Buku Mutanshi wa Bamfumu

14 Pa kyo kya kimye Abiya mwana wa kwa Yeloboma wakolelwe. 2 Onkao mambo, Yeloboma waambijile mukazhanji amba: “Napopwela, imana wialule kuba’mba babule kukuyuka’mba wi muka Yeloboma ne kuya ku Shilo. Ko kuji ngauzhi Ahiya. Ye wañambijile’mba nkekala mfumu wa bano bantu.+ 3 Usende bashinkwa jikumi, ne makeke, ne mulondo wa buki, uye kwi aye. Aye usakukubuula kisakumwekela uno mwana.”

4 Muka Yeloboma waubile byonka byo amwambijile. Waimene ne kuya ku Shilo+ ne kufika ku nzubo ya kwa Ahiya. Meso a kwa Ahiya atajilengatu kulutwe, kabiji kechi wamwenenga ne, mambo wakotele.

5 Bino Yehoba wabuujile Ahiya amba: “Muka Yeloboma ubena kwiya na kwipuzha pa mambo a mwananji wakolwa. Nsakukubuula byo usakumukumbula.* Byo asakufika, usakwifya.”

6 Ahiya byo aumvwinetu mituutu ya mwanamukazhi watwelelenga pa kibelo, wamwambijile’mba: “Anweba ba muka Yeloboma twelai. Mambo ka o mubena kwifila? Bañambila kwimubuula byambo byatama. 7 Yainga mukabuule ba Yeloboma amba, ‘Abino byo byaamba Yehoba Lesa wa Isalela amba: “Amiwa nakusajile mu bantu bobe kuba’mba wikale ntangi wa bantu bami bena Isalela.+ 8 Kabiji naangachileko bufumu ku nzubo ya kwa Davida ne kwibupana kwi obewa.+ Bino obewa kechi uji nobe kalume wami Davida, yenka walaminenga mikambizho yami ne kundondela na muchima wanji yense, saka oba byaoloka ku meso ami ne.+ 9 Bino obewa wauba bintu byatama kukila ne bonse bajingako kala, kabiji wilengela lesa mukwabo ne bankishi ba byela kuba’mba umfichishe ku muchima,+ kabiji yami wavundamina.+ 10 Na mambo a kino, mbena kuleta bya malwa pa nzubo yobe obewa Yeloboma, kabiji nkavizha* banabalume* bobe bonse obewa Yeloboma, kubikapotu ne boba babula bakwibakwasha ne babula kukosa baji mu Isalela, kabiji nkapyanga mu nzubo yobe obewa Yeloboma+ byonkatu muntu byo apyanga biswaswa posotu byapwa byonse! 11 Muntu yense wa kwa Yeloboma ukafwila mu muzhi, bakamuja ku bakabwa; kabiji yense ukafwila mu jisaka, bakamuja ku bañonyi, mambo Yehoba ye waamba kino.”’

12 “Pano imanai; yainga ku nzubo yenu. Byo musakufikatu mu muzhi, mwana usakufwa. 13 Bena Isalela bonse basakumujila ne kumuzhiika, mambo ye yenkatu mu kisemi kya kwa Yeloboma ye basakuzhiika mu kilende, mambo ye yenkatu wa mu ba mu nzubo ya kwa Yeloboma Yehoba Lesa wa Isalela ye amonamo kintu kyawama. 14 Yehoba ukesajila aye mwine mfumu wa bena Isalela ukonauna* nzubo ya kwa Yeloboma+ kufumatu joja juba kuya ne kulutwe, kine, nangwatu luno lonka. 15 Yehoba ukapuma bena Isalela, kabiji bakekalatu nobe jitete jibena kulelauka pa mema, aye ukebafumyamo bena Isalela mu kyalo kyawama kyo apele bashakulu babo+ ne kwibapalañenya ku bushiya bwa Mukola,*+ mambo balengele bichi* bya milumbulumbu byazhila+ ne kufichisha Yehoba ku muchima. 16 Kabiji ukebasha bena Isalela na mambo a bubi bwauba Yeloboma kabiji bo alengela bena Isalela kuba.”+

17 Ponkapo muka Yeloboma waimene ne kuya kabiji wafikile ku Tiliza. Byo afikiletu pa kibelo kya nzubo, mwana wafwile. 18 Kabiji bamuzhiikile, ne bena Isalela bonse bamujijile, monka mwayijile byambo Yehoba byo aambile kupichila mwi ngauzhi Ahiya kalume wanji.

19 Kabiji bintu bikwabo byapichilemo Yeloboma, byo alwilenga nkondo+ ne byo alaminenga, byanembwa mu buku wa bintu byapichilengamo bamfumu ba bena Isalela. 20 Myaka yalamine Yeloboma yajinga 22, kabiji bamutwajile na kulaala kwalaala bashakulu banji;+ kabiji mwananji wa mulume aye Nadaba wamuswaine pa bufumu.+

21 Lehoboma mwana wa kwa Solomone ye wajinga mfumu mu Yuda. Lehoboma wajinga na myaka ya kusemwa 41 kimye kyo aikele mfumu, kabiji walamine mu Yelusalema myaka 17, muzhi Yehoba ye asajile+ mu mikoka yonse ya bena Isalela mwa kwikala jizhina janji.+ Inanji Lehoboma wajinga Naama mwina Amonyi.+ 22 Kabiji bena Yuda baubilenga bintu byatama ku meso a Yehoba,+ kabiji bamuzhingijishe bingi na bubi bwabo bo baubilenga kukila ne bwaubilenga bashakulu babo.+ 23 Abo nabo belengejilenga mapunzha atuntama, mashiki azhila ne bichi bya milumbulumbu byazhila*+ pa tutumbatumba+ tonse ne munshi ya bichi byonse bikatampe.+ 24 Kabiji mu kyalo mwajinga ne banabalume belaalanga na banabalume bakwabo ku nzubo ya Lesa.+ Baubilenga bintu byonse bya bunya byaubanga bisaka bya bantu Yehoba byo apangilemo ku meso a bena Isalela.

25 Mu mwaka wa butanu wa bukalama bwa Mfumu Lehoboma, Shishaka+ Mfumu wa Ijipita waishile na kulwa na muzhi wa Yelusalema.+ 26 Wasendele bya buneme byajinga mu nzubo ya Yehoba ne bya buneme byajinga mu nzubo* ya mfumu.+ Wasendele bintu byonse, kuvwangakotu ne makebo onse a ngolode alengele Solomone.+ 27 Onkao mambo, Mfumu Lehoboma walengele makebo a mukuba a kupingizhapo, kabiji wiapaine ku bakulumpe ba bakasopa,* bonka basopanga kibelo kya nzubo ya mfumu. 28 Kimye kyonse mfumu kyo ayanga ku nzubo ya Yehoba, bakasopa beasendanga, kabiji beabwezhanga mu kibamba mo bealaminanga.

29 Bintu bikwabo byapichilemo Lehoboma, ne byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi?+ 30 Pajinga nkondo yabulanga kupwa pe Lehoboma ne Yeloboma.+ 31 Kepo Lehoboma bamutwajile na kulaala kwalaala bashakulu banji ne kumuzhiika ko bazhiikile bashakulu banji mu Muzhi wa Davida.+ Inanji wajinga Naama mwina Amonyi.+ Kabiji mwananji aye Abiyama*+ waswaine pa bufumu.