Ezikyo

36 “Pakuba obewa mwana muntu, aula pa mambo a mitumba ya Isalela ne kwiyambila’mba, ‘Anweba mitumba ya Isalela, umvwai byaamba Yehoba. 2 Nkambo Mfumu Yehoba waamba’mba: “Balwanyi benu baamba pe anweba amba, ‘Talai! Mapunzha a kala atuntama aikala ke etu!’”’+

3 “Onkao mambo, aula ne kwibabuula’mba, ‘Nkambo Mfumu Yehoba waamba’mba: “Na mambo a kuba bemushatu masala ne kwimulukuka mu mapunzha monse kuba’mba mukekale kya buswanyi kya bantu bakapuluka* ba mu bisaka bya bantu, ne na mambo a kuba bantu babena kwamba pe anweba ne kwimunena,+ 4 onkao mambo, anweba mitumba ya Isalela, umvwai byaamba Nkambo Mfumu Yehoba! Nkambo Mfumu Yehoba waambila mitumba, tutumbatumba, mikola, bimpachiko, mizhi yo baonawine+ ne mizhi mwabula bantu yo bapukwile ne kwiyendeleka ku bantu bapulukile, ba mu bisaka bya bantu bibazhokolokele;+ 5 pa mambo a bino bintu, Nkambo Mfumu Yehoba waamba’mba: ‘Na bukaji bwami buteema nobe mujilo,+ nkakajipila bantu bapulukile ba mu bisaka bya bantu ne bena Edomu bonse, bonka basangalele bingi ne kwamba mwenga*+ byo batambwile kyalo kyami kwikala ke kyabo ne kwangata mapunzha mwajinga munyemvu ne kupukula bintu byajingamo.’”’+

6 “Onkao mambo, aula pa mambo a kyalo kya Isalela ne kwambila mitumba, tutumbatumba, mikola ne bimpachiko amba, ‘Nkambo Mfumu Yehoba waamba’mba: “Umvwai! Nkamba saka nazhingila, na mambo a kwimulengulula ku ba mu bisaka bya bantu.”’+

7 “Byonkabyo, Nkambo Mfumu Yehoba waamba’mba: ‘Nachipa namba bisaka bya bantu bibazhokoloka bikelengesha bumvu abyo bine.+ 8 Pano bino, anweba mitumba ya Isalela mukekala na misampi ne kupanga bipangwa bya kuja bantu bami bena Isalela,+ mambo katatakatu bakabwele. 9 Mambo amiwa nji nenu kabiji nkabwela kwi anweba, kabiji mukekala bujimi bo bakajima ne kubyalamo nkunwa. 10 Nkavuzha bantu benu, ko kuba’mba kisaka kyonse kya Isalela kabiji mu mizhi mukekala bantu+ ne kushimukulula mapunzha aonaikile.+ 11 Kine, nkavuzha bantu benu ne banyama ba kulela;+ bakavula ne kusemununa. Nkalengela bantu kwikala mwi anweba byonkatu byo baikalanga kala+ ne kwimulengela kwikala na bintu byavula kukila byo mwajinga nabyo kala;+ kabiji po po mukayuka’mba amiwa yami Yehoba.+ 12 Nkalengela bantu, ko kuba’mba bantu bami bena Isalela kupitañana mwi anweba, kabiji bakemukwata kwikala bantu babo.+ Mukekala kya buswanyi kyabo, kabiji kechi mukebalengelapo jibiji kubula kwikala na baana ne.’”+

13 “Nkambo Mfumu Yehoba waamba’mba: ‘Na mambo a kuba babena kwimwambila’mba, “Anweba mwi kyalo kija bantu ne kulengela bisaka byenu kufwisha baana,”’ 14 ‘onkao mambo, kechi mukajapo bantu jibiji ne kulengela bisaka byenu kubula kwikala na baana ne,’ byo byaamba Nkambo Mfumu Yehoba. 15 ‘Kechi nkaswisha bisaka bya bantu kwimwambila mwenga nangwa kwimwendeleka ku bantu ne,+ kabiji kechi mukalengela bantu ba mu bisaka byenu kwituntula ne,’ byo byaamba Nkambo Mfumu Yehoba.”

