Yelemiya

52 Zedekiya+ wajinga na myaka ya kusemwa 21 kimye kyo aikele mfumu, kabiji walamine mu Yelusalema myaka 11. Inanji wajinga Hamutali+ mwana wa kwa Yelemiya wa ku Libina. 2 Waubilenga byatama kwi Yehoba byonkatu byaubilenga Yehoyakimu.+ 3 Abino bintu byamwekele mu Yelusalema ne mu Yuda na mambo a bukaji bwa Yehoba, kufikatu ne byo ebafumishe ku meso anji.+ Kabiji Zedekiya wasatukijile mfumu wa Babilona.+ 4 Mu mwaka wa butanu na buna wa bukalama bwa kwa Zedekiya, mu ñondo wa bujikumi, pa juba ja bujikumi ja ñondo, Nebukaneza Mfumu wa Babilona waishile na nzhita yanji yonse na kulukuka Yelusalema. Kabiji bazhokolokele muzhi ne kushimikako nsakwa ya kulwilapo kuzhokoloka muzhi yense.+ 5 Kabiji muzhi bamuzhokolokele kufikatu ne mu mwaka wa bu 11 wa bukalama bwa Mfumu Zedekiya.

6 Mu ñondo wa buna, pa juba ja butanu na buna ja ñondo,+ kipowe kya nzala kyabayile mu muzhi, kabiji kechi mwajinga kajo ka kuja bantu ba mu kyalo ne.+ 7 Ponkapo nsakwa ya muzhi beikundwile, ne bashilikale bonse banyemene bufuku kulupukila pa kibelo kyajinga pakachi ka masakwa abiji kwipi na bujimi bwa mfumu, bena Kalodeya saka bazhokoloka muzhi; kabiji bayilenga mu jishinda jaya ku Alaba.+ 8 Bino nzhita ya bena Kalodeya yapupijile mfumu, kabiji bamutaaine Zedekiya+ mu kiselebwa kya Yeliko, kabiji bashilikale banji bonse bamupalañene. 9 Kepo bamukwachile mfumu ne kumuleta kwi mfumu wa Babilona ku Libula mu kyalo kya Hamata kabiji wamuchibijile mambo. 10 Kabiji mfumu wa Babilona waipayile baana ba balume ba kwa Zedekiya ne aye saka amonako, kabiji waipayijile babinemanga bonse ba mu Yuda ku Libula. 11 Kepo mfumu wa Babilona asabile meso a kwa Zedekiya,+ kumukasa nshimbi ya mukuba ne kumuleta ku Babilona. Kabiji wamutayile mu kaleya mo aikelenga kufikatu ne juba jo afwile.

12 Mu ñondo wa butanu pa juba ja bujikumi, ko kuba’mba, mu mwaka wa bu 19 wa bukalama bwa kwa Nebukaneza Mfumu wa Babilona, Nebuzaladana mukulumpe wa bakasopa, yenka wajinga kalume wa mfumu wa Babilona, waishile ku Yelusalema.+ 13 Wasokele nzubo ya Yehoba,+ ne nzubo* ya mfumu ne mazubo onse a mu Yelusalema; kabiji wasokele ne mazubo onse akatampe. 14 Kabiji masakwa azhokolokele Yelusalema beakundawile ku bashilikale bonse ba bena Kalodeya bajinga na mukulumpe wa bakasopa.+

15 Nebuzaladana mukulumpe wa bakasopa watwajile mu buzha bantu bamo balanda ne bantu bonse bashajile mu muzhi. Kabiji wasendele ne bantu bayile kwi mfumu wa Babilona ne basendwe ba bya kulengalenga.+ 16 Bino Nebuzaladana mukulumpe wa bakasopa washilepo bayanji bamo ba mu kyalo ba kwingijila mu bujimi bwa miñanzañanza ne ba kwingila mingilo yakatazha.+

