Yoba
8 Kepo Bilidada+ mwina Shua+ aambile’mba:
2 “Ñanyi kimye kyo ukaleka kwamba byambo bya uno mutundu?+
Byambo bya mu kanwa kobe biji nobe mwela mukatampe!
3 Nanchi Lesa wakonsha kuchibila mambo mungi,
Nangwa wa Bulume Bonse wakonsha kuvulañanya kintu kyaoloka nyi?
4 Umvwe baana bobe bamulengele mambo,
Wibalekele’mba bakambulwe na mambo o balengele;*
5 Bino umvwe uketekeletu mwi Lesa+
Ne kumusashijila aye wa Bulume Bonse amba akubile bibusa,
6 Kabiji umvwe kine wajinga watoka ne koloka,+
Aye wakonsha kukuta muchima*
Ne kukubwezha pa mpunzha yobe yafwainwa.
7 Nangwa kya kuba ntendekelo yobe yajingatu icheche,
Kulutwe wakonsha kwikala na bunonshi bwavula.+
8 Pano ipuzha bisemi bya kala,
Ne kuta muchima ku bintu byo bataaine bashakulu babo.+
9 Mambo atweba twasemekelwetu kesha, kabiji kafwako byo twayuka ne,
Mambo bumi bwetu pano pa ntanda bujitu nobe kimvule.
10 Nanchi abo kechi basakukufunjisha,
Ne kukubuula bintu byo bayuka* nenyi?
11 Nanchi mambanga akonsha kukoma pabula mateshi nyi?
Nanchi jitete jakonsha kukoma pabula mema nyi?
12 Byo jibena kulalatu buluba saka bakyangye ne kwijitema,
Jo jikekala jitanshi kuma kukila ne bintu bikwabo.
13 Akino kyo kimwekela* bonse bavulama Lesa,
Mambo luketekelo lwa boba babula kwakamwa* Lesa lukapwa,
14 Bonka baketekela kintu kyatutu
Kabiji kintu kyo baketekela kyanekenatu nobe tonge* wa tangatanga.
15 Ukashakamina ku nzubo yanji, bino ikakunduka;
Ukeseka kwiikwachijila, bino ikapona.
16 Uji nobe kichi kyamena kiji pa mute,
Kabiji misampi yanji yatabila mu bujimi.+
17 Mizhazhi yanji yapikankena mu mulumba wa mabwe;
Mabwe yo nzubo yanji.*
18 Bino umvwe bakamutupulepo pa mpunzha yanji,*
Aya mpunzha ikamukana ne kumwambila’mba, ‘Nkyangye kukumonapo.’+
20 Lesa kechi ukakana aba ba kishinka* ne;
Kabiji kechi ukakwasha* bantu babi ne,
21 Mambo aye ukayuzha kanwa kobe na tuseko
Ne byatunwa byobe bikabijikanga bintu bya lusekelo.
22 Aba bakushikwa bakomvwa bumvu,
Ne matente a babi kechi akekalako ne.”