Yelemiya
30 Yehoba waambijile Yelemiya amba: 2 “Yehoba Lesa wa Isalela waamba’mba, ‘Nemba mu buku byambo byonse byo mbena kukubuula. 3 Mambo Yehoba waamba’mba, “Umvwa! Moba abena kwiya o nkakonkanya bantu bami bena Isalela ne bena Yuda baji mu buzha,+ kabiji nkebabwezha mu kyalo kyo napele bashakulu babo kabiji kikekala ke kyabo jibiji,” byo byaamba Yehoba.’”+
4 Abino byo byambo Yehoba byo aambijile bena Isalela ne bena Yuda.
5 Yehoba waamba’mba:
“Twaumvwa kuzakama kwa bantu;
Kujitu bintu bilenga moyo, mutende kafwako.
6 Ipuzhai umvwe mwanamulume wakonsha kusema mwana.
Pano mambo ka o mmwena mwanamulume yense wakosa na kukwata pa jivumo
Nobe mwanamukazhi ubena kupaapa?+
Nanchi mambo ka o batokolokela ku meso?
7 Mama! Mambo aja juba jakatazha bingi.+
Kafwako juba jaesakana najo ne,
Jo juba ja bya malwa kwi Yakoba.
Nangwa byonkabyo, aye bakamupulusha.”
8 Yehoba wa mabumba waamba’mba, “Pa joja juba nkachimuna kikonkoji kiji mu nshingo yabo, ne kuzutula ntambo yabo pabiji; kabiji benyi kechi bakebasenda kwikala ke bazha babo ne. 9 Abo bakengijilanga Yehoba Lesa wabo ne Davida mfumu wabo ye nkebapa.”+
10 Yehoba waamba’mba, “Obewa Yakoba kalume wami, kange uchine ne,
Ne obewa Isalela kange ukakilwe ne.+
Mambo amiwa nkakupulusha kufuma kwalepa
Ne ba mu kisemi kyobe nkebafumya mu kyalo mo bebatwajile buzha.+
Yakoba ukabwela ne kwikala mu mutende saka akasuluka,
Kafwako nangwa umo ukebalengesha moyo ne.”+
11 Yehoba waamba’mba, “Mambo amiwa nji ne obewa, kabiji nkakupulusha,
Bino nkavizha bantu ba mu bisaka byonse mo nemupalañenyejile;+
Nangwa byonkabyo, obewa kechi nkakonauna ne.+
12 Yehoba waamba’mba:
“Bikozha byobe kechi bikapwa ne.+
Kilonda kyobe kechi kikapwa ne.
13 Kafwako muntu nangwa umo wa kukukwasha ne,
Kafwako muchi wa kupwisha kilonda kyobe ne.
Kafwako muchi wa kukubuka.
14 Bakambwe bobe bonse bakuvulama.+
Bakulengulula.
Mambo amiwa nakupuma bipumo byonkatu bipumana mulwanyi,+
Byonkatu bikambulañana muntu wakanama,
Na mambo a kuzhatwa kobe ne na bubi bwavujisha bo wauba.+
15 Nanchi mambo ka o ubena kujijila na mambo a bikozha byobe?
Misongo yobe kechi ikapwa ne!
Na mambo a kuzhatwa kobe ne na mambo a bubi+ bwavujisha bo wauba,
Amiwa nakukambula
16 Onkao mambo, bantu bonse babena kukonauna nabo bakebonauna,+
Kabiji balwanyi bobe bonse bakebatwala mu buzha.+
Bonse bakupukula bintu byobe nabo bakebapukula bintu byabo,
Ne boba bakwangatanga bintu, ne amiwa nkebalengela nabo kwibangata bintu byabo.”+
17 Yehoba waamba’mba, “Amiwa nkakubuka ne kupwisha bilonda byobe.+
Nangwa kya kuba bakutelelenga’mba muntu ye bapanga:
‘Ziona, ye babujilenga kukeba ku muntu nangwa umo ne.’”+
18 Yehoba waamba’mba:
“Amiwa mbena kukonkanya pamo bazha ba mu matente a kwa Yakoba,+
Kabiji nkobila lusa matente anji a lusambakeno.
Muzhi bakamushimukulwila pa kituntaulo po ajinga,+
Ne kyamba kyakosa bakekishimikila pa mpunzha po kyajinga kala.
19 Kabiji mu bino bishimikwa mukomvwanyika byambo bya lusanchilo ne lusekelo.+
20 Baana banji bakekalanga bulongo byonka byo baikalanga kala,
Kabiji bantu banji bakekala bulongo ku meso ami.+
Nkakambula bantu bonse bamumanyikanga.+
21 Kinemanga wanji ukafuma mwi aye mwine,
Kabiji mu bantu banji mukafuma kalama wanji.
Nkamuswisha kwiya pepi ne amiwa, ne aye ukeya ko nji.”
“Mambo inge kechi namwita ne, ñanyi wakonsha* kwiya ko nji?” byo byaamba Yehoba.
22 “Kabiji mukekala bantu bami,+ ne amiwa nkekala Lesa wenu.”+
23 Talai! Kinkunkwila kya Yehoba kikapupa na bukaji;+
Ko kanzhimbiji kapupila pa mitwe ya babi.
24 Bukaji bwa Yehoba buteema nobe mujilo kechi bukafwomoka ne
Kufikatu ne byo akooba ne kufikizha bintu biji ku muchima wanji.+
Mu moba akapelako mukomvwisha mwatala kino.+