Nkalata Itanshi ya kwa Petelo
1 Amiwa Petelo mutumwa+ wa kwa Yesu Kilishitu, kwi anweba mwikala bwenyi mwapalañena mu Pontusa, mu Ngalatiya, mu Kapadokya,+ mu Asha ne mu Bitinya, ku basalwa 2 monka mwayila kuyukila jimo kwa Lesa Tata,+ mu kwibazhijika na mupashi+ kuba’mba bakookelenga ne kwibasansa mashi a kwa Yesu Kilishitu:+
Lusa lukatampe ne mutende bimuvujilenga.
3 Atotwe Lesa Shanji Nkambo yetu Yesu Kilishitu, witusemene jibiji+ monka mwayila lusa lwanji lukatampe kuba’mba etupe luketekelo+ lumi kupichila mu kusangulwa mu bafu kwa Yesu Kilishitu,+ 4 ne kwitupa buswanyi bubula kubola, bwabula kuzhilululwa kabiji bubula kwaluka.+ Buno buswanyi bemulaminabo mwiulu,+ 5 anweba bo babena kulama kwi Lesa mu bulume bwanji na mambo a lwitabilo lo muji nalo, kuba’mba mukamone lupulukilo lo banengezhezha jimo lukasoloka mu kimye kyapelako. 6 Na mambo a kino, mubena kusekela bingi, nangwa kya kuba mu kakimye kacheche mwaikala na bulanda na mambo a meseko apusana pusana o mubena kupitamo,+ 7 pa kuba’mba lwitabilo lwenu lwaesekwa+ lwakila ngolode onaika nangwa kya kuba bamweseka* mu mujilo, lukalete lutotelo, ne lukumo ne buneme kimye kikamweka Yesu Kilishitu.+ 8 Nangwa kya kuba kechi mwamumwenepo ne, mwamutemwa. Nangwa kya kuba kechi mubena kumumona pa kino kimye ne, mwamwitabila kabiji mubena kusekela bingi na lusekelo lukatampe lwa lukumo, 9 byo mubena kwibikako kufikizha kikonkwanyi kya lwitabilo lwenu lukemulengela kupuluka.*+
10 Na mambo a luno lupulukilo, bangauzhi baawilenga pa lusa lukatampe lo bemubijile, belukebele ne kwilupalanguzha bingi.+ 11 Batwajijile kupalanguzha’mba bayuke kimye kikamwekelamo bintu byo asolwelenga pe Kilishitu+ mupashi wajinga mwi abo ne byo bikekala pa kyokya kimye, mambo mupashi waambijile jimo bya kumanama bya kwa Kilishitu+ ne lukumo lukalondelapo. 12 Kyasolwelwe kwi abo amba kechi beingijilenga abo bene ne, bino baingijilenga anweba, pa mambo a bintu byo bemubuula ku boba bemusapwijilenga mambo awama na mupashi wazhila ye batumine kufuma mwiulu.+ Ne bamalaika nabo babena kusakisha kutala mu bino byonka bintu.
13 Onkao mambo, nengezhai milanguluko yenu ku mwingilo;+ saka mujimuka;+ teshai muchima ku luketekelo lwenu lwaimena pa lusa lukatampe lo bakemubila kimye kikamweka Yesu Kilishitu. 14 Byo muji baana ba lukookelo, lekai kulondela bisakasaka mibiji yenu byo mwaubanga kala mu bulubi, 15 bino monka mwaikela Wazhila wimwichile, ikalai bazhila mu byubilo byenu byonse,+ 16 mambo kyanembwa’mba: “Mwafwainwa kwikala bazhila, mambo amiwa nazhila.”+
17 Kabiji umvwe mubena kulomba bintu kwi Shetu yenka uchiba mambo kwa kubula misalululo+ mwayila mingilo ya muntu, akamwainga Lesa mu byubilo byenu+ kimye kyo mukikala bwenyi pano pa ntanda. 18 Mambo mwayuka’mba kechi bemukasulwile*+ ku bwikalo bwenu buncha bo mwatambwile ku bashakulu* benu na bintu bibola, na siliva nangwa na ngolode ne. 19 Bino bemukasulwile na mashi anema+ aji nobe mashi a mukooko wabula bulema ne biko,+ ko kuba’mba a Kilishitu.+ 20 Aye wayukanyikijilwe jimo pano pa ntanda saka pakyangye kwikalako,+ bino wamwekele ku mpelo ya ano moba na mambo a anweba.+ 21 Kupichila mwi aye mwaitabila mwi Lesa,+ yenka wamusangwile+ mu bafu ne kumupa lukumo,+ kuba’mba mwikale na lwitabilo ne luketekelo mwi Lesa.
22 Pano byo mwitokesha anwe bene* na mambo a kukookela bukine ne na mambo a kutemwa balongo butemwe bwa kubula bukamfutumfutu,+ itemwishai na muchima yense anwe bene na bene.+ 23 Mambo anweba bemulengela kusemwa jibiji+ kechi ku lukunwa ubola ne, poso ku lukunwa* ubula kubola,+ kupichila mu mambo a Lesa mumi wikala myaka ne myaka.+ 24 Mambo “bantu bonse baji nobe nsono, ne lukumo lwabo luji nobe buluba bwa mungye; nsono yuma ne nsoke yayo ikunchikako, 25 pakuba byambo* bya Yehoba* bikala myaka ne myaka.”+ Kabiji bino “byambo,”* ke mambo awama o bemusapwijile.+