Danyela
12 “Pa kyokya kimye, Mikela*+ ukeya,* mfumu mwine+ wimenako balongo bobe.* Kabiji kukekala malwa akyangye kumwekapo kala kufumatu kimye kyatendekele kwikalako kisaka kya bantu kufikatu ne pa kyokya kimye. Pa kyonkakya kimye, balongo bobe bakapuluka,+ ko kuba’mba yense ye bakanemba mu buku.+ 2 Kabiji bavula balaala mu mushiji bakabuuka, bamo bakabuukila ku bumi bwa myaka ne myaka, bakwabo bakebalengesha bumvu ne bakwabo bakebazhachisha myaka ne myaka.
3 “Kabiji aba baji na maana bakasama nobe jiulu, ne boba bakakwashanga bakwabo kuyuka kuba bintu byaoloka bakasama nobe tubangabanga myaka ne myaka.
4 “Pakuba obewa Danyela, lama bino byambo ne kubikapo katetesho pa buku kufikatu ne kimye kya ku mpelo.+ Bantu bavula bakapitañananga kuku ne kuku,* kabiji maana a kuyuka bintu akavula bingi.”+
5 Ponkapo amiwa Danyela namwene bantu babiji saka baimana, umo ku kitulu kya mukola bushiya buno ne mukwabo ku bushiya abwa.+ 6 Kepo umo aambijile mwanamulume wavwajile kisapi kya linenyi,+ waimene pa mema mu mukola amba: “Nanchi pakapita kimye kyabaya byepi pa kuba’mba bino bintu byawama bikafike?” 7 Ponkapo naumvwine muntu wavwajile kisapi kya linenyi, waimene pa mema pa mukola, byo asuntwile kuboko kwanji kwa kilujo ne kwa kipiko mwiulu ne kuchipa ku waikala myaka ne myaka amba:+ “Pakapita kimye kyatongolwa, bimye byatongolwa, ne kichika kya kimye.* Aku bangatatu bulume bwa bantu bazhila,+ bino bintu byonse po po bikapwila.”
8 Pakuba amiwa naumvwine, bino kechi nakwatakenye mo byatala ne;+ onkao mambo, nashikishe namba: “Anweba nkambo, ñanyi kintu kikobiwa inge bino bintu byamweka?”
9 Aye wankumbwile’mba: “Obewa Danyela, yanga mambo bino byambo bebifya kabiji bebishinka na katetesho kufikatu ne ku mpelo.+ 10 Bantu bavula baketokesha, kabiji bakobanga bintu byawama ne kwikala bwikalo bwawama.+ Bantu batama bakobanga bintu byatama, kafwako muntu mubi ukakwatakanya bino byambo ne; pakuba baji na maana bo bakebyumvwisha mo byatala.+
11 “Kabiji kufuma kimye kyo bakalekesha bitapisho byo bapananga kimye kyonse+ kufika ne kimye kyo bakemika kintu kya bunya kileta lonaiko,+ pakapita moba 1,290.
12 “Ye wa lusekelo awa upembelela* ne kufika ku mpelo ya moba 1,335!
13 “Pakuba obewa, chinchika kufika ne ku mpelo. Ukalaala, pano bino ku mpelo ya moba akapelako ukabuuka ne kutambula mpunzha yobe.”*+