16 Kabiji Yehoba wañambijile jikwabo amba: 17 “Obewa mwana muntu, bena Isalela byo baikelenga mu kyalo kyabo, bekitamishe na mashinda abo ne byubilo byabo byatama.+ Byubilo byabo byatama byajinga kwi amiwa nobe mwanamukazhi uji ku mwenzhi.+ 18 Onkao mambo, nebazhingijile na mambo a mashi o baichijile mu kyalo,+ kabiji balengejile kyalo kutama na mambo a bankishi* babo ba bunya.+ 19 Onkao mambo, nebapalañenyejile mu bisaka bya bantu ne mu byalo bingi.+ Kabiji nebachibijile mambo monka mwayijile mashinda abo ne byubilo byabo. 20 Pano bino, byo bayile mu byobya bisaka bya bantu, bazhilulwile jizhina jami jazhila+ saka bebambila’mba, ‘Abano bo bantu ba Yehoba, bino bafuminemo mu kyalo kyanji.’ 21 Onkao mambo, amiwa nkazhijika jizhina jami jazhila jo bazhilulwile bena Isalela mu bisaka bya bantu mo bayile.”+

22 “Onkao mambo, buula kisaka kya Isalela amba, ‘Nkambo Mfumu Yehoba waamba’mba: “Anweba bena Isalela, kechi nauba bino na mambo a anweba ne, bino amiwa nauba bino na mambo a jizhina jami jazhila jo mwazhilulwile mu bisaka bya bantu mo mwayile.”’+ 23 Nkambo Mfumu Yehoba waamba’mba, ‘Amiwa nkazhijika jizhina jami jazhila+ jo mwazhilulwile mu bisaka bya bantu, jonka jo mwapelwile mwi abo; kabiji bisaka bya bantu po po bikayuka’mba amiwa yami Yehoba+ byo nkatumbijika jizhina jami ku meso abo. 24 Amiwa nkemufumya mu bisaka bya bantu ne kwimukonkanya pamo kufuma mu byalo byonse, kabiji nkemubwezha mu kyalo kyenu.+ 25 Nkemusansa mema atoka, ne anweba mukatoka;+ nkemutokesha ku byubilo byenu byonse byatama+ ne ku bankishi benu bonse ba bunya.+ 26 Nkemupa muchima mupya+ ne kwimulengela kwikala na mupashi mupya.+ Nkafumyamo mwi anweba muchima wakosa nobe jibwe+ ne kwimupa muchima wakooka.* 27 Nkabika mupashi wami mwi anweba ne kwimulengela kwenda mu malamuna ami,+ kabiji mukalamanga mikambizho yami ne kwiyuba. 28 Kepo mukekala mu kyalo kyo napele bashakulu benu kabiji anweba mukekala bantu bami, ne amiwa nkekala Lesa wenu.’+

29 “‘Nkemupokolola ku bintu byenu byonse byatama kabiji nkakambizha mushiji kumenesha kajo kavula, kabiji kechi nkemuletela kipowe kya nzala ne.+ 30 Nkalengela bichi kupanga bipangwa ne kuvuzha kajo ka mu majimi, kuba’mba bisaka bya bantu bikabule kwimusekapo jibiji na mambo a kipowe kya nzala.+ 31 Kepo mukavuluka mashinda ne byubilo byenu byatama, kabiji kikemukola bingi ku muchima na mambo a bubi bwenu ne byubilo byenu bya bunya.+ 32 Pano bino, yukai kino amba: Nkambo Mfumu Yehoba waamba’mba, ‘Kechi mbena kuba bino na mambo a anweba ne.+ Bino mbena kuba bino namba anweba bena Isalela kimulenge bumvu ne kwimukola ku muchima na mambo a mashinda enu atama.’

33 “Nkambo Mfumu Yehoba waamba’mba: ‘Mu joja juba jo nkemutokesha ku bubi bwenu bonse, nkekazha bantu mu mizhi yenu+ ne kushimukulula mapunzha aonaikile.+ 34 Kyalo kyo baonawine, bantu bapitangamo kyo bamonanga’mba masala, bakajimamo. 35 Kabiji bantu bakamba’mba: “Talai! kyalo kyajingatu masala, lelo jino kiji nobe bujimi bwa Edena,+ ne mizhi yo baonawine yashajiletu masala ne kwiikundula, lelo jino iji na nsakwa kabiji mubena kwikala bantu.”+ 36 Bisaka bya bantu bikashala saka byakuzhokoloka, bikayuka’mba amiwa Yehoba yami nashimukulula mizhi yakundaukile, kabiji yami nabyalamo bintu mu kyalo kyashajiletu masala. Amiwa Yehoba yami naamba, kabiji nkekyuba.’+

37 “Nkambo Mfumu Yehoba waamba’mba: ‘Kisaka kya Isalela nakyo nkekiswisha kuñambila’mba nekyubile bino bintu: Nkavuzha bantu babo nobe matanga a mikooko. 38 Byonkatu byavujile bantu bazhila ne byonkatu byavulanga mikooko mu Yelusalema* mu kimye kya bijiilo,+ ne mizhi yo baonawine byo byo ikayula bantu;+ kabiji po po bakayuka’mba amiwa yami Yehoba.’”