Ezikyo
13 Kabiji Yehoba wañambijile jikwabo amba: 2 “Obewa mwana muntu, aula bintu bikamwekela bangauzhi ba bena Isalela,+ kabiji ubuule ne boba baula bintu bifuma* mu michima yabo+ amba, ‘Umvwai byaamba Yehoba. 3 Nkambo Mfumu Yehoba waamba’mba: “Malwa abo bangauzhi bakosama baula bintu bifuma mu michima yabo, bino saka babula kumonapo kimwesho nangwa kimo ne!+ 4 Anweba bena Isalela, bangauzhi benu baji nobe balubwala baji mu masala. 5 Kange mukaye mu mapunzha akundauka a nsakwa ne kwibashimikilao jibiji bena Isalela ne,+ kuchina’mba bena Isalela bakakosa mu nkondo mu juba ja Yehoba.”+ 6 “Bamona bimwesho bya bubela ne kwaula bya bubela amba, ‘Abino byo byaamba Yehoba,’ bino Yehoba saka abula kwibatuma, kabiji baketekela’mba ukafikizha byo bamba.+ 7 Nanchi anweba kechi mwamona bimwesho bya bubela ne kwambila jimo bya bubela amba, ‘Abino byo byaamba Yehoba,’ bino saka nabula kwambapo kintu nenyi?”’
8 “‘Onkao mambo, Nkambo Mfumu Yehoba waamba’mba: “‘Na mambo a kuba mwaamba bintu bya bubela ne kumona bimwesho bya bubela, amiwa nemuzhingijila,’ byo byaamba Nkambo Mfumu Yehoba.”+ 9 Nazhingijila bangauzhi bamona bimwesho bya bubela ne kwaula bya bubela.+ Kechi bakekala pamo na bantu bo naketekela; nangwa kwibanemba mu buku wa bena Isalela ne; kabiji kechi bakabwela mu kyalo kya bena Isalela ne; kabiji po po mukayuka’mba, amiwa yami Nkambo Mfumu Yehoba.+ 10 Na mambo a kino, balengela bantu bami kuya mungi pa kwibabuula’mba, “Kuji mutende!” bino saka kwabula mutende.+ Umvwe bashimika lubumbulu wabula kukosa, bashingwilako maloba atoka.’*+
11 “Ambila boba babena kushingwila lubumbulu na maloba atoka amba lubumbulu ukakunduka. Ukapona inge kukanoke mvula wa mukwe, mvula wa mabwe,* ne kinkunkwila kikatampe.+ 12 Inge lubumbulu wapona, bakemushikisha’mba, ‘Maloba atoka o mwashingwijile ku lubumbulu aji pi?’+
13 “Onkao mambo, Nkambo Mfumu Yehoba waamba’mba: ‘Na mambo a bukaji, nkaleta kinkunkwila kikatampe, nkanokesha mvula wa mikwe ne wa mabwe kuba’mba amuponeshe. 14 Nkakundula lubumbulu ye mwashingwijile na maloba atoka ne kitendekesho kyanji kikashalatu patoka. Umvwe muzhi wakunduka, ne anweba mukafwila monka; kabiji po po mukayuka’mba, amiwa yami Yehoba.’
15 “‘Byo nkamwesha bukaji bwami bonse pa lubumbulu ne pa boba bashingwijilenga lubumbulu na maloba atoka, nkemwambila namba: “Lubumbulu wapona ne boba bamushingwijilenga bafwa.+ 16 Bangauzhi ba bena Isalela baawijilenga Yelusalema ne boba bamwenenga bimwesho bya kuba’mba Yelusalema ukekala mu mutende, bino saka kwabula mutende, bafwa,”’+ byo byaamba Nkambo Mfumu Yehoba.
17 “Pakuba obewa mwana muntu, mona baana ba bakazhi ba balongo bobe babena kwaula bya mu michima yabo bene, wibabuule bikebamwekela. 18 Wibabuule’mba, ‘Nkambo Mfumu Yehoba waamba’mba: “Malwa abo banabakazhi basonena bantu tubisapi twa kuvwala ku mikoko* nobe makosa ne kwibasonena bitambala kwesakana na biji mitwe yabo kuba’mba bebepaye! Nanchi mubena kukwata bantu bami* kuba’mba mupulushe bumi* bwenu nyi? 19 Nanchi mukandengulwisha ku bantu bami na mambo a kukeba mikono ya mbaale ne tubibese twa shinkwa+ ne kwipaya bantu* bafwainwe kubula kufwa nyi? Nangwa kupulusha boba* bafwainwe kubula kupuluka kupichila mu kubepa bantu bami bateleka ku bubela bwenu nyi?”’+
20 “Onkao mambo, Nkambo Mfumu Yehoba waamba’mba: ‘Anweba banabakazhi, amiwa nashikwa tubisapi twenu to mwingijisha kukwachilako bantu* nobe tuñonyi, kabiji nkemuvuulato ku maboko enu ne kukasulula boba bo mwakwata nobe tuñonyi. 21 Nkatabaula tubitambala twenu ne kupokolola bantu bo mwakwachile kabiji kechi mukakonsha kwibakwata jibiji ne; kabiji po po mukayuka’mba yami Yehoba.+ 22 Anweba mwalefula bantu baoloka na mambo a bubela bwenu+ saka nabujile kwibalefula* amiwa mwine, kabiji mwakosesha babi+ pa kuba’mba babule kuleka byubilo byabo byatama ne kwikala na bumi.+ 23 Onkao mambo, anweba banabakazhi kechi mukamonapo jibiji bimwesho bya bubela ne kwaula bya bubela ne;+ nkapokolola bantu bami mu maboko enu; kabiji po po mukayuka’mba amiwa yami Yehoba.’”