Yelemiya

37 Kabiji Mfumu Zedekiya+ mwana wa kwa Yosiya waswaine Koniya*+ mwana wa kwa Yehoyakimu, mambo a kuba Nebukaneza Mfumu wa Babilona wamubikile pa bufumu mu kyalo kya Yuda.+ 2 Pano bino, aye, bakalume banji ne bantu ba mu kyalo kya Yuda kechi baumvwijile byaambile Yehoba mwi ngauzhi Yelemiya ne.

3 Kabiji Mfumu Zedekiya watumine Yehukale+ mwana wa kwa Shelemiya ne Zefwaniya+ mwana wa kwa Maaseya ñanga kuya kwi ngauzhi Yelemiya na kumwambila’mba: “Tulombelaiko kwi Yehoba Lesa wetu.” 4 Yelemiya waendanga saka akasuluka mambo pa kikye kimye saka bakyangye kumukasa.+ 5 Pa kyokya kimye, bashilikale ba kwa Felo saka bafuma kala mu Ijipita+ ne bena Kalodeya balukukile Yelusalema baumvwine nkuwa yabo. Onkao mambo, bekilekele kutula bulemo Yelusalema.+ 6 Ponkapo Yehoba waambijile ngauzhi Yelemiya amba: 7 “Yehoba Lesa wa Isalela waamba’mba, ‘Ukabuule mfumu wa bena Yuda wakutumine kwiya kwi amiwa na kungipuzha’mba: “Umvwa! Bashilikale ba kwa Felo bonka baishilenga na kukukwasha bakabwela ku kyalo kyabo kya Ijipita.+ 8 Kabiji bena Kalodeya bakabwela na kulukuka uno muzhi, kumushinda ne kumusoka.”+ 9 Yehoba waamba’mba, “Kange mwijimbaike anwe bene* amba, ‘Bena Kalodeya baleka kwitulukuka ne,’ mambo kechi bekileka ne. 10 Nangwatu umvwe mwaonawine bashilikale bonse ba bena Kalodeya bo mwalwilenga nabo kya kuba mwashalatu banabalume bo bakozha kwapwa, bonkabo bakemana jibiji kufuma mu matente abo ne kusoka uno muzhi.”’”+

11 Bashilikale ba bena Kalodeya byo bekilekele kulukuka Yelusalema na mambo a bashilikale ba kwa Felo,+ 12 Yelemiya wafumine mu Yelusalema kuya ku kyalo kya Benjamina+ na kutambula mpunzha mu balongo banji. 13 Pano bino, byo afikile ku Kibelo kya Benjamina, mukulumpe wa bakasopa wa jizhina ja Iliya mwana wa kwa Shelemiya, Shelemiya mwana wa kwa Hananiya wakwachile ngauzhi Yelemiya ne kumwambila’mba: “Obewa ubena kuya ku bena Kalodeya!” 14 Pakuba Yelemiya wakaine’mba: “Ine, amiwa kechi mbena kuya ku bena Kalodeya ne.” Bino Iliya kechi waswile byo aambile ne. Onkao mambo, Iliya wakwachile Yelemiya ne kumutwala ku babinemanga. 15 Babinemanga bamuzhingijile bingi Yelemiya,+ bamupumine ne kumukashila*+ mu nzubo ya kwa Yehonafwanyi munembeshi yo baalwile ke kaleya. 16 Yelemiya bamubikile mu kaleya* ka panshi mu tuzubo twafinankana kabiji waikelemo moba avula.

17 Ponkapo Mfumu Zedekiya watumine bantu ba kuya na kumuleta kwi aye, kabiji mfumu mu bufyamfya wamushikishe mu nzubo* yanji.+ Wamushikishe’mba, “Abya kujipo byambo byakubuula Yehoba nyi?” Yelemiya wamukumbwile’mba, “Ee mwane kobiji,” kabiji wamwambijile’mba, “Anweba bakemupana mu kuboko kwa mfumu wa Babilona!”+

18 Kabiji Yelemiya washikishe Mfumu Zedekiya amba: “Ñanyi mambo o nemuleenga anweba, bakalume benu ne bano bantu o mwantayila mu kaleya? 19 Pano bangauzhi benu bemwawijilenga amba, ‘Mfumu wa Babilona kechi ukemulukuka ne kwimwangata kino kyalo ne, baji pi’?+ 20 Pano umvwai! Nemusashijila anweba nkambo mfumu. Napopwela nkwashai. Kange mumbwezhe ku nzubo ya kwa Yehonafwanyi+ munembeshi ne, mambo inge mbweleko nkafwila konkakwa.”+ 21 Onkao mambo, Mfumu Zedekiya wakambizhe’mba Yelemiya bamukashile mu Kipango kya kwa Kasopa,+ kabiji pa juba pa juba bamupelenga shinkwa wanzhingwile wafuminenga ku mukwakwa wa bantu baoshanga shinkwa,+ kufikatu ne shinkwa yense byo apwile mu muzhi.+ Kabiji Yelemiya watwajijile kwikala mu Kipango kya kwa Kasopa.