Kubala
13 Yehoba waambijile Mosesa amba: 2 “Tuma bantu ba kuya na kwendela* kyalo kya Kenana kyo mbena kupa bena Isalela. Mu mukoka umo umo ukatumemo muntu umo, yenka wafwainwa kwikala mukulumpe wabo.”+
3 Onkao mambo, Mosesa wibatumine kufuma mu kiselebwa kya Palana+ monka Yehoba mo amukambizhizhe. Banabalume bonse bajinga bakulumpe ba bena Isalela. 4 Ano o mazhina abo: mu mukoka wa bena Lubenyi, mwafumine Shamuwa mwana wa kwa Zakula; 5 mu mukoka wa bena Shimeona, mwafumine Shafwata mwana wa kwa Holi; 6 mu mukoka wa bena Yuda, mwafumine Kaleba+ mwana wa kwa Yefune; 7 mu mukoka wa bena Isakala, mwafumine Igala mwana wa kwa Yosefwa; 8 mu mukoka wa bena Efelaimu, mwafumine Hosheya+ mwana wa kwa Nuni; 9 mu mukoka wa bena Benjamina, mwafumine Palati mwana wa kwa Lafu; 10 mu mukoka wa bena Zebuluna, mwafumine Gadiela mwana wa kwa Sodi; 11 mu mukoka wa bena Yosefwa,+ ba mu mukoka wa bena Manase,+ mwafumine Gadi mwana wa kwa Susi; 12 mu mukoka wa bena Danyi, mwafumine Amiela mwana wa kwa Gemali; 13 mu mukoka wa bena Ashela, mwafumine Setula mwana wa kwa Mikela; 14 mu mukoka wa bena Nafitali, mwafumine Nabi mwana wa kwa Bofisi; 15 mu mukoka wa bena Gadi, mwafumine Gewela mwana wa kwa Machi. 16 Ano o ajinga mazhina a bantu Mosesa bo atumine kuya na kwendela kyalo. Kabiji Mosesa watumbile Hosheya mwana wa kwa Nuni amba Yoshua.*+
17 Mosesa byo atuminenga bano bantu kuya na kwendela kyalo kya Kenana, wibambijile’mba: “Tuntukai muye ku Negeba, ne kuya ku kyokya kyalo kya mitumba.+ 18 Mukamone kyokya kyalo byo kiji,+ ne kumona bantu bekalamo umvwe bakosa nangwa ne, umvwe bakepa nangwa bavula, 19 kabiji mukamone umvwe kyalo kyawama nangwa kyatama, umvwe bekala mu mizhi ya makampu nangwa mu masakwa. 20 Kabiji mukamone umvwe mushiji ujimo wafuka*+ nangwa ne,* umvwe muji bichi nangwa ne. Kabiji mukachinchike+ ne kusendamo bipangwa bya mu kyokya kyalo.” Akino kyajinga kimye kipilamo mañanzañanza atanshi.+
21 Byonkabyo, bayile na kwendela kyalo kufuma mu kiselebwa kya Zini+ ne kupita ku Lehoba+ ne kukafika ku Lebo-hamata.*+ 22 Byo bafikile ku Negeba, bayile ku Hebulona+ kwaikalanga Ahimanyi, Sheshai ne Talamai+ bena Anaki.+ Muzhi wa Hebulona bamushimikile myaka itanu na ibiji saka bakyangye kushimika muzhi wa Zowana wa mu Ijipita. 23 Byo bafikile ku Kimpachiko* kya Eshikola,+ batemene musampi wajinga na kizanze kimo kya mañanzañanza bantu babiji kyo basendele pa mubanda ne mapomegulanchi amo ne makuyu.+ 24 Batumbile yoya mpunzha amba Kimpachiko* kya Eshikola,*+ na mambo a kizanze kyatemene bena Isalela konkakwa.
25 Pa kupwa moba 40,+ babwelele kufuma ku kyalo kyo bayile na kwendela. 26 Byonkabyo, baishile kwi Mosesa ne Alona ne ku jibumba jonse ja bena Isalela mu kiselebwa kya Palana ku Kadeshi.+ Baletele sawakya ku jibumba jonse ne kwijimwesha bipangwa bya mu kyokya kyalo. 27 Abino byo byo bamubuujile Mosesa amba: “Twatwelele mu kyalo kyo mwitutumineko, kabiji kine ke kyalo kyavula mukaka ne buki,+ kabiji abino byo bipangwa bya mu kyokya kyalo.+ 28 Nangwa byonkabyo, bantu bekalamo bakosa ne mizhi yabo iji na masakwa akatampe. Kabiji twamwenemo ne bena Anaki.+ 29 Bena Amaleki+ bekala mu kyalo kya Negeba+ ne bena Hiti, bena Yebusi+ ne bena Amoli+ bo bekala mu kyalo kya mitumba, kabiji bena Kenana+ bekala ku kalunga ka mema+ konka ku musezho wa Yodano.”
30 Pakuba Kaleba waesekele kuzhindamikapo bantu baimene kwi Mosesa amba: “Twayai tutuntuke lonka luno, kabiji kine akya kyalo tukekitambula, mambo kine tukebashinda.”+ 31 Bino aba bantu bayile nanji baambile’mba: “Kechi twakonsha kulwa na bano bantu ne, mambo bakosa kwitukila.”+ 32 Batwajijile na kubuula bena Isalela sawakya watama+ pa mambo a kyalo kyo bayile na kwendela amba: “Akya kyalo kyo twayile na kwendela, ke kyalo kipaya bangikazhi bakyo, ne bantu bonse bo twamwene bo ba bitonzhi.+ 33 Kabiji twamweneko ne Banefile baana ba kwa Anaki+ basemenwe* ku Banefile, kabiji pa kwiesakanya kwi abo, atweba twamwekelengatu nobe batete.”