Byubilo bya Batumwa
15 Banabalume bamo bafumine ku Yudea ne kutendeka kufunjisha balongo amba: “Umvwe mwabula kuya ku mukanda monka mwayila mizhilo ya Mosesa,+ kechi mukapuluka ne.” 2 Onkao mambo, Paulo ne Banabasa byo babujile kuyila mumo na boba bantu ne kwipachika nabo, ponkapo balongo batongwele Paulo, Banabasa ne bakwabo kutwala ano mambo* ku batumwa ne ku bakulumpe mu kipwilo bajinga mu Yelusalema.+
3 Onkao mambo, kipwilo byo kibashinjikinyeko, bano banabalume bapichile mu Fenesha ne Samaliya, saka babulañana pa mambo a kwaluluka kwa bantu ba mu bisaka bya bantu kabiji balengejilenga balongo bonse kwikala na lusekelo. 4 Byo bafikile mu Yelusalema, bebatambwijile ku kipwilo ne ku batumwa ne ku bakulumpe mu kipwilo, kabiji babulañene bintu byonse Lesa byo aubile kupichila mwi abo. 5 Bino bamo mu kipanyi kya Bafaliseo baitabijile, baimene po baikele ne kwamba’mba: “Bafwainwa kwibatwala ku mukanda ne kwibakambizha kulama Mizhilo ya Mosesa.”+
6 Onkao mambo, batumwa ne bakulumpe mu kipwilo bakonkene pamo kuba’mba besambe pa ano mambo. 7 Byo besambilepo* kyabaya, Petelo waimene ne kwamba’mba: “Anweba bakwetu, balongo, mwayukishatu bulongo kuba’mba mu oa moba, Lesa wantongwele mwi anweba kuba’mba bantu ba mu bisaka bya bantu bomvwe mambo awama ne kwitabila.+ 8 Kabiji Lesa wayuka biji michima,+ wamwesheshe kiyukilo kya kuba’mba wibaswa kupichila mu kwibapa mupashi wazhila,+ byonkatu byo etupele ne atweba. 9 Kabiji kechi wibapusenye abo ne atweba ne,+ bino wibatokeshe michima yabo na mambo a lwitabilo lwabo.+ 10 Pano mambo ka o mubena kwesekela Lesa kupichila mu kutwika baana ba bwanga kikonkoji kyanema+ kyabujile kusendapo bashakulu betu nangwa atweba kyo twakonsha kukankalwa kusenda?+ 11 Bino atweba twaitabila’mba tukapulukila mu lusa lukatampe lwa Nkambo Yesu+ byonkatu ne abo byo baitabila.”+
12 Ponkapo jibumba jonse jaubiletu nzoo, kabiji jatendekele kuteleka kwi Banabasa ne Paulo byo bashimikizhenga biyukilo ne bya kukumya* byavula Lesa byo aubile mu bisaka bya bantu kupichila mwi abo. 13 Byo bapwishishe kwamba, Yakoba waambile’mba: “Anweba bakwetu, balongo, ntelekai. 14 Shimeona+ walumbulula bingi bulongo Lesa byo aalulukila ku bisaka bya bantu pa kimye kitanshi ne kusalamo bantu ba jizhina janji.+ 15 Kino kyaswañana na byambo byaawile Bangauzhi byonka byo kyanembwa’mba: 16 ‘Bino bintu inge byapita, nkabwela ne kwimika jibiji tente* wa kwa Davida wapona; kabiji nkawamisha paonaika ne kumubwezha po ajinga, 17 kuba’mba bantu bashalapo bakamukebeshe Yehoba,* pamo na bantu ba mu bisaka byonse, bantu batelwa pa jizhina jami, byo byaamba Yehoba,* yenka ubena kuba bino bintu,+ 18 byayukanyikwa kufumatu ne kala.’+ 19 Onkao mambo, amiwa nafuukula* namba kechi twafwainwa kukatazha boba ba mu bisaka bya bantu babena kwalulukila kwi Lesa ne,+ 20 bino twibanembele’mba bakanenga bintu byo batapishisha bankishi,+ bulalelale,*+ ne nyama ya kubula kukingya, ne mashi.+ 21 Mambo kufumatu ne kala, kwajinga bantu batanganga mabuku a kwa Mosesa mu mizhi yonse, mambo pa juba jonse ja sabado beatanga mu mashinagoga.”+
