Mitonyi

4 Bino Ehuda byo afwile, bena Isalela batendekele jikwabo kuba bintu byatama kwi Yehoba.+ 2 Onkao mambo, Yehoba wibapoteshe kwi Yabina mfumu wa Kenana+ walaminenga mu Hazola. Mukulumpe wa nzhita yanji wajinga Sisela waikalanga mu Halosheta*+ mwajinga bisaka bya bantu. 3 Bena Isalela bamujijiile Yehoba,+ mambo Yabina* wajinga na makalaki a nkondo 900 ajinga na bikwakwa bya kyela* kya kapotwe,+ kabiji wamanyikilenga bingi bena Isalela+ pa myaka 20.

4 Kabiji Debola ngauzhi wa mukazhi,+ muka Lapidota, wachibijilenga bena Isalela mambo pa kyokya kimye. 5 Watemenwe kwikala munshi ya kisonga kya kwa Debola kyajinga pakachi ka Lama+ ne Betele+ mu mpunzha ya mitumba ya bena Efelaimu; bena Isalela baiyanga konka kwi aye na kwibachibila mambo. 6 Watumine bakwita Balaka+ mwana wa kwa Abinoamu ku Kedeshi-nafitali+ ne kumwambila’mba: “Yehoba Lesa wa Isalela wakambizha’mba, ‘Yanga* ku Mutumba wa Tabola usende banabalume 10,000 ba mu mukoka wa bena Nafitali ne wa bena Zebuluna. 7 Amiwa nkamuleta Sisela kwi obewa, yenka mukulumpe wa nzhita ya kwa Yabina, pamo na makalaki anji a nkondo ne nzhita yanji ku kakola ka Kishonyi,+ kabiji nkamupana mu kuboko kobe.’”+

8 Ponkapo Balaka wamwambijile’mba: “Inge musakuya ne amiwa, ko kuba’mba nsakuya, bino inge mubule kuya ne amiwa, ne amiwa kechi ngyeko ne.” 9 Debola waambile’mba: “Nsakuya nobe. Pano bino, kintu kyo ubena kuya na kuba kechi kisakukulengela kutumbalala ne, mambo Yehoba usakupana Sisela mu kuboko kwa mwanamukazhi.”+ Kepo Debola aimene ne kuya ne Balaka ku Kedeshi.+ 10 Balaka waichile ba mu mukoka wa bena Zebuluna ne wa bena Nafitali+ kwiya ku Kedeshi, kabiji banabalume 10,000 bamulondejile. Ne Debola naye wayile nanji.

11 Kabiji Hebela mwina Keni wafumineko ku bena Keni,+ ba mu kisemi kya kwa Hobaba muko wa kwa Mosesa,+ kabiji wapopejile tente wanji kwipi na kichi kikatampe kiji mu Zaananimi, ku Kedeshi.

12 Sisela bamubuujile’mba Balaka mwana wa kwa Abinoamu waya ku Mutumba wa Tabola.+ 13 Ponkapo Sisela wakonkenye makalaki anji onse a nkondo, makalaki 900 ajinga na bikwakwa bya kyela* kya kapotwe ne bashilikale banji bonse bajinga ne aye kufuma ku Halosheta wa bisaka bya bantu ne kuya ku kakola ka Kishonyi.+ 14 Kepo Debola aambijile Balaka amba: “Imana, mambo jino jo juba Yehoba jo asakupana Sisela mu kuboko kobe. Nanchi Yehoba kechi watangilako kala kulutwe yobe nenyi?” Kabiji Balaka wakunkulukile ku Mutumba wa Tabola ne banabalume 10,000 saka bamulondela. 15 Kepo Yehoba avulañenye Sisela ne makalaki anji onse a nkondo ne nzhita+ yanji yonse kabiji wibatapile na mpoko ya kwa Balaka. Ne Sisela waikijilepo pa kalaki wanji ne kunyema lubilo panshi. 16 Balaka wapupijile makalaki a nkondo ne nzhita kufika ne ku Halosheta mwajinga bisaka bya bantu. Onkao mambo, nzhita yonse ya kwa Sisela beitapile na mpoko; kafwako muntu nangwa umo washajilepo ne.+

17 Bino Sisela wanyemene lubilo panshi kuya ku tente wa kwa Yaela+ muka Hebela+ mwina Keni, mambo baumvwañananga ne Yabina+ mfumu wa Hazola ne ba mu kisemi kya kwa Hebela mwina Keni. 18 Kepo Yaela alupukile ne kutundaila Sisela ne kumwambila’mba: “Nkambo yami, twelai, iyai mutwele muno. Kange muchine ne.” Ne aye watwelele mu tente wanji, kabiji uno mwanamukazhi wamuvwetele mwemba. 19 Kepo Sisela alombele mema a kutoma kwi aye amba: “Mwane mpepoi tumema twa kutoma, mambo nafwa kilaka.” Byonkabyo, washinkwile fukuta wa kiseba mwajinga mukaka ne kumupa amba atome,+ byo apwishishe kutoma wamuvwetele jibiji. 20 Kabiji waambijile uno mwanamukazhi amba: “Imanai ku kibelo kya tente, inge kwiye muntu ne kwimushikisha’mba, ‘Nanchi mujipo muntu momo nyi?’ Mukumbule’mba, ‘Ine!’”

21 Bino Yaela muka Hebela watolele lupopo wa ku tente ne kusenda sando mu kuboko kwanji. Sisela byo akijinga mu tulo twine kabiji saka akooka, uno mwanamukazhi waishile pachepache ko ajinga ne kumupopa lupopo mu mbaji ya mutwe kabiji wapulankene kufika ne panshi ne kufwa wafwile.+

22 Balaka wamupupijile Sisela konkakwa, kabiji Yaela walupukile ne kumutundaila ne kumwambila’mba: “Iyai nemumweshe muntu ye mubena kukeba.” Watwelele pamo ne aye, kabiji wamwene Sisela saka alaala wafwa, ne lupopo wa ku tente saka apulankana mu mbaji ya mutwe wanji.

23 Onkao mambo, pa joja juba Lesa washinjile Yabina mfumu wa Kenana ku meso a bena Isalela.+ 24 Bena Isalela balwile ne Yabina mfumu wa Kenana+ ne kumushinda, kufikatu ne byo bamwipayile Yabina mfumu wa Kenana.+