Kulupuka
15 Pa kyonkakya kimye, Mosesa ne bena Isalela baimbile uno lwimbo wa kutota Yehoba amba:+
“Namwimbile Yehoba, mambo aye watumbalala bingi.+
Mbili ne wendapo bebataya mu kalunga ka mema.+
2 Yehoba bo bulume bwami kabiji yo ngovu yami, mambo lo lupulukilo lwami.+
Uno ye Lesa wami kabiji nkamutotanga;+ Lesa wa batata,+ kabiji nkamutumbijikanga.+
3 Yehoba ye wa bulume mu nkondo.+ Yehoba jo jizhina+ janji.
4 Makalaki a kwa Felo ne nzhita yanji wibitaya mu kalunga ka mema,+
Kabiji bashilikale banji bebalobesha mu Kalunga ka Mema Kachila.+
5 Mpoota ya mema ibebizha; baibijile mwine mwazhika nobe jibwe.+
6 Anweba Yehoba, kuboko kwenu kwa kilujo ko kwa bulume bukatampe;+
Anweba Yehoba, kuboko kwenu kwa kilujo kwakonsha kusansakanya mulwanyi.
7 Mu bulume bwenu bukatampe mwakonsha kuponesha aba bemwimena;+
Mutuma bukaji bwenu buteema, kabiji bwibasoka nobe nsono.
8 Mema beakonkenye pamo ku muya wa mu myona yenu;
Aimene ne kuleka kupita;
Mpoota ya mema yachimbile pakachi ka kalunga ka mema.
9 Mulwanyi waambile’mba: ‘Nsakwibapupila! Kabiji nsakwibataana!
Nsakwabanya bipukulwa kufikatu ne byo nsakutondwa!*
Nsakusomona mpoko yami! Kuboko kwami kusakwibonauna!’+
10 Mwapuyile muya wenu, kabiji kalunga ka mema kebebizhizhe;+
Balobele nobe kyumbu mu mema a bulume bukatampe.
11 Ñanyi mu balesa waesakana ne anweba Yehoba?+
Ñanyi uji nobe anweba, mumwesha bulume mu buzhile bwenu?+
Anweba bo bafwainwa kwakamwa na nyimbo ya kutota, anweba muba bya kukumya.+
12 Mwatanyikile kuboko kwenu kwa kilujo kabiji ntanda ibamiine.+
13 Mu butemwe bwenu bubula kwaluka, mwatangijila bantu benu bo mwakuula;+
Mu bulume bwenu mwibatangijila ku mpunzha yenu yazhila ya kwikalamo.
15 Pa kyonkakya kimye, bamfumu* ba mu Edomu bakooba bingi moyo;
Kabiji moyo ukakwata bantangi ba bulume ba mu Moabu.+
Bangikazhi bonse ba mu Kenana bakazumba.+
16 Moyo ne kwakamwa bikebafikila.+
Na mambo a bulume bwa kuboko kwenu, bakemanatu nobe jibwe,
Kufikatu ne bantu benu byo bakapita, anweba Yehoba,
17 Mukebaleta ne kwibajimba mu mutumba wa buswanyi bwenu,+
Mpunzha yo mwanengezha kwikalamo anwe bene, anweba Yehoba,
Nzubo yazhila, anweba Yehoba, yo mwaikajikile na maboko enu.
18 Yehoba ukekala mfumu myaka ne myaka.+
19 Bambili ba kwa Felo ne makalaki anji a nkondo ne bantu banji benda pa bambili byo batwelele mu kalunga ka mema,+
Yehoba wabwezhezhe mema a mu kalunga ka mema pe abo,+
Bino bena Isalela baendele pa mushiji wauma pakachi ka kalunga ka mema.”+
20 Kepo Milyama ngauzhi wa mukazhi nyenga ya kwa Alona atolele munsakayi, kabiji banabakazhi bonse bamulondejile na minsakayi saka bazha. 21 Kabiji Milyama wawelejile pamo na banabalume amba:
“Mwimbilai Yehoba, mambo aye watumbalala bingi.+
Mbili ne wendapo bebataya mu kalunga ka mema.”+
22 Byonkabyo, Mosesa wafumishe bena Isalela ku Kalunga ka Mema Kachila, ne kuya mu kiselebwa kya Shula kabiji baendele mu kiselebwa pa moba asatu, bino kechi bataaine mema ne. 23 Bafikile ku Mala,*+ bino kechi bakonsheshe kutoma mema a ku Mala ne, mambo alujile. O ene mambo o atumbijile yoya mpunzha amba Mala. 24 Onkao mambo, bantu batendekele kunyinyita Mosesa+ amba: “Pano tusakutoma ka?” 25 Kepo ajijile kwi Yehoba,+ ne Yehoba wamumwesheshe kakichi. Byo ekatayile mu mema, mema atobele.
Konka kuno Lesa koko ebapelejile jilamuna ne muzhilo, kabiji konka kuno koko ebesekejile.+ 26 Waambile’mba: “Umvwe kine mukomvwine jiwi jami amiwa Yehoba Lesa wenu ne kuba byaoloka ku meso ami ne kuta muchima ku mikambizho yami ne kulama malamuna ami onse,+ kechi nkemuletela myalo yo naletejilepo bena Ijipita+ ne, mambo amiwa Yehoba, yami mbena kwimubuka.”+
27 Kepo bayile ku Elimu kwajinga masulo a mema 12 ne bisonga 70. Onkao mambo, batebelejile konkakwa kwipi na mema.