Yoela
3 “Umvwai! mu oa moba ne mu kyokya kimye,
Byo nkabwezha bazha ba mu Yuda ne mu Yelusalema,+
2 Nkakonkanya pamo ne bisaka byonse bya bantu
Kabiji nkebitotolwesha konkakwa+
Kwimenako bantu bami ne Isalela buswanyi bwami,
Mambo bebapalañenyejile mu bisaka bya bantu,
Kabiji byaabene kyalo kyami.+
3 Batele bubale pa bantu bami;+
Bapimpwilenga kalombwana na pite
Ne kupotesha kashimbi amba bapote binyu bya kutoma.
4 Kabiji, ñanyi mfika yo muji nayo ne amiwa,
Obewa Tila ne Shidona ne bibunji byonse bya mu Filishitiya?
Nanchi paji kyo mubena kushinkenya ne amiwa nyi?
Inge mubena kushinkanya ne amiwa,
Nkapelawizha kushinkanya nenu.+
5 Mambo mwasenda siliva ne ngolode yami,+
Kabiji bya buneme byami byawamisha mwibibika mu mazubo a balesa benu;
6 Kabiji bena Yuda ne ba mu Yelusalema mwibapotesha ku Bangiliki,+
Pa kuba’mba mwibatwale kwalepa na nyaunda yabo;
7 Mbena kwibabwezha kufuma ku mpunzha ko mwibapoteshe,+
Kabiji kushinkanya ko mwaubile nkemubwezhezha.
8 Nkapotesha baana benu ba balume ne baana benu ba bakazhi ku bena Yuda,+
Ne abo bakebapotesha ku bena Sheba, kisaka kiji kwalepa;
Mambo amiwa Yehoba yami naamba kino.
9 Tayai mbila ku bisaka bya bantu+ amba:
‘Inengezhai* kulwa nkondo! Tundaikai banabalume bakosa!
Bashilikale bonse bafwenye pepi, bayengatu kulutwe!+
10 Bundai bya kujiminako bikale ke mapoko ne bya kukopwelako bichi ke mafumo.*
Wabula kukosa ambe’mba: “Amiwa nji na bulume.”
11 Anweba bisaka bya bantu biji konse konse, Iyai mukwashañane, konkanai pamo!’”+
Anweba Yehoba, twalai babiyangala* benu ku yoya mpunzha.
12 “Bisaka bya bantu bimane ne kwiya ku Kimpachiko kya kwa Yehoshafwata;
Mambo nkekala konkakwa na kuchibila mambo bisaka bya bantu byonse biji konse konse.+
13 Pishaimo kikwakwa, mambo kajo ka kunowa kapya.
Iyai munyantaulenga, mambo kya kufiinamo binyu kyayula.+
Bipe bya kulaminamo byayulatu tee, mambo bubi bwabo bwavula.
14 Mabumba ne mabumba ayula mu kimpachiko* kya kuchibilamo mambo,
Mambo juba ja Yehoba jafwenya pepi ja kuchibila mambo bantu mu kimpachiko.*+
15 Juba ne ñondo bikafiita,
Ne tubangabanga kechi tukasama ne.
16 Kabiji Yehoba ukabuluma mu Ziona,
Ukabijika na jiwi janji mu Yelusalema.
Kabiji jiulu ne ntanda bikasunkena;
Bino Yehoba ukekala kya kufyamamo bantu banji,+
Nsakwa yakosa ya bena Isalela.
17 Ne anweba mukayuka’mba amiwa yami Yehoba Lesa wenu, wikala mu Ziona, mutumba wami wazhila.+
18 Mu joja juba mu mitumba mukatupaukanga binyu byatobala,+
Mu tutumbatumba mukakonkolokanga mukaka,
Ne tukola tonse twa mu Yuda tukapitanga mema.
19 Bino Ijipita ukashalatu masala,+
Ne Edomu ukekalatu kiselebwa,+
Na mambo a bukapondo bo bebobile bena Yuda,+
Bonka bena kyalo mo baichijile mashi abula mambo.+
20 Bino mu Yuda mukekalanga bantu kikupu,
Ne mu Yelusalema namo bakekalangamo kufika ne ku bisemi bya kulutwe.+