Ezikyo
27 Kabiji Yehoba wañambijile jikwabo amba: 2 “Obewa mwana muntu, imba lwimbo wa bulanda* pa mambo a muzhi wa Tila,+ 3 ne kwambila muzhi wa Tila amba,
‘Obewa wikela ku biito bya kalunga ka mema,
Yenka obewa upotesha bintu ku mitundu ya bantu bafuma pa makuji avula,
Nkambo Mfumu Yehoba waamba’mba:
“Obewa muzhi wa Tila wamba’mba, ‘Amiwa ne wa buya.’+
4 Mapunzha obe aikela pakachi ka kalunga ka mema,
Kabiji bantu bobe bayuka kushimika bakulengela kwikala wa buya.
5 Mapulanga obe onse beafumishe ku bichi bya yunipa bya ku Senila,+
Kabiji basendele kichi kya sida kufuma ku Lebanoni kuba’mba bakulengeleko kakichi ka kwimika kulutwe ya bwato bobe.
6 Basongele bilapo byobe kufuma ku bichi bya oko bya mu Bashana,
Kabiji ntonga ya bwato bobe beilengele na kichi kya yunipa kyafumine pa makuji a Kitimu kabiji balamikileko meno a nzovu.+
7 Kisapi kya linenyi kya misombelo yapusana pusana kyafumine ku Ijipita kyo bakashijile ku kakichi ka kulutwe ya bwato bobe, kyalengejilenga bwato bobe kwenda,
Ne bisapi byobe byafituluka ne kuchiluluka byo bavwetele peulu ya bwato byafumine ku makuji a Elisha.+
8 Bena Shidona ne bena Alavwadi+ bo bavuwilenga.
Obewa muzhi wa Tila, bantu bobe bayukisha kuvuwa, bo bavuwilenga bwato.+
9 Banabalume* bena Gebala+ bajinga basendwe bayukishe bya kushinka panungakena bwato pa kuba’mba pabulenga kutwela mema.+
Beavuwilenga maato onse a pa kalunga ka mema baishile na kupota bintu kwi obewa.
10 Bena Pelisha, bena Luda ne bena Puta+ bajinga pa bashilikale bobe, banabalume ba nkondo.
Bakobekele makebo abo ne tumpompo twabo kwi obewa, kabiji bakulengejile kunemekwa.
11 Bena Alavwadi bajinga pa nzhita yobe, baimene kuzhokoloka nsakwa yobe yonse,
Ne banabalume babula moyo basopelenga byamba byobe.
Bakobekele makebo kuzhokoloka nsakwa yobe yonse
Kabiji bakulengejile kwikala wa buya.
12 “‘“Bena Tashishi+ baubilenga busulu ne obewa na mambo a bunonshi bobe bwavula.+ Bapimpwilenga bintu byobe na siliva, kyela kya kapotwe, kyela kitoka kyanekena ne na kyumbu.+ 13 Bena Yavwanyi, bena Tubala+ ne bena Mesheke+ baubilenga busulu ne obewa kupichila mu kupimpula bintu byobe na bazha+ ne na bipe bya mukuba. 14 Bena Togama+ bapimpwilenga bintu na bambili, bambili ba nkondo ne na ba myule. 15 Bena Dedanyi+ baubilenga busulu ne obewa; watwezhezhe basulu pa makuji avula; bakupele meno a nzovu+ ne bichi bya muntu kufiita kwikala bya bupe byobe. 16 Bena Edomu baubilenga busulu ne obewa mambo wajinga na bintu byavula. Bapimpwilenga bintu byobe na mabwe a takozi, bisapi byachiluluka, bisapi byo basonejilepo tonge wa misombelo yapusana pusana, bisapi bya linenyi byawamisha, mabwe a makolale ne a lubi.