22 Kepo batumwa ne bakulumpe mu kipwilo, ne kipwilo kyonse bafuukwilepo kutuma ku Antioka banabalume bo basajile mukachi kabo kuyila pamo na Paulo ne Banabasa; batumine Yudasa watelwanga’mba Basabasa ne Silasa,+ batangijilanga balongo. 23 Bebatumine na ino nkalata yo banembele’mba:
“Atweba batumwa ne bakulumpe mu kipwilo, balongo benu, kwi anweba balongo muji mu Antioka,+ Silya ne Kilikya bafuma mu bisaka bya bantu: Twimwimuna! 24 Na mambo a kuba twaumvwa’mba bamo bafumine mwi atweba, babena kwimukatazha bingi na byambo byo babena kwamba,+ kukeba kwimonauna anweba,* nangwa kya kuba kechi twibapelepo mikambizho ya kuba byobyo ne, 25 twaitabunzhanya atweba bonse kuba’mba tutongole banabalume ne kwibatuma ko muji pamo na Banabasa ne Paulo, 26 banabalume bapana bumi* bwabo na mambo a jizhina ja Nkambo Yesu Kilishitu.+ 27 Onkao mambo, tubena kwimutumina Yudasa ne Silasa kuba’mba nabo bakemubuuletu pa kanwa bintu byanembwa mu ino nkalata.+ 28 Mambo mupashi wazhila+ ne atweba pamo twafuukulapo kuba’mba kechi twimunungikilepo bintu bikwabo ne, poso kuba bino bintu byanema: 29 kukana bintu byo batapishisha bankishi,+ mashi,+ ne nyama ya kubula kukingya,+ ne bulalelale.*+ Umvwe saka mukana bino bintu, mukoba bulongo. Mwikale mutende!”
30 Ponkapo bano banabalume byo bebatumine, bayile ku Antioka, kabiji bakonkenye pamo jibumba jonse ne kwibapa nkalata. 31 Byo bapwishishe kwiitanga, basekejile bingi pa luno lutundaiko. 32 Kabiji Yudasa ne Silasa nabo byo bajinga bangauzhi, batundaikilenga balongo na majashi avula ne kwibakosesha.+ 33 Byo baikeleko moba amo, bashajikilepo balongo ne kubwela ku bebatumine. 34 *—— 35 Nangwa byonkabyo, Paulo ne Banabasa baikele mu Antioka, saka bafunjisha ne kusapwila mambo awama a Yehoba* pamo na bantu bakwabo bavula.
36 Byo papichile moba amo, Paulo waambijile Banabasa amba: “Pano twayai tubwele na kupempula balongo mu mizhi yonse mo twasapwijile mambo a Yehoba,* ne kumona byo baji.”+ 37 Banabasa wakebeshe bingi kusenda Yoano, watelwanga’mba Mako.+ 38 Bino Paulo kechi wakebele’mba baye nanji ne, mambo wibashile byo bajinga ku Pamifilya kabiji kechi wayile nabo mu uno mwingilo ne.+ 39 Ponkapotu pabuukile mapata akatampe, kya kuba baabenejilemo ne kwabenamo; Banabasa+ wasendele Mako ne kuya nanji mu bwato ku Kipilusa. 40 Paulo wasajile Silasa ne kufumako balongo byo bamulombejileko kuba’mba Yehoba* amubile lusa lukatampe.+ 41 Wapichile mu Silya ne Kilikya saka akosesha bipwilo.