Mitonyi

13 Bena Isalela batendekele jikwabo kuba bintu byatama ku meso a Yehoba,+ kabiji Yehoba wibapaine mu maboko a bena Filishitiya+ pa myaka 40.

2 Kabiji kwajinga mwanamulume wa ku Zola+ wa mu kisemi kya bena Danyi,+ jizhina janji wajinga Manowa.+ Mukazhanji wajinga ñumba kechi wasemenepo mwana ne.+ 3 Mu kuya kwa kimye, malaika wa Yehoba wamwekele ku mwanamukazhi ne kumwambila’mba: “Umvwa, obewa wi ñumba kabiji kechi wasemapo mwana ne. Bino ukemita ne kusema mwana wa mulume.+ 4 Pano ujimuke, kechi wafwainwa kutoma binyu nangwa bintu byonse bipendañana+ ne, kabiji kechi wafwainwa kuja kintu kyonse kya muzhilo ne.+ 5 Umvwa! Ukemita ne kusema mwana wa mulume, kabiji kechi wafwainwa kumutenda nsuki na mpemuna ne,+ mambo uno mwana ukekala Munazili wa Lesa kufumatu pa kusemwa* kwanji, kabiji ye ukapokololanga bena Isalela mu maboko a bena Filishitiya.”+

6 Kepo uno mwanamukazhi ayile na kubuula mwatawanji amba: “Muntu wa Lesa wa kine waji kwiya kwi amiwa, kabiji waji kumwekanga nobe malaika wa Lesa wa kine, ulenga moyo mukatampe. Kechi naji kumushikisha ko aji kufuma ne, kabiji kechi waji kumbuula jizhina janji ne.+ 7 Bino waji kuñambila’mba, ‘Umvwa! Ukemita ne kusema mwana wa mulume. Pano kechi wafwainwa kutoma binyu nangwa bintu byonse bipendañana ne, kabiji kechi wafwainwa kuja kintu kya muzhilo ne, mambo mwana ukekala Munazili wa Lesa kufumatu pa kusemwa* kwanji kufikatu ne juba jo akafwa.’”

8 Manowa wamusashijile Yehoba amba: “Mwane bandekeleko mambo, anweba Yehoba. Mwane awa muntu wa Lesa wa kine ye mwaji kutuma muswishai abwele jibiji na kwitufunjisha byo twafwainwa kuba na uno mwana ukasemwa.” 9 Onkao mambo, Lesa wa kine waumvwine byaambile Manowa, kabiji malaika wa Lesa wa kine waishile jibiji ku mwanamukazhi byo aikele kwapela muzhi; Manowa aye mwatawanji kechi wajinga nanji ne. 10 Ponkapotu uno mwanamukazhi wanyemene kuya na kubuula mwatawanji amba: “Umvwai! Awa mwanamulume waishile kwi amiwa aja juba, wamweka kwi amiwa.”+

11 Kepo Manowa aimene ne kuya na mukazhanji. Byo afikile ku yewa mwanamulume, wamushikishe’mba: “Nanchi yenu mwisambile na mukazhami nyi?” Aye wakumbwile’mba: “Yami iye.” 12 Kepo Manowa aambile’mba: “Byambo byenu bikafike! Nanchi bwikalo bwa uno mwana bukekala byepi, kabiji ñanyi mwingilo ye akengilanga?”+ 13 Malaika wa Yehoba wamukumbwile Manowa amba: “Mukazhobe wafwainwa kuchinuzhuka bintu byonse byo namubuujile.+ 14 Kechi wafwainwa kuja kintu kifuma ku muñanzañanza ne, kechi wafwainwa kutoma binyu nangwa bintu byonse bipendañana+ ne, kabiji kechi wafwainwa kuja kintu kyonse kya muzhilo ne.+ Bintu byonse byo namukambizhe, wafwainwa kwibilondela.”

15 Kepo Manowa aambijile malaika wa Yehoba amba: “Mwane, bakikaleko, twibanengezhezhe mwana mbuzhi.”+ 16 Bino malaika wa Yehoba waambijile Manowa amba: “Nangwa ngikale, kechi nsakuja kajo kenu ne; bino inge mubena kukeba kulambula mulambo wa kusoka kwi Yehoba, mwakonsha kumulambula.” Manowa kechi wayukile’mba wajinga malaika wa Yehoba ne. 17 Kepo Manowa ashikishe malaika wa Yehoba amba: “Yenu bañanyi jizhina,+ pa kuba’mba tukemunemeke kimye byambo byenu kyo bikafika?” 18 Nangwa byonkabyo, malaika wa Yehoba wamukumbwile’mba: “Mambo ka o ubena kukebela kuyuka jizhina jami, byo jiji ja kukumya?”

19 Kepo Manowa ashikwile mwana mbuzhi ne mulambo wa kajo ne kwibilambula kwi Yehoba pa jibwe. Kabiji waubilenga bintu bya kukumya Manowa ne mukazhanji saka bamonako. 20 Lubebe lwa mujilo byo lwafuminenga pa kya kusokelapo bitapisho kuya mwiulu, malaika wa Yehoba wayile mwiulu monka mu lubebe lwa mujilo lwafuminenga pa kya kusokelapo bitapisho, Manowa ne mukazhanji saka bamonako. Ponkapo baponene panshi kinkuvumene. 21 Malaika wa Yehoba kechi wamwekelepo jibiji kwi Manowa ne mukazhanji ne. Manowa po po ayukile’mba wajinga malaika wa Yehoba.+ 22 Ponkapo Manowa waambijile mukazhanji amba: “Kine tusakufwa, mambo twamona Lesa.”+ 23 Bino mukazhanji wamwambijile’mba: “Inge Yehoba wakukebanga kwitwipaya, inge kechi waji kuswa mulambo wa kusoka+ ne mulambo wa kajo wafuma mu maboko etu ne, kabiji inge kechi witumwesha bino bintu byonse ne, kabiji inge kechi witubuula bino bintu byonse ne.”

24 Mu kuya kwa moba, mwanamukazhi wasemene mwana wa mulume ne kumutumba’mba Samisonyi;+ kabiji uno mwana byo akomenenga, Yehoba watwajijile kumupesha. 25 Mu kuya kwa kimye, mupashi wa Yehoba waishile pe aye+ mu Mahane-danyi,+ pakachi ka Zola ne Eshitaola.+