17 “‘“Bena Yuda ne bantu ba mu kyalo kya Isalela baubilenga busulu ne obewa, bapimpwilenga bintu+ byobe na wichi wa Minifi,+ kajo kawama, buki,+ manyi ne manyi a balasama.+
18 “‘“Bena Damasakasa+ baubilenga busulu ne obewa na mambo a bintu byavula byo wajinga nabyo ne bunonshi bobe bonse. Bapoteshenga binyu bya ku Helibona ne boya bwa mukooko bwa ku Zahala.* 19 Bena Vedana ne bena Yavwanyi bafumine ku Uzala, bapimpwilenga bintu byobe na bintu byo balengele bya kyela kya kapotwe, na kichi kya kasiya* ne mwenge.* 20 Bena Dedanyi+ baubijilenga pamo ne obewa busulu bwa bisapi bya kwikalapo* pa bambili. 21 Watwezhezhe nkito bena Alabya ne babinemanga ba mu Keda+ bapoteshanga baana ba mikooko, mikooko ilume ne bambuzhi.+ 22 Basulu ba mu muzhi wa Sheba ne Lama+ baubilenga busulu ne obewa; bapimpwilenga bintu byobe na bintu byonse binunka bulongo, mabwe a buneme ne ngolode.+ 23 Bena Halana,+ bena Kaneya, bena Edena+ ne basulu ba mu muzhi wa Sheba,+ wa Ashula+ ne wa Kilimande, baubilenga busulu ne obewa. 24 Mu bisankanyi byobe bapotesheshangamo bivwalo byawama, minkukumba yafituluka, bivwalo byo basona bulongo bya misombelo yapusana pusana ne bya kunyantapo byabalala byo baluka na tonge ne na mizhinge yakosa.
25 Maato a ku Tashishi+ o asendanga bintu byobe bya busulu,
Onkao mambo, wayujile na bintu byavula ne kunema* byo wafikile pakachi ka kalunga ka mema.
26 Bavuwa maato bakufikizhe kwine kwazhika pa kalunga ka mema;
Mwela wafumine ku musela wakonawijile pa kalunga ka mema.
27 Bunonshi bobe, bintu byobe, basulu bobe, bavuwa maato bobe,
Aba bashinka panungakena bwato pa kuba’mba pabulenga kutwela mema, bapoteshenga bintu byobe+ ne banabalume bonse ba nkondo,+
Ko kuba’mba jibumba* jonse jo uji najo,
Bonse bakalobela pa kalunga ka mema juba jo ukonaika.+
28 Aba bavuwa maato byo bakajila, bitulu bikatenkena.
29 Bonse bavuwa maato, bakyabusha ne bonse bayuka bya kwenda pa mema
Bakafuma mu maato abo ne kwimana ku mutunta.
30 Bakawowakana ne kukujila+
Saka bekusa maloba pa mitwe yabo ne kwipukula mu buto.
31 Baketenda mabala ne kuvwala bisapi bya majila;
Bakakujila bingi* ne kuwowakana.
32 Byo bakajilanga mabingo, bakembanga lwimbo wa bulanda saka bakujila amba:
‘Ñanyi uji nobe muzhi wa Tila ye bazhimañenya pa kalunga ka mema?+
33 Bintu byobe byafuminenga pa kalunga ka mema byakwashishenga bantu bavula bingi.+
Bya bunonshi ne bya busulu byobe byanonkeshe bamfumu ba pano pa ntanda.+
34 Pano bakonawina pa kalunga ka mema pene pazhika,+
Kabiji bya busulu byobe byonse ne bantu bobe bonse balobela pamo ne obewa.+
35 Bonse bekala pa makuji bakakankamana pa kukutala,+
Ne bamfumu babo bakazakamanga na mambo a moyo+ kabiji bakekala ne na bulanda.
36 Basulu ba mu bisaka bya bantu baketa milozhi pa bintu bikakumwekela.
Ukafwa lufu lwatama lwa kubazhimukilatu,
Kabiji kechi ukekalako jibiji ne.’”’”+