Yoba
2 Kabiji juba jikwabo baana ba Lesa* wa kine+ baishile na kwimana kwi Yehoba,+ kabiji Satana naye waishile na kwimana pamo nabo konka kwi Yehoba.+
2 Kepo Yehoba ashikishe Satana amba: “Wafuma kwepi?” Satana wakumbwile Yehoba amba: “Nafuma na kupitañana pa ntanda ne kwendaukapo ponse.”+ 3 Kabiji Yehoba washikishe Satana amba: “Nanchi wamumonapo* kalume wami aye Yoba nyi? Pa ntanda kafwapo muntu waesakana pamo ne aye ne. Aye ke muntu waoloka kabiji wa kishinka,*+ ungakamwa amiwa Lesa kabiji washikwa bintu byatama. Kabiji aye watwajijila kwikala wa kishinka+ nangwa kya kuba obewa ubena kuntundaika+ amba namonaune* pa kubula mambo.” 4 Bino Satana wakumbwile Yehoba amba: “Kikoba pa kikoba kikwabo. Muntu wakonsha kupana kintu kyonse kyo aji nakyo pa kuba’mba apulushe bumi* bwanji. 5 Bino umvwe mutanyike kuboko kwenu ne kupuma pa kikupa kyanji ne pa mubiji wanji, aye kine ukemwambila mwenga.”+
6 Kepo Yehoba aambijile Satana amba: “Tala! Aye uji mu maboko* obe. Bino kange umwipaye* ne!” 7 Byonkabyo, Satana wafumineko kwi* Yehoba ne kukamanyika Yoba na bipute*+ byakatazha kufumatu ku maulu anji kufika ne pa lumbwichi. 8 Kabiji Yoba watolele kiinga kya kwikwanyako, kabiji waikelenga mu buto.+
9 Kepo mukazhanji amwambijile’mba: “Nanchi ne luno mwakikakachilatu ku bulumbuluke bwenu nyi? Munenai Lesa mufwe!” 10 Bino aye wamwambijile’mba: “Obewa ubena kwambatu nobe mwanamukazhi wabula maana. Nanchi twafwainwa kutambulangatu bintu byawama byonka kufuma kwi Lesa wa kine ne kubula kutambulako bintu byatama nyi?”+ Mu bino byonse, Yoba kechi walengele mambo na byatunwa byanji ne.+
11 Kabiji balunda ba kwa Yoba basatu baumvwine bya malwa byonse byamufikijile, kabiji bonse baishile kufuma kwabo au kwanji, au kwanji—Elifwaza+ mwina Temanyi, Bilidada+ mwina Shua+ ne Zofwala+ mwina Naamata. Onkao mambo, baumvwañene’mba basambakane ne kuya na kutekenesha ne kukosesha Yoba. 12 Byo bamumwene saka bakiji kwalepa, bakankelwe kumuyuka. Batendekele kujila mabingo ne kutabula bivwalo byabo ne kutaya maloba mwiulu ne pa mitwe yabo.+ 13 Kabiji baikele panshi pamo ne aye pa moba atanu na abiji mute ne bufuku. Kafwako nangwa umo wamwambijilepo kyambo ne, mambo bamwene’mba misongo yanji yabayile bingi.+