Yelemiya
11 Yehoba waambile bino byambo kwi Yelemiya amba: 2 “Anweba bantu, umvwai byambo biji mu luno lulayañano!
“Wibyambe* ku banabalume ba mu Yuda ne ku bangikazhi ba mu Yelusalema 3 kabiji wibabuule’mba, ‘Yehoba Lesa wa Isalela waamba’mba: “Malwa anji awa muntu ubula kukookela byambo biji mu luno lulayañano,+ 4 byo nakambizhe bashakulu benu mu joja juba jo nebafumishe mu kyalo kya Ijipita,+ mu kisha kya mujilo kyo basungulwilamo kyela kya kapotwe,+ namba, ‘Kookelai byambo byami ne kuba byonse byo nemukambizhe; kabiji mukekala bantu bami ne amiwa nkekala Lesa wenu,+ 5 pa kuba’mba mfikizhe kintu kyo nachipile ku bashakulu benu, kya kwibapa kyalo muji mukaka ne buki,+ byonka byo kijitu ne lelo jino.’”’”
Kabiji amiwa namukumbwile’mba: “Amena,* anweba Yehoba.”
6 Kepo Yehoba añambijile’mba: “Sapwila bino byambo byonse mu mizhi ya mu Yuda ne mu mikwakwa ya mu Yelusalema amba: ‘Umvwai byambo biji mu luno lulayañano ne kwibikookela. 7 Mambo amiwa nakambizhenga bashakulu benu mu juba jo nebafumishe mu kyalo kya Ijipita kabiji kufikatu ne lelo jino, nebakambizha kimye kyonse* namba: “Kookelai byambo byami.”+ 8 Bino kechi baumvwine nangwa kuteleka ne; pakuba batwajijiletu kulondela bikeba michima yabo yatama.+ Onkao mambo, amiwa nebafikizhizhe byambo byonse bya luno lulayañano byo nebakambizhe kulondela, bino bakaine kwibikookela.’”
9 Kepo Yehoba añambijile jikwabo amba: “Bantu ba mu Yuda ne bangikazhi ba mu Yelusalema baumvwañana kuba’mba bansatukile. 10 Babwela ku byubilo byatama byaubanga bashakulu babo bakaine kukookela byambo byami.+ Ne abo baongolokela ku balesa bangi na kwibengijila.+ Ba mu kisaka kya Isalela ne kya Yuda bakana kulondela lulayañano lo nalayañene na bashakulu babo.+ 11 Onkao mambo, Yehoba waamba’mba, ‘Amiwa mbena kwibaletela bya malwa+ bya kukankalwa kunyema. Byo bakakebanga bukwasho kwi amiwa, kechi nkebateleka ne.+ 12 Kepo mizhi ya mu Yuda ne bangikazhi ba mu Yelusalema bakaya na kukeba bukwasho ku balesa bo bapanako bitapisho,*+ bino kechi bakebakwasha kimye kyo bakapitanga mu bya malwa ne. 13 Mambo anweba bena Yuda, balesa benu bavulatu byonka byavula mizhi yenu, kabiji nkishi wenu wa bunya* mwamushimikila bya kusokelapo bitapisho byavula byonka byavula mikwakwa ya mu Yelusalema, ko kuba’mba pa kusokela bitapisho bya kupana kwi Baela.’+
14 “Pakuba obewa* kechi wafwainwa kwibalombelako bano bantu ne. Kange wibajijileko nangwa kwibalombelako ne,+ mambo amiwa kechi nkebateleka kimye kyo bakankebanga na mambo a bya malwa byabo ne.
15 Ñanyi luusa mutemwe wami lo aji nalo lwa kwikala mu nzubo yami
Bantu bavula byo babena kulanguluka kuba bintu byatama?
Nanchi kutapisha banyama* kukebalengela kufyama inge bya malwa bimufikila nyi?
Nanchi mukasekela pa kyokya kimye nyi?
16 Kala Yehoba wakutelele’mba kichi kya maolivi,
Kyatenkuma kipanga bipangwa byawama.
Na kululuma kukatampe kwa mujilo, aye wamusoka,
Kabiji bachimauna misampi yakyo.
17 “Yehoba wa mabumba, yenka Wakujimbile,+ wafuukulapo kukuletela bya malwa na mambo a bubi bwaubile ba mu kisaka kya Isalela ne ba mu kisaka kya Yuda, banzhingijisha na mambo a kutapisha bitapisho kwi Baela.”+
18 Yehoba wambuujile kuba’mba ngyuke;
Pa kyokya kimye, anweba Lesa mwandengejile kumona bintu byo baubilenga.
19 Najinga nobe mwana mukooko ye babena kutwala kishinshi na kwipaya.
Kechi nayukile’mba babena kuñumvwañena kuba’mba:+
“Twayai tonaune kichi ne bipangwa byakyo,
Kabiji twayai tumufumyemo mu kyalo muji bantu bomi,
Pa kuba’mba jizhina janji bakabule kwijivulukapo jibiji.”
20 Bino aye Yehoba wa mabumba uchiba mambo monka mo aolokela;
Ukebakeba ne kuyuka biji milanguluko ya mukachi mwine* ne mu muchima.+
Nswishai mmone byo mukashinkanya nabo,
Mambo amiwa naleta mambo ami kwi anweba.
21 Onkao mambo, Yehoba waamba pa bantu ba mu Anatota+ babena kukeba konauna bumi* bobe kabiji babena kwamba’mba: “Kange waule mu jizhina ja Yehoba ne,+ mambo inge ne, tusakukwipaya”; 22 onkao mambo, Yehoba wa mabumba waamba’mba: “Amiwa nkebazhachisha. Bansongwalume bakafwa ku mpoko,+ kabiji baana babo ba balume ne baana babo ba bakazhi bakafwa ku kipowe kya nzala.+ 23 Mwi abo kafwamo nangwa umo ukashalamo ne, mambo nkaleta bya malwa pa bantu ba mu Anatota+ mu mwaka yenka ye nkebazhachishishamo.”