Nkalata ya Bubiji ku Bena Kolinda
10 Amiwa Paulo nemusashijila na kukooka muchima ne na lusa lwa Kilishitu,+ yenka amiwa ye mumona nobe nakooka inge nji nenu,+ pakuba inge nji kungi mummona nobe muntu wamba kipasu.+ 2 Naketekela kuba’mba umvwe nkekale nenu, kechi nkakambula aba betumona’mba twenda mu buntunshi ne. 3 Mambo nangwa twenda mu buntunshi, kechi tulwa nkondo mwayila byo tuji ku mubiji ne. 4 Mambo bilwilo byetu bya nkondo kechi byo bya buntunshi ne,+ bino ke byobya bya bulume bwa Lesa+ bya kukundwilako bintu byakosa. 5 Mambo tubena kufumyapo milanguluko yatama ya bantu ne bintu byonse bilengela bantu kubula kuyuka Lesa,+ kabiji tubena kushinda milanguluko yonse yatama kuba’mba ikookele Kilishitu; 6 kabiji twinengezha kukambula muntu yense wa milengulwila,+ kufikatu ne kimye kyo mukamwesha’mba muji na lukookelo.
7 Anweba muchibila bintu mambo monka mwayila mwekelo yabyo. Umvwe muntu wiketekela’mba ne wa kwa Kilishitu amweshe kino: Byonkatu byo aji wa kwa Kilishitu, ne atweba byo byo tuji. 8 Mambo nangwa kya kuba netota javula pa mambo a luusa lo etupele Nkambo lwa kwimukomesha, kechi lwa kwimutozha ne,+ kino kechi kyakonsha kundengesha bumvu ne. 9 Bino kechi mbena kukeba mumone nobe mbena kwimulengesha moyo na makalata ami ne. 10 Mambo abo bamba’mba: “Makalata anji anema kabiji aji na bulume, bino umvwe uji ne atweba umweka kukooka kabiji byambo byanji kechi byumvwanyika ne.” 11 Muntu wa uno mutundu ayuke kino kuba’mba byo twamba mu makalata umvwe tufwako, byo byo tukoba umvwe twaikala konka.+ 12 Mambo atweba kechi twibika pa kipimo kimo nangwa kwiesakanya na bantu batemwa kwilumbulula abo bene ne.+ Bino inge beesakanya bene na bene ne kwipima bene na bene, kafwako kyo bakwatakanyapo ne.+
13 Nangwa byonkabyo, atweba kechi tuketotela pangye ya mipaka yetu ne, bino tuketotela mukachi ka mipaka ya nyaunda itupa Lesa, yonka yafika ne kwi anweba.+ 14 Atweba kechi tubena kupitaila po twafwainwa kupelela uba nobe kechi twafikile kwi anweba ne, mambo yetu twajinga batanshi kwimusapwila mambo awama aamba pe Kilishitu.+ 15 Atweba kechi tubena kwitotela pangye ya mipaka yetu pa mingilo ya muntu mukwabo ne, bino twaketekela’mba lwitabilo lwenu byo lukayanga na kukoma, akya kyo twaubile kikayenga na kukomenako mukachi ka nyaunda yetu. Kepo tukayilangakotu palutwe, 16 kuba’mba tukasapwile mambo awama mu byalo biji kwalepa kukilayila anweba, kuba’mba tukabuule kwitotela mu mingilo yo baingila mu nyaunda ya muntu ungi. 17 “Bino awa witota, etotele mwi Yehoba.”*+ 18 Mambo awa wilumbulula mwine kechi ye waitabilwa ne,+ bino kana yewa ye balumbulula kwi Yehoba.*+