Yelemiya
23 Yehoba waamba’mba, “Malwa abo bakafunga babena konauna ne kupalañanya mikooko ijiila mu mpunzha yami!”+
2 Onkao mambo, Yehoba Lesa wa Isalela waambila bakafunga babena kulama bantu banji amba: “Anweba mwapalañanya mikooko yami ne kwiipangila kwalepa kabiji kechi mwiita muchima ne.”+
“Onkao mambo, Yehoba waamba’mba, “Nkemukambula na mambo a byubilo byenu byatama.”
3 “Amiwa nkakonkanya pamo mikooko yami yashalapo kufuma mu byalo byonse mo neipalañenyejile,+ kabiji nkeibwezha mu mpunzha yayo mwa kujiila,+ ikasemununa ne kuvula bingi.+ 4 Kabiji nkeiletela bakafunga bakeilamanga.+ Kechi ikoba moyo nangwa kususutapo jibiji ne, kabiji kafwako mukooko nangwa umo ukelekapo ne,” byo byaamba Yehoba.
5 Yehoba waamba’mba, “Umvwai! Moba abena kwiya o nkalupula musele* waoloka kufuma mu kikota kya Davida.+ Kabiji mfumu ukalamanga+ na maana ne kuchiba mambo monka mo aolokela ne kuba bintu byaoloka mu kyalo.+ 6 Mu moba anji, Yuda bakamupulusha,+ ne Isalela ukekala mu mutende.+ Kabiji bakamutela na jizhina ja kuba’mba: Yehoba bo Bololoke Bwetu.”+
7 Yehoba waamba’mba, “Nangwa byonkabyo, moba abena kwiya po bakabula kwamba’mba, ‘Byonkatu Yehoba byo aji na bumi, yenka wafumishe bena Isalela mu kyalo kya Ijipita!’+ 8 pano bino, bakamba’mba, ‘Byonkatu Yehoba byo aji na bumi, yenka wafumishe ne kubwezha ba mu kisaka kya Isalela kufuma mu kyalo kya ku kabeta ka ku buyeke ne mu byalo byonse mo ebapalañenyejile,’ kabiji abo bakekalanga mu kyalo kyabo.”+
9 Pa mambo a bangauzhi:
Muchima wami walajika.
Bikupa byami byonse bibena kuzakama.
Njitu nobe muntu wapendwa
Kabiji nobe muntu ye bakookesha ku binyu,
Na mambo a Yehoba ne na byambo byanji byazhila.
10 Mambo kyalo kyakumbanatu bankende;+
Kyalo kibena kujila na mambo a kwikifinga+
Ne mapunzha auma a mungye mujiila banyama.+
Byubilo byabo byatama kabiji kechi bengijisha bulume bwabo bulongo ne.
11 Yehoba waamba’mba, “Bangauzhi ne bañanga bonse baya mungi.*+
Nangwatu mu nzubo yami namo nataanamo bubi bwabo.”+
12 Yehoba waamba’mba, “Mu mashinda abo mukatezhima kabiji mukekala mfishi;+
Bakebashinjika kabiji bakapona.
Mambo amiwa nkebaletela bya malwa
Mu mwaka ye nkebakambwilamo.”
13 “Kabiji mu bangauzhi ba mu Samaliya,+ namonamo bintu byatama.
Babena kwaula mu jizhina ja Baela,
Kabiji batwala bantu bami bena Isalela mungi.
14 Kabiji mu bangauzhi ba mu Yelusalema, namonamo bintu bya bunya.
Boba bukende+ ne kwamba bintu bya bubela;+
Batundaika* bantu babi,
Kabiji kechi baleka kuba bintu byatama ne.
15 Onkao mambo, Yehoba wa mabumba waamba pa bangauzhi amba:
“Amiwa mbena kwibajiisha kichi kyalula
Ne kwibatomesha mema a bulembe.+
Mambo bangauzhi ba mu Yelusalema bakumbanya bunsatuki mu kyalo kyonse.”
16 Yehoba wa mabumba waamba’mba:
“Kange mumvwine bintu bibena kwaula bangauzhi kwi anweba ne.+
Babena kwimutwala mungi.*
17 Kimye kyonse bambila boba bandengulula amba,
‘Yehoba waamba’mba: “Mukeyowa mutende.”’+
Kabiji bambila muntu yense ulondela bikeba muchima wanji watama amba,
‘Kafwako kintu kyatama kikakumwekela ne.’+
18 Mambo ñanyi uji pa balunda ba Yehoba
Kuba’mba amone ne kumvwa byambo byanji?
Ñanyi watako muchima ku byambo byanji kuba’mba ebyumvwishe?
