Yelemiya
26 Mfumu Yehoyakimu+ mwana wa kwa Yosiya, mfumu wa Yuda byo atendekele kulama, byambo byafumine kwi Yehoba amba: 2 “Yehoba waamba’mba, ‘Imana mu kipango kya nzubo ya Yehoba ne kwamba pa bantu bonse ba mu mizhi ya Yuda babena kwiya na kupopwela* ku nzubo ya Yehoba. Wibabuule bintu byonse byo nakukambizha; kange ushepo kintu nangwa kimo ne. 3 Apo kampe bonse bakomvwa ne kusankilapo mashinda abo atama, ne amiwa nkabwezhamo muchima wami* pa bya malwa byo mbena kukeba kwibaletela na mambo a byubilo byabo byatama.+ 4 Ukebambile’mba: “Yehoba waamba’mba, ‘Umvwe mwakana kulondela mizhilo* yami yo nemupa, 5 ne kukana kuteleka byambo bibena kwamba bakalume bami bangauzhi bo nemutumina kimye kyonse,* bonka bo mwakana kumvwina,+ 6 ko kuba’mba amiwa nkalula ino nzubo kwikala nobe Shilo,+ kabiji nkalengela uno muzhi kufingwa ku bisaka byonse bya bantu bya pano pa ntanda.’”’”+
7 Kabiji bañanga, bangauzhi ne bantu bonse baumvwinenga Yelemiya saka amba bino byambo mu nzubo ya Yehoba.+ 8 Yelemiya byo apwishishe kwamba byambo byonse Yehoba byo amukambizhe kubuula bantu bonse, ponkapo bañanga, bangauzhi ne bantu bonse bamukwachile ne kumwambila’mba: “Kine tusakukwipaya. 9 Mambo ka o waawila mu jizhina ja Yehoba amba, ‘Ino nzubo ikekala nobe Shilo, ne uno muzhi bakamonauna ne kushalatu kwa kubula bantu’?” Kabiji bantu bonse bamubungile Yelemiya mu nzubo ya Yehoba.
10 Babinemanga ba mu Yuda byo baumvwine bino byambo, bafumine mu nzubo* ya mfumu ne kuya mu nzubo ya Yehoba, kabiji bakekele ku kibelo kya katataka kya ku nzubo ya Yehoba.+ 11 Bañanga ne bangauzhi baambijile babinemanga ne bantu bonse amba: “Uno muntu wafwainwa kufwa,+ mambo waaula bintu byatama bikamwekela uno muzhi byonkatu byo mwiumvwina anwe bene.”+
12 Yelemiya byo aumvwine kino, waambijile babinemanga bonse ne bantu bonse amba: “Yehoba ye wantumine kwaula bino byambo byonse byo mwaumvwa pa mambo a ino nzubo ne uno muzhi.+ 13 Onkao mambo, pimpulai mashinda enu ne byubilo byenu byatama kabiji mukookele byaamba Yehoba Lesa wenu, ne Yehoba ukabwezhamo muchima wanji* kechi ukemuletela bya malwa byo abena kukeba kwimuletela ne.+ 14 Pakuba amiwa nepana kwi anweba. Ngubai kintu kyonse kyo mwamona’mba kyawama kwi anweba. 15 Pano bino, yukai’mba kine umvwe mungipaye, mashi ami abula mambo akemushinkamana anweba, uno muzhi ne bantu bekalamo, mambo kine Yehoba ye wantuma kwamba bino byambo byonse byo mwaumvwa.”
16 Ponkapo babinemanga ne bantu bonse baambijile bañanga ne bangauzhi amba: “Uno muntu kechi wafwainwa kufwa ne, mambo waamba kwi atweba mu jizhina ja Yehoba Lesa wetu.”
17 Kabiji bakulumpe bamo ba mu kyalo baimene ne kutatula kwambila jibumba jonse ja bantu amba: 18 “Mika+ wa ku Molesheta waawilenga mu moba a Hezekiya Mfumu+ wa Yuda kabiji waambijile bantu bonse ba mu Yuda amba, ‘Yehoba wa mabumba waamba’mba:
“Ziona bakamujima nobe bujimi,
Yelusalema ukekala ke milumba ya bikulukulu,+
Kabiji mutumba wa Nzubo* ya Lesa ukekala nobe mapunzha atuntama aji mu jisaka.”’*+
19 “Nanchi Hezekiya Mfumu wa Yuda ne bena Yuda bonse bamwipayile nyi? Nanchi aye kechi waakaminwe Yehoba ne kulomba Yehoba kumubila bibusa* kuba’mba Yehoba abwezhemo muchima* ne kubula kwibaletela bya malwa byo akebelenga kwibaletela nenyi?+ Onkao mambo, tusakwiletelela atweba bene* malwa akatampe.
20 “Kabiji kwajinga muntu mukwabo waawijilenga mu jizhina ja Yehoba. Jizhina janji wajinga Uliya mwana wa kwa Shemaya wa ku Kiliata-yealimu+ waawilenga bintu bikamwekela uno muzhi ne kino kyalo byonkatu byaambilenga Yelemiya. 21 Mfumu Yehoyakimu,+ babiyangala banji bonse ne babinemanga banji bonse baumvwine bino byambo, kabiji mfumu wakebelenga kumwipaya.+ Uliya byo aumvwine kino, waakaminwe bingi kabiji wanyemejile ku Ijipita. 22 Kepo Mfumu Yehoyakimu atumine Elenatana+ mwana wa kwa Akibola pamo na banabalume bakwabo kuya ku Ijipita. 23 Uliya bamufumishe ku Ijipita ne kumutwala kwi Mfumu Yehoyakimu, kabiji wamwipayile na mpoko+ ne kutaya mubiji wanji mu kilende kya bantutu.”
24 Bino Ahikama+ mwana wa kwa Shafwana+ wazhikijile Yelemiya kuba’mba babule kumupana ku bantu amba bamwipaye.+