Buku wa Bubiji wa Bamfumu

25 Mu mwaka wa butanu na buna wa bukalama bwa kwa Zedekiya, mu ñondo wa bujikumi, pa juba ja bujikumi ja ñondo, Nebukaneza Mfumu+ wa Babilona waishile na nzhita yanji yonse na kulukuka Yelusalema.+ Kabiji wazhokolokele muzhi ne kushimikako nsakwa ya kulwilapo kuzhokoloka muzhi yense,+ 2 kabiji muzhi bamuzhokolokele kufikatu ne mu mwaka wa bu 11 wa bukalama bwa Mfumu Zedekiya. 3 Pa juba ja butanu na buna mu ñondo wa buna kipowe kya nzala kyabayile+ mu muzhi, kabiji kechi mwajinga kajo ka kuja bantu ba mu kyalo ne.+ 4 Nsakwa ya muzhi beikundwile,+ ne bashilikale bonse banyemene bufuku kupichila pa kibelo kyajinga pakachi ka masakwa abiji kwipi na bujimi bwa mfumu, bena Kalodeya saka bazhokoloka muzhi; kabiji mfumu wanyemejile mu jishinda jaya ku Alaba.+ 5 Bino nzhita ya bena Kalodeya yapupijile mfumu kabiji bamutaaine mu kiselebwa kya Yeliko, kabiji bashilikale banji bonse bamupalañene. 6 Kepo bamukwachile mfumu+ ne kumuleta kwi mfumu wa Babilona ku Libula, kabiji bamuchibijile mambo. 7 Kabiji baipayile baana ba kwa Zedekiya ne aye saka amonako; kepo Nebukaneza asabile meso a kwa Zedekiya, ne kumukasa nshimbi ya mukuba, ne kumuleta ku Babilona.+

8 Mu ñondo wa butanu pa juba ja butanu na bubiji, ko kuba’mba, mu mwaka wa bu 19 wa bukalama bwa kwa Nebukaneza Mfumu wa Babilona, Nebuzaladana+ mukulumpe wa bakasopa, yenka wajinga kalume wa mfumu wa Babilona, waishile ku Yelusalema.+ 9 Wasokele nzubo ya Yehoba,+ ne nzubo* ya mfumu+ ne mazubo onse a mu Yelusalema;+ kabiji wasokele ne mazubo a babinemanga bonse.+ 10 Kabiji masakwa azhokolokele Yelusalema beakundawile ku bashilikale bonse ba bena Kalodeya bajinga na mukulumpe wa bakasopa.+ 11 Nebuzaladana mukulumpe wa bakasopa watwajile mu buzha bantu bashajile mu muzhi, ne bantu banyemejile kwi mfumu wa Babilona, kabiji ne bantu bonse.+ 12 Bino mukulumpe wa bakasopa washilepo bayanji bamo ba mu kyalo ba kwingijila mu bujimi bwa miñanzañanza ne ba kwingila mingilo yakatazha.+ 13 Kabiji bena Kalodeya balalawile mashiki a mukuba+ ajinga ku nzubo ya Yehoba ne bikochikala+ ne Kizhiba kya mukuba+ kyajinga mu nzubo ya Yehoba, kabiji basendele mukuba ku Babilona.+ 14 Basendele ne bikopo, mafosholo, bya kuzhimyako mujilo, ne tutomeno, ne bipe byonse bya mukuba byo baingijishanga mu nzubo ya Lesa. 15 Mukulumpe wa bakasopa wasendele bya kwapwilapo mujilo ne masanyi afukumana a ngolode+ yawama ne siliva.+ 16 Kabiji mashiki abiji, ne Kizhiba ne bikochikala Solomone byo alengele bya ku nzubo ya Yehoba, mukuba wa bino bintu byonse wajinga wa kukankalwa kupima.+ 17 Jishiki jimo mu kimino jajinga makyubichi 18,*+ kabiji mutwe wajo wajinga wa mukuba; ne mutwe wajinga makyubichi asatu mu kimino, kabiji bukonde ne mapomegulanchi azhokolokele mutwe onse ajinga a mukuba.+ Jishiki ja bubiji ne bukonde bwajo byajinga byonkabyo.

18 Mukulumpe wa bakasopa wasendele ne Selaya+ ñanga mukatampe, ne Zefwaniya+ ñanga wa kibiji ne bakalama ba bibelo basatu.+ 19 Kabiji mu muzhi wasendelemo kinemanga wa mfumu wajinga mukulumpe wa bashilikale, ne balunda ba mfumu batanu bo bataaine mu muzhi, kubikapotu ne munembeshi wa mukulumpe wa nzhita, yenka wakonkanyanga pamo bantu ba mu kyalo, ne banabalume 60 bafumine mu bantutu ba mu kyalo bo bataaine mu muzhi. 20 Nebuzaladana+ mukulumpe wa bakasopa wibasendele ne kwibaleta kwi mfumu wa Babilona ku Libula.+ 21 Mfumu wa Babilona wibatapile ne kwibepayila ku Libula mu kyalo kya Hamata.+ Byonkabyo, bena Yuda bayile mu buzha kufuma mu kyalo kyabo.+

22 Nebukaneza Mfumu wa Babilona watongwele Gedaliya+ mwana wa kwa Ahikama,+ Ahikama mwana wa kwa Shafwana+ kutangijila bantu bo ashile mu kyalo kya Yuda.+ 23 Bakulumpe bonse ba bashilikale ne bantu babo byo baumvwine’mba mfumu wa Babilona watongola Gedaliya, ponkapo bayile kwi Gedaliya ku Mizipa. Bajinga ba Ishimela mwana wa kwa Netaniya, ne Yohanana mwana wa kwa Kalea, ne Selaya mwana wa kwa Tanahumeta mwina Netofwa, ne Yazaniya mwana wa mwina Maakata, pamo na bantu babo.+ 24 Gedaliya wachipile kwi abo ne ku bantu babo amba: “Kange muchine kwikala bakalume ba bena Kalodeya ne. Ikalainga mu kyalo ne kwingijila mfumu wa Babilona, kabiji bintu bikemuwamina.”+

25 Mu ñondo wa butanu na bubiji, Ishimela+ mwana wa kwa Netaniya, Netaniya mwana wa kwa Elishama wa mu kikota* kya ku bufumu, waishile na banabalume bakwabo jikumi, ne abo batapile Gedaliya kabiji wafwile, kubikapotu ne bena Yuda ne bena Kalodeya bo ajinga nabo ku Mizipa.+ 26 Kepo bantu bonse, kutendekelatu ku mwanyike kufika ne ku mukulumpe, kubikakotu ne bakulumpe ba nzhita, baimene ne kuya ku Ijipita,+ mambo baumvwine moyo na mambo a bena Kalodeya.+

27 Kabiji mu mwaka wa bu 37 wa buzha bwa kwa Yehoyakina Mfumu+ wa Yuda, mu ñondo wa bu 12, pa juba ja bu 27 ja ñondo, mu mwaka Evile-melodaka Mfumu wa Babilona mo aikele mfumu, wakasulwile* Yehoyakina Mfumu wa Yuda mu kaleya.+ 28 Wisambile nanji bulongo kabiji wanemekele jitanda janji kukila matanda a bamfumu bakwabo bo ajinga nabo mu Babilona. 29 Onkao mambo, Yehoyakina wavuujile bivwalo byanji bya mu kaleya, kabiji wajiilanga pamo nanji mu moba onse a bumi bwanji. 30 Mfumu wamupanga kajo, pa juba pa juba, mu moba onse a bumi bwanji.