Ezikyo
9 Kabiji wambijikile ne kuñambila’mba: “Ita bantu basakonauna muzhi kabiji bonse pa muntu pa muntu basende kya kwipayañenako!”
2 Namwene banabalume batanu na umo saka balupukila ku kibelo kya peulu kyatala+ ku kabeta ka ku buyeke, kabiji bonse pa muntu pa muntu basendele kya kwipayañenako mu maboko abo. Pajinga ne mwanamulume umo wavwajile kisapi kya linenyi saka akasa mu lubunda wanji fukuta mwajinga bya kunembako* munembeshi, kabiji batwelele ne kwimana ku kya kusokelapo bitapisho kya mukuba.+
3 Kabiji lukumo lwa Lesa wa Isalela+ lwafuminepo pa bakelubi ne kwikala pa kibelo kya nzubo ya Lesa+ ne kutatula kwita mwanamulume wavwajile kisapi kya linenyi wakashile mu lubunda wanji fukuta mwajinga bya kunembako. 4 Yehoba wamwambijile’mba: “Yanga mu muzhi wa Yelusalema ukabike tuyukilo pa bilungi bya bantu baji na bulanda, babena kubinza+ na mambo a bya bunya bibena kubiwa mu muzhi.”+
5 Kabiji naumvwine Lesa saka ambila banabalume bakwabo amba: “Yainga mu muzhi mumulondele ne kwipaya bantu. Kange mwibobile lusa nangwa kifyele ne.+ 6 Mwafwainwa kwipaya bonse banabalume bakulumpe, bansongwalume, bakamwale, baana babacheche ne banabakazhi kwa kubula kushapo nangwa umo ne.+ Bino kange mwipaye muntu uji na kayukilo ne.+ Mwafwainwa kwibepaya kutendekela pa nzubo yami yazhila.”+ Onkao mambo, batatwijilepo kwipaya bakulumpe bajinga kulutwe ya nzubo ya Lesa.+ 7 Kabiji Lesa wibambijile’mba: “Zhilululai nzubo ne kuyuzha bipango na bantu bo mwaipaya.+ Yainga!” Ne abo bayile na kwipaya bantu mu muzhi.
8 Byo bebepayilenga, yami yenka nashajilepotu kabiji naponene panshi kinkuvumene ne kubijika amba: “Anweba Nkambo Mfumu Yehoba! Nanchi musakwipaya bena Isalela bonse bashalapo byo mwazhingijila Yelusalema nyi?”+
9 Ponkapo aye wankumbwile’mba: “Bubi bwa bena Isalela ne bena Yuda bwabayisha.+ Mu kyalo muji kwichila mashi+ kabiji muzhi wakumbana mazhikakanwa.+ Mambo abo babena kwamba’mba, ‘Yehoba kechi watako muchima ku kino kyalo ne, kabiji amba Yehoba kechi ubena kumona ne.’+ 10 Pakuba amiwa, kechi nkebobila lusa; nangwa kifyele ne.+ Nkebakambula monka mwayila byubilo byabo byatama.”
11 Kepo namwene mwanamulume wavwajile kisapi kya linenyi saka akasa mu lubunda wanji fukuta mwajinga bya kunembako, kabiji wabwezhezhe sawakya wa kuba’mba: “Nauba bintu byonkatu byo mwankambizhe.”