kukuletela bintu bilengesha moyo,
Kufuma ku boba bonse bakuzhokoloka.
Bakakupalañenya konse konse,
Kabiji kafwako muntu nangwa umo ukapwizha pamo boba bakanyema ne.’”
6 “Bino Yehoba waamba’mba, ‘Mu kuya kwa kimye, amiwa nkakonkanya pamo bena Amonyi bo batwajile mu buzha.’”
7 Yehoba wa mabumba waamba pa bena Edomu amba:
“Nanchi mu muzhi wa Temanyi kafwamo bantu baji na maana nyi?+
Abya bantu bamilangwe bekileka kubuulako bantu bintu byawama bya kuba nyi?
Nanchi maana abo apwa nyi?
8 Nyemai, bwelai!
Anweba mwikala mu Dedanyi,+ yainga mukekale mu binkunenke!
Mambo amiwa nkaletela Isao bya malwa
Kimye byo kikafika kya kumukambula.
9 Umvwe bantu bapa mañanzañanza baishile kwi obewa,
Nanchi kechi bakashako amo a kupupula nenyi?
Inge bangivi baishile bufuku,
Bakonshatu konauna bintu byo babena kukeba.+
10 Pano bino, Isao nkamuvuula.
Nkasolola mapunzha anji onse a kufyamamo,
Pa kuba’mba akabule kufyamamo.
Baana banji, balongo banji ne bantu bo ekala nabo kipikipi bonse bakebonauna,+
Kabiji aye kechi ukekalako jibiji ne.+
11 Sha baana bobe babula bashabo,
Ne amiwa nkebapulusha,
Kabiji banabakazhi bafwilwa bo uji nabo, bakaketekela mwi amiwa.”
12 Yehoba waamba’mba: “Umvwai! Umvwe bantu bafwainwe kubula kutoma mu katomeno, bebambila kutomamo, nanchi obewa bakakulekatu kwa kubula kukukambula nyi? Kechi bakakulekatu ne, mambo obewa wafwainwa kutomamo.”+
13 Mambo Yehoba waamba’mba, “Amiwa nachipa kuba’mba Bozula, ukekala kintu kikakankamikanga bantu,+ kyo bakambilanga mwenga ku bantu, kyo bakonauna kabiji ukekala kintu kyo bakafinga; ne mizhi yanji yonse ikonaika myaka ne myaka.”+
14 Naumvwa sawakya wafuma kwi Yehoba,
Ntomesha bamutuma ku bisaka bya bantu na kwibabuula’mba:
“Konkanai pamo mumutule bulemo;
Inengezhai kuya na kulwa.”+
15 “Mambo umvwa! Nakwalula ke mucheche mu bisaka bya bantu,
Ye balengulula ku bantu.+
16 Kuzakamisha bantu ko ubena kwibazakamisha,
Ne bwitote bwa muchima wobe bwakujimbaika,
Obewa wikala mu mabwe mwafyamika,
Yenka obewa wikala pa katumbatumba kalepa.
Nangwa kya kuba wilengela kinsa peulu pene byonka byuba mpungu,
Amiwa nkakwikizhapo,” byo byaamba Yehoba.
17 “Kabiji bantu bakakankamana pa kumona muzhi wa Edomu.+ Bantu bonse bakapitangamo bakakumya bingi ne kwita milozhi na mambo a bya malwa byonse bikamumwekela. 18 Byonkatu byo aonawine mizhi ya Sodoma ne Gomola ne mizhi ikwabo yo batentakene nayo,”+ Yehoba waamba’mba, “byonkabyo ne mu Edomu kafwako nangwa umo ukekalamo ne. Kabiji kafwako muntu nangwa umo ukashalamo ne.+
19 “Umvwai! Muntu umo ukasoloka nobe bokwe+ kufuma mu jivunda ja ku Yodano kwiya mu mpunzha yawama mujiila banyama, kabiji mu kakimyetu kacheche amiwa nkebalengela kunyemamo. Kabiji nkasala muntu wa kwiilama mpunzha. Ñanyi waesakana pamo ne amiwa, kabiji ñanyi wakonsha kunkanya kuba kintu? Ñanyi kafunga wakonsha kuñimena?+ 20 Onkao mambo, anweba bantu, umvwai bintu byafuukula Yehoba pa muzhi wa Edomu ne bintu byo akeba kwiboba aba bekala mu Temanyi:+
Kine, baana ba mikooko bakebakulumunamo.
