Ezikyo
2 Kabiji wañambijile’mba: “Obewa mwana muntu,* imana ponkapo pa kuba’mba nesambe nobe.”+ 2 Byo esambile ne amiwa, mupashi waishile pe amiwa kabiji wandengejile kwimana ponka po naimene+ pa kuba’mba ñumvwe bintu byo añambijilenga.
3 Wañambijile’mba: “Obewa mwana muntu, mbena kukutuma ku bena Isalela,+ bisaka byansatukila.+ Abo ne bashakulu babo bandenga mambo kufikatu ne lelo jino.+ 4 Mbena kukutuma ku bantu bakanama* ne kukosa michima+ kabiji wafwainwa kwibabuula’mba, ‘Byambo byo ubena kwamba byafuma kwi Nkambo Mfumu Yehoba. 5 Nangwa bakomvwe nangwa bakakane kumvwa, abo bo bansatuki,+ kabiji bakayuka’mba ngauzhi wajinga mwi abo.+
6 “Pakuba obewa mwana muntu, kange ukebachine+ nangwa kuba moyo na ñambilo yabo ne, nangwa kya kuba bakuzhokoloka ku miba ya mikutankwaji ne mibatu*+ ikwabo ne tuminye. Kange ukachine byo bakamba+ nangwa kuzakama na mambo a mwekelo yabo ne,+ mambo abo kyo kisaka kya bansatuki. 7 Ukebabuule byambo byami, nangwa bakomvwe nangwa bakakane, mambo abo bo bansatuki.+
8 “Bino obewa mwana muntu, umvwa byo mbena kukubuula. Kange usatuke nobe kino kisaka kya bansatuki ne. Asama uje bintu byo mbena kukupa.”+
9 Byo nainukile, namwene kuboko ko antambikile,+ kabiji mu kuboko kwanji mwajinga muvungilo.*+ 10 Byo amumvungulwijile, mwajinga bintu byo banembamo ku bushiya ne bushiya.+ Bintu byo banembelemo byalengejile bantu kwimba nyimbo ya bulanda* ne kujila mabingo.+