Kubala

14 Kepo jibumba jonse jajijile, kabiji bantu bakishishe na kujila ne kuwowakana bufuku bonse.+ 2 Bena Isalela bonse batendekele kunyinyita Mosesa ne Alona,+ kabiji jibumba jonse jibanenenenga ne kwamba’mba: “Nanchi inge twafwijiletu mu kyalo kya Ijipita, nangwa kufwilatu muno monka mu kiselebwa! 3 Mambo ka Yehoba o etuletela mu kino kyalo kuba’mba betwipaye na mpoko?+ Bakazhi betu ne baana betu bakebasenda mu buzha.+ Nanchi kechi kituwamina kubwelatu ku Ijipita nenyi?”+ 4 Beambijilenga mulwabo amba: “Twayai tusale ntangi ne kubwela ku Ijipita!”+

5 Ponkapo Mosesa ne Alona baponene panshi kinkuvumene ku meso a jibumba jonse ja bena Isalela. 6 Kepo Yoshua+ mwana wa kwa Nuni ne Kaleba+ mwana wa kwa Yefune bajinga pa boba bayile na kwendela kyalo, batabwile bivwalo byabo. 7 Kabiji baambijile jibumba jonse ja bena Isalela amba: “Kyalo kyo twayile na kwendela ke kyalo kyawama bingi.+ 8 Inge Yehoba wasekela mwi atweba, ko kuba’mba uketutwala mu kyokya kyalo ne kwitupakyo, kino ke kyalo kyavula mukaka ne buki.+ 9 Bino kange musatukile Yehoba nangwa kuchina bantu ba mu kyokya kyalo ne,+ mambo tukebepaya.* Bukikizhi bwabo bwafumapo, kabiji Yehoba uji ne atweba.+ Kange mwibachine ne.”

10 Nangwa byonkabyo, jibumba jonse jaambile’mba twibase mabwe.+ Bino lukumo lwa Yehoba lwamwekele pa tente wa lusambakeno ku bena Isalela bonse.+

11 Kepo Yehoba aambijile Mosesa amba: “Nanchi myaka inga bano bantu yo bakabula kunnemeka,+ kabiji myaka inga yo bakabula kungitabila nangwa kya kuba nebamwesheshe biyukilo byavula?+ 12 Nsakwibapuma na mwalo ne kwibepaya kabiji nsakukwalula ke kisaka kikatampe kyakosa kwibakila.”+

13 Bino Mosesa waambijile Yehoba amba: “Bena Ijipita ko mwapokolwele bano bantu na bulume bwenu, bakomvwa,+ 14 ne kubuula bantu ba mu kino kyalo. Bano nabo baumvwa’mba, anweba Yehoba muji mukachi ka bena Isalela+ kabiji mwisolola patoka kwi abo.+ Anweba mwi Yehoba ne jikumbi jenu jiji peulu yabo, kabiji mute mubena kwibatangijila mu jikumbi ja mulumbulumbu ne bufuku mu jikumbi ja mulumbulumbu ja mujilo.+ 15 Umvwe anweba mwibepaye bano bantu bonse pa kimye kimotu,* bisaka byaumvwa nkuwa yenu bikamba’mba: 16 ‘Yehoba wakankelwe kutwala bano bantu mu kyalo kyo achipile kwibapa, o ene mambo, o ebepayijile mu kiselebwa.’+ 17 Mwane, anweba Yehoba, bulume bwenu bukatampe bumweke, byonka byo mwaambile’mba: 18 ‘Yehoba ubanda kuzhingila kabiji uji na butemwe bubula kwaluka,*+ ulekela mambo ne mizhilulwila, bino kechi ukabula kukabisha muntu uji na mambo ne. Kabiji na mambo a bubi bwa bashabo, ukabisha baana, bankana ne bankanununa.’+ 19 Mwane, balekelaiko mambo abo monka mwayila butemwe bwenu bubula kwaluka, byonkatu byo mwibalekelako mambo bano bantu kufuma mu Ijipita kufikatu ne lelo jino.”+