19 Talai! Kinkunkwila kya Yehoba kikapupa na bukaji;
Kikapupila pa mitwe ya babi nobe kanzhimbiji.+
20 Bukaji bwa Yehoba kechi bukafwomoka ne
Kufikatu ne byo akooba ne kufikizha bintu biji ku muchima wanji.
Mu moba akapelako, mukomvwisha mwatala bino byambo.
21 Amiwa kechi nebatumine bangauzhi ne, bino betuminetu abo bene.
Kechi nebambijilepo kintu ne, bino beawijilengatu bene.+
22 Umvwe bajinga pa balunda nami,
Inge balengejile bantu bami kumvwa byambo byami
Kabiji inge bebakwashishe kuleka mashinda abo ne byubilo byabo byatama.”+
23 Yehoba waamba’mba, “Nanchi amiwa yami Lesa ujitu pepi nyi, nanchi kechi yami Lesa uji ne kwalepa nenyi?”
24 Yehoba waamba’mba, “Nanchi muntu wakonsha kufyama mwafyamika mo nakonsha kubula kumumona nyi?”+
Yehoba waamba’mba, “Nanchi amiwa kechi mmona bintu byonse bya mwiulu ne bya pano pa ntanda nenyi?”+
25 “Naumvwa bintu bya bubela bibena kwaula bangauzhi mu jizhina jami ne kwamba’mba, ‘Naji kulota kiloto! Naji kulota kiloto!’+ 26 Nanchi bano bangauzhi bakaleka kimye ka kwaula bya bubela? Abo bo bangauzhi baula bintu bya bujimbijimbi bya mu michima yabo.+ 27 Bakeba bantu bami kuvulama jizhina jami na mambo a biloto byo belotolwela bene na bene, byonkatu bashakulu babo byo bavulamine jizhina jami na mambo a Baela.+ 28 Awa ngauzhi uji na kiloto, ekilotolole, bino awa uji na byambo byami, ebyambe mu bukishinka.”
Yehoba waamba’mba, “Nanchi kalunenge ka wichi kaesakana pamo na wichi mwine nyi?”
29 Yehoba waamba’mba, “Nanchi byambo byami kechi bijitu nobe mujilo,+ kabiji nobe sando ulalaula mabwe nenyi?”+
30 Yehoba waamba’mba, “Amiwa nazhingijila bangauzhi beba byambo byami kufuma ku bakwabo.”+
31 Yehoba waamba’mba, “Amiwa nazhingijila bangauzhi bamba’mba, ‘Abino byo byo aamba!’”+
32 Yehoba waamba’mba, “Amiwa nazhingijila bangauzhi balota biloto bya bubela ne kwibilotolola kuba’mba batwale balongo bami mungi na bubela bwabo ne bwitote bwabo.”+
Yehoba waamba’mba, “Pano bino, amiwa kechi nebatumine nangwa kwibakambizha ne. Onkao mambo, kechi bakakwasha bano bantu nangwa pachechetu ne.”+
33 “Umvwe bano bantu nangwa ngauzhi nangwa ñanga wimwipuzha’mba, ‘Nanchi kipe* kyanemena Yehoba kyo ki ka?’ mukebakumbule’mba, ‘“Anweba yenka bantu yenu kipe kyamunemena! Kabiji nkemonauna,”+ byo byaamba Yehoba.’ 34 Pakuba ngauzhi nangwa ñanga nangwa muntu ukamba’mba, ‘Kino kyo kipe kyanemena Yehoba!’ Amiwa nkamubila byawama awo muntu ne ba mu nzubo yanji. 35 Abino byo byo mubena kwiambila anwe bene na bene amba, ‘Nanchi Yehoba wakumbula’mba ka? Kabiji Yehoba waambapo amba ka?’ 36 Bino kechi mwafwainwa kwamba jibiji pa kipe* kyamunemena Yehoba ne, mambo kino kipe* ke byambo byenu byo mwamba kabiji anweba mwaalula byambo bya Lesa mumi, aye Yehoba wa mabumba, Lesa wetu.
37 “Wafwainwa kushikisha ngauzhi amba, ‘Nanchi Yehoba waji kukukumbula’mba ka? Nga Yehoba waambapo amba ka? 38 Kabiji inge mwatwajijila kwamba’mba, Yehoba waamba’mba: “Kipe* kyamunemena Yehoba!” “Mambo mwaamba’mba, ‘Bino byambo kyo kipe* kyamunemena Yehoba,’ saka nemukainye namba, ‘Kechi mwafwainwa kwamba’mba: “Kipe* kyamunemena Yehoba!”’ ne, 39 pano umvwai! Amiwa nkemushikula ne kwimutaya, anweba ne muzhi ye nemupele anweba ne bashakulu benu. 40 Kabiji nkalengela bantu kwimulengesha bumvu ne kwimulengulula myaka ne myaka kabiji kechi bakavulama ne.”’”+