17 Kabiji bena Kalodeya balalawile mashiki a mukuba+ ajinga ku nzubo ya Yehoba ne bikochikala+ ne Kizhiba kya mukuba+ kyajinga mu nzubo ya Yehoba, kabiji basendele mukuba yense ku Babilona.+ 18 Basendele ne bikopo, mafosholo, bya kuzhimyako mujilo, masanyi afukumana,+ ne tutomeno,+ ne bipe byonse bya mukuba byo baingijishanga mu nzubo ya Lesa. 19 Mukulumpe wa bakasopa wasendele mashomeka,+ ne bya kwapwilako mujilo, ne masanyi afukumana, ne bikopo, ne bya kutulapo malampi,+ ne tutomeno ne masanyi afukumana a ngolode yawama ne siliva.+ 20 Pakuba mashiki abiji, Kizhiba, bañombe 12 bo balengele na mukuba+ po batentekele kino Kizhiba, ne bikochikala Mfumu Solomone byo alengele bya ku nzubo ya Yehoba, mukuba wa bino bintu byonse wajinga wa kukankalwa kupima.

21 Pa mambo a mashiki, jishiki jimo jalepele makyubichi* 18 kuya peulu, lutambo walepa makyubichi 12 inge bamuzhokolosha ku jino jishiki wasambakananga;+ mujita wajo wajinga nobe bula bwa minwe ina yalamankana* kabiji jajinga na lupako mukachi. 22 Kabiji mutwe wa jishiki wajinga wa mukuba; kabiji mutwe umo walepele makyubichi atanu;+ bukonde ne mapomegulanchi azhokolokele mutwe onse ajinga a mukuba. Jishiki ja bubiji bejilengele kintutu kimo, pamo ne mapomegulanchi. 23 Ku mbaji yajo konse babikileko mapomegulanchi 96; kabiji babikile mapomegulanchi 100 kuzhokoloka bukonde.+

24 Kabiji mukulumpe wa bakasopa wasendele Selaya+ ñanga mukatampe, ne Zefwaniya+ ñanga wa kibiji ne bakalama ba bibelo basatu.+ 25 Kabiji mu muzhi wasendelemo kinemanga wa mfumu wajinga mukulumpe wa bashilikale, ne balunda ba mfumu batanu na babiji bo bataaine mu muzhi, kubikapotu ne munembeshi wa mukulumpe wa nzhita, yenka wakonkanyanga pamo bantu ba mu kyalo, ne banabalume 60 bafumine mu bantutu ba mu kyalo bo bataaine mu muzhi. 26 Nebuzaladana mukulumpe wa bakasopa wibasendele ne kwibaleta kwi mfumu wa Babilona ku Libula. 27 Mfumu wa Babilona wibatapile ne kwibepayila ku Libula+ mu kyalo kya Hamata. Byonkabyo, bena Yuda bayile mu buzha kufuma mu kyalo kyabo.+

28 Bano bo bantu Nebukaneza bo atwajile mu buzha: mu mwaka wa butanu na bubiji watwajile Bayudea 3,023.+

29 Mu mwaka wa bu 18 wa bukalama bwa kwa Nebukaneza,+ bantu* 832 bebatwajile mu buzha kufuma mu Yelusalema.

30 Mu mwaka wa bu 23 wa bukalama bwa kwa Nebukaneza,* Nebuzaladana mukulumpe wa bakasopa watwajile Bayudea mu buzha, bantu* 745.+

Bantu* bonse pamo bo batwajile mu buzha, bajinga 4,600.

31 Kabiji mu mwaka wa bu 37 wa buzha bwa kwa Yehoyakina+ Mfumu wa Yuda, mu ñondo wa bu 12, pa juba ja bu 25 ja ñondo, mu mwaka Evile-melodaka Mfumu wa Babilona mo aikele mfumu, wakasulwile* Yehoyakina Mfumu wa Yuda mu kaleya.+ 32 Wisambile nanji bulongo kabiji wanemekele jitanda janji kukila matanda a bamfumu bakwabo bo ajinga nabo mu Babilona. 33 Onkao mambo, Yehoyakina wavuujile bivwalo byanji bya mu kaleya, kabiji wajiilanga pamo na mfumu mu moba onse a bumi bwanji. 34 Mfumu wa Babilona wamupanga kajo pa juba pa juba, mu moba onse a bumi bwanji, kufikatu ne juba jo afwile.