20 Kepo Yehoba aambile’mba: “Nebalekelako mambo monka mo waambila.+ 21 Pano bino, byonka byo nji na bumi, pano pa ntanda ponse pakayula lukumo lwa Yehoba.+ 22 Nangwa byonkabyo, bantu bonse bamona lukumo lwami ne biyukilo byami+ byo naubile mu Ijipita ne mu kiselebwa, pano abo saka batwajijilatu na kungeseka+ abino bimye jikumi ne kubula kumvwina jiwi jami,+ 23 kechi bakamona kyalo kyo nachipile ku bashakulu babo ne. Kafwako nangwa umo pa boba babula kunnemeka ukekimona ne.+ 24 Pakuba kalume wami Kaleba+ wajinga na muchima wapusanako na wa bakwabo, kabiji aye wandondejilenga na muchima yense. Amiwa nkamutwala mu kyalo kyo ayilemo ne baana banji bakekitambula kwikala kyabo.+ 25 Byo kiji kuba’mba bena Amaleki ne bena Kenana+ babena kwikala mu kimpachiko,* kesha mukaluluke ne kuya mu kiselebwa kupichila mu jishinda jaya ku Kalunga ka Mema Kachila.”+

26 Kepo Yehoba aambijile Mosesa ne Alona amba: 27 “Nanchi bimye binga jino jibumba jatama o jikatwajijila na kunnyinyita?+ Naumvwa bintu bibena kunnyinyita bena Isalela.+ 28 Wibabuule’mba: ‘“Byonka byo nji na bumi,” byo byaamba Yehoba, “Nsakwimuba monka mwayila byambo byo mubena kwamba byo naumvwa.+ 29 Anweba bonse bo banembele kutendekela pa wa myaka 20 kuya peulu, bonse bannyinyita,+ mukafwila mu kyonka kino kiselebwa.+ 30 Kafwako nangwa umo pe anweba ukatwela mu kyalo kyo nachipile* namba mukekalemo ne,+ kanatu Kaleba mwana wa kwa Yefune ne Yoshua mwana wa kwa Nuni.+

31 “‘“Kabiji nkatwezhamo baana benu bo mwaambile’mba bakebasenda mu buzha,+ ne abo bakayuka kyalo kyo mwakana.+ 32 Pakuba anweba mukafwila mu kyonka kino kiselebwa. 33 Kabiji baana benu bakekala bakafunga mu kiselebwa pa myaka 40,+ kabiji bakayanjilamo na mambo a kubula* bukishinka kwenu kufikatu ne byo akafwa muntu ukapelako mwi anweba mu kino kiselebwa.+ 34 Monka mwayila moba o mwaendejile kyokya kyalo, moba 40,+ juba jimo mwaka umo, juba jimo mwaka umo. Kabiji mukatwikwa na bubi bwenu pa myaka 40,+ pa kuba’mba mukayuke bintu bifuma mu kundengulula.*

35 “‘“Amiwa Yehoba, yami naamba. Abino byo byo nkoba ku jino jibumba jonse jatama, bonse bakonkana pamo na kundengulula: Mu kyonka kino kiselebwa, bonse mo mo bakafwila ne kuvila.+ 36 Banabalume Mosesa bo atumine kuya na kwendela kyalo, bonka balengejile jibumba jonse kumunyinyita byo babwelele ne kuleta sawakya watama pa kyokya kyalo,+ 37 kine bonka baletele sawakya watama pa kyokya kyalo, bakakambulwa ne kufwila ku meso a Yehoba.+ 38 Pakuba Yoshua mwana wa kwa Nuni ne Kaleba mwana wa kwa Yefune, bo bonkatu bakabula kufwa pa boba bayile na kwendela kyalo.”’”+

39 Mosesa byo abuujile bena Isalela bino byambo byonse, bantu batendekele kujila bingi. 40 Kabiji baimene lukelokelo ne kukanjila pa mutumba saka baamba’mba: “Atweba twinengezha kuya ku mpunzha yaambile Yehoba, mambo twalenga mambo.”+ 41 Bino Mosesa wibambijile’mba: “Mambo ka o mubena kulengulwila mikambizho ya Yehoba? Kechi musakwibashinda ne. 42 Kange muyeko ne, mambo Yehoba kechi uji ne anweba ne; kabiji balwanyi benu basakwimushinda.+ 43 Mambo bena Amaleki ne bena Kenana babena kwimupembelela,+ kabiji basakwimwipaya na mpoko. Na mambo a kuba mwaleka kulondela Yehoba, Yehoba naye kechi usakwikala ne anweba ne.”+

44 Nangwa byonkabyo, abo belundumikile ne kukanjila pa mutumba,+ pakuba Mosesa washajile mu kampu, ne jikwachi ja lulayañano lwa Yehoba kechi jafuminemo ne.+ 45 Kepo bena Amaleki ne bena Kenana baikalanga ku yewa mutumba, baishile ne kwibatapa ne kwibapalañanya kukafika ne ku Holama.+