Nkalata ya Bubiji ya kwa Petelo
3 Anweba batemwe, ino yo nkalata ya bubiji yo nemunembela. Byonkatu byajinga nkalata yami itanshi, mbena kwimutundaika kupichila mu kwimuvululamo bino bintu,+ 2 kuba’mba mwafwainwa kuvulukanga abya byambo byaambile* kala bangauzhi bazhila ne mikambizho ya Nkambo kabiji Mupulushi yo bemubuujile ku batumwa benu. 3 Kintu kitanshi, yukai’mba mu moba a kupelako kukeya bantu bakalengululanga bintu byawama saka boba mwayila bisakasaka michima yabo,+ 4 ne kwamba’mba: “Nanchi mulaye wa kwikalapo kwanji, uji pi?+ Mambo kufumatu kimye bashakulu betu kyo balaajile mu lufu, kafwako kintu nangwa kimo kyapimpulwa ne, bintu byonse bijitu byonka byo byajinga kufumatu ku ntendekelo ya kulengwa kwa bintu.”+
5 Mambo abo balengulwijilemotu kya shinji kino kishinka kya kuba’mba, kala kwajinga meulu ne ntanda yalupukile mu mema Lesa yo alengele na jiwi janji kabiji beizhokolokele ku mema;+ 6 kabiji na bino bintu, aya ntanda yaonaikile kimye kyo yalobele mu mema.+ 7 Kabiji na jiwi jintutu jimo, meulu ne ntanda bijipo luno byalaminwa mujilo kabiji bibena kulamwa kukafikatu ne ku juba ja kije ne ja lonaiko lwa bantu babula kwakamwa Lesa.+
8 Nangwa byonkabyo, anweba batemwe, kange muvulame kino kishinka kya kuba’mba, kwi Yehoba* juba jimo jiji nobe myaka kiumbi ne myaka kiumbi iji nobe juba jimo ne.+ 9 Yehoba* kechi wabanda kufikizha mulaye wanji,+ byonka byo balanguluka bantu bamo ne, pakuba aye wimutekenya mambo kechi usaka muntu nangwa umo amba akafwe ne, bino ukeba’mba bonse balapile.+ 10 Bino juba ja Yehoba*+ jikeya nobe ngivi,+ mo bikapita bya mwiulu+ na kilulumo kikatampe, bino bintu bijimo byo bikatwa kyuya kikatampe, bikasunguluka, kabiji ntanda ne mingilo ijimo bikasoloka patoka.+
11 Byo kiji kuba’mba abino bintu byonse bikasunguluka mu jino jishinda, mwafwainwa kwikala bantu baji na byubilo byazhila ne kwingila mingilo ya kunemeka Lesa 12 byo mubena kutengela ne kukebesha kwiya kwa juba* ja Yehoba,*+ mukonaikila meulu+ na mujilo kabiji bintu mo bikasungulukila na kyuya kikatampe! 13 Pakuba atweba tubena kutengela meulu apya ne ntanda ipya monka mwayila mulaye wanji,+ kabiji mu bino mo mukekala bololoke.+
14 Onkao mambo, anweba batemwe, byo mubena kutengela bino bintu, ibikishaingako kuba’mba Lesa akemutaane babula biko, babula byubilo byatama kabiji baji na bulunda bwawama ne aye.+ 15 Monainga amba kutekanya kwa Nkambo lo lupulukilo, byonkatu mulongo wetu ye twatemwa aye Paulo byo emunembejile mwayila maana o bamupele,+ 16 kwamba pa bino bintu mu makalata anji onse. Nangwa byonkabyo, bintu bimo biji mu ano makalata byakatazha bingi kwibyumvwa, kabiji bino bintu babena kwibikobankanya ku babilubi* ne ku boba babula kushikimana, byonkatu byo boba ne na Binembelo bikwabo, mu kwiletelela bene lonaiko.
17 Onkao mambo, anweba batemwe, byo mwayukila jimo bino bintu, jimukai pa kuba’mba babule kwimutwala mungi na byubilo byatama bya bantu ba mizhilulwila ne kwimulengela kubula kushikimana* bulongo.+ 18 Pakuba komainga mu lusa lukatampe lwa Nkambo yetu kabiji Mupulushi aye Yesu Kilishitu ne kumuyuka. Kwi aye kwikale lukumo pa kino kimye ne myaka yonsetu. Amena.