Ku Bena Tesalonika

1 Amiwa Paulo, Silivanusa* ne Timoti+ nji nabo. Ino nkalata nanembela kipwilo kya bena Tesalonika mwi Lesa Tata wetu ne mwi Nkambo Yesu Kilishitu:

2 Lusa lukatampe ne mutende bifuma kwi Lesa Tata ne kwi Nkambo Yesu Kilishitu, bikale pe anweba.

3 Anweba balongo bami, tuji na mwingilo wa kusanchila Lesa pa mambo a anweba. Kino kyayilamo mambo lwitabilo lwenu lubena kukoma bingi ne butemwe bo mwitemwa anwe bene na bene bubena kubayilako.+ 4 Atweba twimutakaika+ mu bipwilo bya Lesa na mambo a kuchinchika kwenu ne lwitabilo lwenu mu bya kumanama* ne mu makatazho o mubena kupitamo.*+ 5 Kino ke kishiino kibena kumwesha’mba Lesa wachiba mambo mo aolokela, kabiji kino kikemulengela kutelwa’mba mwafwainwa Bufumu bwa Lesa, bonka bo mubena kumanamina.+

6 Kino kyo kyaoloka kwi Lesa, kulubwila bya malwa aba bemumwesha bya malwa.+ 7 Bino anweba mubena kupita mu bya malwa luno, bakemwamunako ku bino bya malwa pamo ne atweba kimye Nkambo Yesu+ kyo akamweka kufuma mwiulu pamo na bamalaika banji ba bulume+ 8 mu mujilo utema, byo akeya na kushinkanya nabo aba babula kuyuka Lesa ne boba babula kukookela mambo awama a Nkambo yetu Yesu.+ 9 Bano bakebazhachishisha ku lonaiko lwa myaka ne myaka+ kwibafumyako kwi Nkambo ne ku lukumo lwa bulume bwanji, 10 pa kimye kyo akeya mu kutumbijikilwa pamo na bazhijikwa banji ne kumukomoka mu aja juba ku bonse bamwitabijile, mambo ne anweba mwaitabijile byo twimusapwijile.

11 Onkao mambo, twimulombelako kimye kyonse kuba’mba Lesa wetu akemumone’mba mwafwainwa lwito lwanji+ kabiji na bulume bwanji afikizhe bintu byonse byawama byamutokela ku muchima ne mingilo yonse ya lwitabilo. 12 Ukoba bino kuba’mba jizhina ja Nkambo yetu Yesu jitumbijikilwe mwi anweba ne anweba mutumbijikilwe mwi aye, monka mwayila lusa lukatampe lwa Lesa wetu ne lwa Nkambo Yesu Kilishitu.