Yelemiya
20 Pashula ñanga, mwana wa kwa Imela, wajinga kalama wa mu nzubo ya Yehoba, watelekelenga kimye Yelemiya kyo aawilenga bino bintu. 2 Ponkapo Pashula wapumine Yelemiya ngauzhi ne kumubika mu bikulu+ byajinga pa Kibelo kya Peulu kya kwa Benjamina kyajinga mu nzubo ya Yehoba. 3 Bino juba jalondejilepo, Pashula byo afumishe Yelemiya mu bikulu, Yelemiya wamwambijile’mba:
“Yehoba kechi wa kutela na jizhina jobe ja Pashula ne, bino wa kutela’mba Ulengesha Moyo Konse Konse.+ 4 Mambo Yehoba waamba’mba, ‘Amiwa nkakulengela kwikala na moyo kabiji ukalengesha moyo balunda nobe bonse, ne abo bakebepaya na mpoko ku balwanyi babo obewa saka umonako;+ kabiji bena Yuda bonse nkebapana mu kuboko kwa mfumu wa Babilona, kabiji aye ukebatwala mu buzha mu Babilona ne kwibepaya na mpoko.+ 5 Kabiji bya bunonshi byonse bya mu uno muzhi, bintu byonse bijimo, bya buneme byonse ne bya buneme byonse bya bamfumu ba mu Yuda, nkebipana mu kuboko kwa balwanyi babo.+ Kabiji bakebangata bino bintu, kwibisenda ne kwibitwala ku Babilona.+ 6 Pakuba obewa Pashula ne bonse bekala mu nzubo yobe, bakemutwala mu buzha. Mukaya ku Babilona ne kufwila konkakwa kabiji bakemuzhiika konkakwa pamo na balunda nobe bonse mambo wibawijilenga bintu bya bubela.’”+
7 Mwankumisha bingi anweba Yehoba, kabiji nakumya bingi.
Mwaingijishe bulume bwenu pe amiwa kabiji mwanshinjile.+
Naikala ke wa kusekwa ku bantu kimye kyonse;
Ne bantu bonse bañendeleka.+
8 Kimye kyonse kyo ñamba byambo byenu, njila ne kutaya mbila namba,
“Bukapondo ne lonaiko!”
Mambo byambo bya Yehoba byalengela bantu kuntuka ne kunseka kimye kyonse.+
9 Onkao mambo, naambile namba: “Kechi nkamutelapo jibiji ne,
Kabiji kechi nkambapo jibiji mu jizhina janji ne.”+
Pano bino, mu muchima mwami byambo byanji byaumvwanyikilenga nobe mujilo ubena kuteemena mu bikupa byami.
Kabiji kyankatezhe kuleka kwibyamba;
Kechi nakonsheshe kuzhindamapotu ne.+
10 Mambo naumvwine mañwiñwi avula atama;
Bintu bilengesha moyo byanzhokolokele.+
“Mulengululai; twayai tumulengulule!”
Muntu yense wañambijilenga’mba ngikale mutende, wapembejilengatu amba mpone ne kwamba’mba:+
“Kampe usakuba kintu kyatama,
Pa kuba’mba tumushinde ne kushinkanya nanji.”
11 Bino Yehoba wajinga kwi amiwa nobe kitonzhi ulenga moyo.+
O ene mambo aba bammanyika o baketuntwila kabiji kechi bakashinda ne.+
Bakebalengesha bingi bumvu mambo kechi bakashinda ne.
Myaka ne myaka, bumvu bwabo kechi bakebulubako ne.+
12 Pakuba anweba Yehoba wa mabumba mutalatala muntu waoloka;
13 Mwimbilai Yehoba! Mutotai Yehoba!
Mambo aye wapokolola muntu* muyanji mu kuboko kwa babi.
14 Jifingwe juba jo nasemekelwe!
Juba jo bansemejilemo bamama kange jimone bintu byawama ne!+
15 Afingwe awa muntu watwajile mbila yawama ku batata amba:
“Kwasemwa mwana wa mulume!”
Ne kwibalengela kusangalala bingi.
16 Awa muntu ekale nobe mizhi Yehoba yo aonauna kwa kubula kwiyubila lusa.
Aye omvwe kujila kwa lukelo ne ntolompita ya kujimunañanako pa kushinkamana juba.
17 Mambo ka o abujile kungipaya saka nkijitu munda,
Kuba’mba bamama bekale ke kilende kyami
Ne kushalatu monka baimichila?+
18 Mambo ka o nasemekejilwe
Kuba’mba mmone bya malwa ne bintu bileta bulanda,
Ne kwikala bwikalo bwa bumvu mu bumi bwami bonse?+