Ku Bena Tesalonika

1 Amiwa Paulo, Silivanusa*+ ne Timoti+ nji nabo kuno. Ino nkalata nanembela kipwilo kya bena Tesalonika mwi Lesa Tata ne mwi Nkambo Yesu Kilishitu:

Lusa lukatampe ne mutende bikale pe anweba.

2 Kimye kyonse tumusanchila Lesa byo twimutongola anweba bonse mu milombelo yetu,+ 3 mambo tuvuluka kimye kyonse mwingilo wenu umwesha lwitabilo, mwingilo ye mwingila na mambo a butemwe, ne kuchinchika kwenu na mambo a luketekelo lwenu+ mwi Nkambo yetu Yesu Kilishitu ku meso a Lesa wetu kabiji Tata. 4 Mambo twayuka kusalwa kwenu anweba balongo betu bo batemwa kwi Lesa, 5 na mambo a kuba mambo awama o tusapwila kechi aishile kwi anweba mu byambo byonka ne, bino aishile ne na bulume, na mupashi wazhila ne na kushiinwa kukatampe, byonkatu byo mwayuka byo twaikele ne anweba kuba’mba mumwenemo. 6 Kabiji mwaikele ke ba kwitulondela+ ne ba kulondela Nkambo,+ byo mwatambwile mambo a Lesa mu bya malwa byavula+ na lusekelo lupana mupashi wazhila, 7 kya kuba mwaikele ke ba kufunjilako bonse baitabila baji mu Makedonya ne mu Akaya.

8 Kishinka ke kya kuba’mba, byambo bya Yehoba* kechi byaumvwanyikatu mu Makedonya ne mu Akaya kufuma kwi anweba ne, bino ne mu mapunzha onse bantu baumvwa nkuwa ya lwitabilo lwenu mwi Lesa,+ kya kuba kechi twakonsha kwamba kintu nangwa kimo ne. 9 Mambo bantu mu ano mapunzha bashimikizhenga byo twimumwene kimye kitanshi ne byo mwaalukijile kwi Lesa ne kuvundamina ku bankishi+ kuba’mba mwikale ba kwingijila Lesa mumi kabiji wa kine, 10 ne kupembelela Mwananji kufuma mwiulu,+ yenka ye asangwile mu bafu, aye Yesu, witupokolola ku bukaji bwa Lesa bubena kwiya.+