Kubala
12 Mosesa wasongwele mwanamukazhi mwina Kushi,+ na mambo a kino Milyama ne Alona batendekele kumunena. 2 Baambilenga’mba: “Nanchi Yehoba wambatu kupichila mwi Mosesa yenka nyi? Nanchi kechi wamba kupichila ne mwi atweba nenyi?”+ Kabiji Yehoba watelekelenga.+ 3 Pano bino, Mosesa wajinga kimote kukila bantu*+ bonse bajinga pano pa ntanda.
4 Ponkapo Yehoba waambijile Mosesa, Alona ne Milyama amba: “Anweba basatu yainga ku tente wa lusambakeno.” Ne abo bonse basatu bayile. 5 Kabiji Yehoba waikijile mu jikumbi ja mulumbulumbu+ ne kwimana ku kibelo kya tente ne kwita Alona ne Milyama. Bonse babiji bayile kulutwe. 6 Wibambijile’mba: “Umvwai byambo byami. Umvwe mukachi kenu mwajinga ngauzhi wa Yehoba, inge nesolwele kwi aye mu kimwesho+ ne kwamba nanji mu kiloto.+ 7 Pano bino, kechi byo byo nguba kwi kalume wami Mosesa ne! Namupa bukalama bwa pa nzubo+ yami yonse.* 8 Ñamba nanji kilungi na kilungi,*+ kechi mu bishimpi ne; kabiji aye umona kipasha kya Yehoba. Pano mambo ka o mwaji kubujila kuchina kumunena kalume wami, Mosesa?”
9 Onkao mambo, Yehoba wibabuukijile bukaji ne kufumako kwi abo. 10 Jikumbi byo jafuminepo pa tente, Milyama wakolelwe mbumba yatokeletu too nobe mabebe.+ Alona byo aalulukile ne kutala Milyama, wamwene’mba uji na mbumba.+ 11 Ponkapo Alona waambijile Mosesa amba: “Nemusashijila anweba nkambo yami namba, mwane kange mwitukabishe na buno bubi ne. Twauba kintu kya kubula maana. 12 Mwane kange mumuleke ekale nobe mwana wasemwa saka abolela munda mwa inanji ne!” 13 Ponkapo Mosesa wamujijiile Yehoba ne kwamba’mba: “Anweba Lesa nemusashijila namba, mubukai!”+
14 Yehoba wakumbwile Mosesa amba: “Umvwe shanji wamushipijile mate mu meso anji, nanchi inge kechi waikele na bumvu moba atanu na abiji nenyi? Mubikai kwa bunke pangye ya kampu moba atanu na abiji,+ apa bino bakamubwezhe mu kampu.” 15 Onkao mambo, Milyama bamubikile kwa bunke pangye ya kampu moba atanu na abiji,+ kabiji bantu kechi baimene lwendo ne, posotu Milyama byo bamubwezhezhe mu kampu. 16 Kepo bantu baimene lwendo kufuma ku Hazelota+ ne kukatebelela mu kiselebwa kya Palana.+