Aye ukalengela mpunzha mo bekala kushalatu masala na mambo a abo.+
21 Pa kumvwa kiwowo kya kupona kwabo, ntanda yatenkena.
Muji miteto!
Kabiji miteto yabo yaumvwanyika kufika ne ku Kalunga ka Mema Kachila.+
22 Umvwai! Byonkatu byuba mpungu, ne aye uketumpa mwiulu ne kusuumuka,+
Kabiji ukatanyikila byapi byanji pe Bozula.+
Mu joja juba, babiyangala ba bena Edomu bakomvwa misongo
Nobe mwanamukazhi ubena kupaapa.”
23 Byambo byaamba pe Damasakasa:+
“Hamata+ ne Alapada bebalengesha bumvu,
Mambo baumvwa mbila yatama.
Bakookatu zubulu na moyo.
Bantu babena kususutatu nobe mema a pa kalunga ka mema abena kutenkenatu.
24 Damasakasa wakooka.
Waaluluka kuba’mba anyeme, pano bino moyo wamukwata.
Bya malwa ne misongo byamufikila,
Nobe mwanamukazhi ubena kupaapa.
25 Pano mambo ka uno muzhi wayile nkuwa o babujila kumusha,
Muzhi ye bamwenangamo lusekelo?
26 Onkao mambo, bansongwalume banji bakafwila mu mabanza anji,
Kabiji mu joja juba bashilikale bonse bakafwa,” byo byaamba Yehoba wa mabumba.
27 “Amiwa nkabamba mujilo pa nsakwa ya Damasakasa,
Kabiji ukasoka byamba bya kwa Benehadada.”+
28 Yehoba waamba pe Keda+ ne pa bufumu bonse bwa kwa Hazola bonka Nebukaneza Mfumu wa Babilona bo aonawine amba:
“Imanai muye kwi Keda,
Mukonaune baana ba ku Musela.
29 Matente abo ne mikooko yabo bakebisenda,
Pamo na bisapi bya ku matente abo ne bintu byabo byonse.
Bangamela babo bakebasenda,
Kabiji bantu bakataya mbila kwi abo amba, ‘Bintu bileta moyo byakumbana konse konse!’”
30 Yehoba waamba’mba, “Nyemenai kwalepa!
Anweba mwikala mu Hazola, yainga mukekale mu binkunenke.
Mambo Nebukaneza Mfumu wa Babilona wafuukulapo kwimuba kintu kyatama,
Kabiji walangulukapo jishinda ja kwimukambwilamo.”
31 Yehoba waamba’mba, “Imanai, yainga mukalukuke kisaka kya bantu kyaikala mu mutende,
Kyaikalatu ku matwi nzoo!
Kechi kiji na binzhilo nangwa tupingilo ne; abo bekalatu kwa bunke.”
32 Yehoba waamba’mba, “Bakebangata bangamela babo,
Ne kwibasendela bilelwa byabo byavula.
Nkebapalañenya konse konse*
Aba batenda nsuki munshi ya mitwe,+
Kabiji nkebaletela bya malwa kufuma konse konse.”
33 “Kabiji muzhi wa Hazola ukekala ke mwa kulaala balubwala,
Ukonaika myaka ne myaka.
Kafwako nangwa umo ukekalamo ne,
Kabiji kafwako muntu nangwa umo ukashalamo ne.”
34 Zedekiya+ Mfumu wa Yuda byo atendekele kulama, Yehoba waambijile ngauzhi Yelemiya pa mambo a Elama+ amba: 35 “Yehoba wa mabumba waamba’mba, ‘Amiwa mbena kuchimuna buta bwa mukanda bwa kwa Elama,+ bonka bo bakinkamo manungo. 36 Nkaletela Elama luvula luna kufumina ku makonka onse ana a jiulu, kabiji nkebapalañenya ku luno luvula lonse luna. Kafwako kisaka nangwa kimo bena Elama ko bakabula kwibapalañenya ne.’”
37 Yehoba waamba’mba, “Amiwa nkepaya bena Elama ku meso a balwanyi babo ne ku meso a boba bakeba konauna bumi* bwabo; kabiji nkebaletela bya malwa ne kwibabuukila bukaji. Nkebatumina mpoko kufikatu ne byo nkebavizha bonse.”
38 Yehoba waamba’mba, “Amiwa nkabika jitanda jami mu Elama,+ kabiji nkonauna mfumu ne babinemanga bajimo.”
39 Pano bino, Yehoba waamba’mba, “Mu moba akapelako amiwa nkakonkanya pamo bantu ba mu Elama bo batwajile mu buzha.”