Ezikyo

10 Byo natajilenga, namwene kintu kyajinga peulu ya bakelubi kyajinga nobe jibwe ja safila, kabiji peulu yakyo pajinga kyamwekelenga nobe jitanda.+ 2 Ponkapo waambijile muntu wavwajile kisapi kya linenyi+ amba: “Twela pakachi ka bitanga+ mukachi ka bakelubi kabiji uyuzhe mu maboko obe makala a mujilo+ aji pakachi ka bakelubi ne kwiechila mu muzhi.”+ Ne aye watwelele saka namumona.

3 Awa muntu byo atwelelenga, bakelubi baimene ku kilujo kya nzubo ne jikumbi javwetele kipango kya mukachi. 4 Kabiji lukumo lwa Yehoba+ lwafumine pa bakelubi ne kuya ku kibelo kya nzubo, ne jikumbi javwetele nzubo+ ne kusama kwa lukumo lwa Yehoba kwakumbene mu kipango. 5 Kabiji kubakama kwa byapi bya bakelubi kwaumvwanyikilenga ne pangye ya kipango nobe jiwi ja Lesa wa Bulume Bonse umvwe ubena kwamba.+

6 Kepo aambijile muntu wavwajile kisapi kya linenyi amba: “Shikula mujilo uji pakachi ka bitanga bibena kuzhokoloka ne pakachi ka bakelubi,” ne aye watwelele ne kwimana kwipi na kitanga. 7 Kabiji kelubi umo watanyikijile kuboko kwanji ku mujilo wajinga pakachi ka bakelubi.+ Waapwilepo mujilo ne kumubika mu maboko a muntu wavwajile kisapi kya linenyi,+ ne aye watambwile kabiji walupukile. 8 Bakelubi bajinga na bintu byamwekelenga nobe maboko a bantu munshi ya byapi byabo.+

9 Byo natajilenga, namwene bitanga bina kwipi na bakelubi, kitanga kimo kyajinga kwipi na kelubi umo umo, ne bino bitanga byabembejilenga nobe jibwe ja kisolite.+ 10 Abino byonse bina bipashishe, kitanga kimo kimo kyamwekelenga nobe kipika mu kitanga kikwabo. 11 Pa kwenda, byayilengatu konse ku makonka ana kwa kubula kwaluluka, mambo byayilenga konse konse ko byatalanga kwa kubula kwaluluka. 12 Bano bakelubi bajinga na mibiji, nyuma, maboko ne byapi kabiji ku bitanga byonse bina kwazhokolokele meso.+ 13 Naumvwine muntu wabijikilenga kwi abyo amba, “Bitanga zhokolokainga!”

14 Bakelubi bonse* bajinga na bilungi bina. Kilungi kitanshi kyajinga kya kelubi, kya bubiji kyajinga kya muntu, kya busatu kyajinga kya bokwe ne kilungi kya buna kyajinga kya mpungu.+

15 Bakelubi byo batumbukile kuya peulu, bajinga bilengwa* byumi byonka byo namwene ku mukola wa Keba.+ 16 Kabiji inge bakelubi kebende ne bitanga nabyo bibalondejilenga. Umvwe bakelubi basuntula byapi byabo mwiulu, bitanga kechi byaalulukilenga nangwa kufuma po biji ne.+ 17 Kabiji umvwe baimana ne bitanga nabyo byaimenenga; inge batumbuka kuya peulu, bitanga nabyo byayijilenga nabo pamo, mambo mupashi wakwashanga bilengwa* byumi, wajinga ne mu bitanga.

18 Ponkapo lukumo lwa Yehoba+ lwafumine ku kibelo kya nzubo ya Lesa ne kuya peulu ya bakelubi.+ 19 Kepo bakelubi basuntwile byapi byabo ne kutumbuka kuya peulu saka nebamona. Bitanga nabyo bibalondejilenga. Kabiji baimene ku kibelo kya ku musela kya nzubo ya Yehoba ne lukumo lwa Lesa wa Isalela lwajinga peulu yabo.+

20 Abino byajinga bilengwa* byumi byo namwene munshi ya jitanda ja Lesa wa Isalela ku mukola wa Keba,+ kabiji nayukile’mba bajinga bakelubi. 21 Bakelubi bonse bana bajinga na bilungi bina, byapi bina kabiji bajinga ne na bintu byamwekelenga nobe maboko a muntu munshi ya byapi byabo.+ 22 Kabiji bilungi byabo byajinga nobe bilungi byo namwene ku mukola wa Keba.+ Bonse bayilengatu kulutwe.+