Byubilo bya Batumwa
27 Kabiji byo betufuukwijile kuya na bwato ku Italya,+ bamupaine Paulo ne bakaili bakwabo bamo ku mukulumpe wa bashilikale wa jizhina ja Julyasi, wa mu jibumba ja bashilikale ja Augusatusa. 2 Byo twakanjijile mu bwato bwafumine ku Adalamitiuma bwayilenga ku biito kwipi na mukulo wa kibunji kya Asha, twayile na bwato; twajinga ne Alisatakusa+ mwina Makedonya wa ku Tesalonika. 3 Juba jalondejilepo twafikile ku Shidona, kabiji Julyasi wamubijile lusa* Paulo ne kumuswisha kuya nakumona balunda nanji kuba’mba bamukwashe.
4 Byo twafumineko na bwato, twapichile kwipi na jikuji ja Kipilusa, mambo luvula wafuminenga ko twayilenga. 5 Kabiji twapichile pa kalunga ka mema kwipi na Kilikya ne Pamifilya ne kufika pa kiito kya Mila mu Lisha. 6 Konkakwa mukulumpe wa bashilikale wataaineko bwato bwafumine ku Alekesandiliya bwayilenga ku Italya, kabiji witukanjizhe monka. 7 Byo twayilenga pachepache pa moba avula, kitukatezhe bingi pa kuba’mba tufike ku Kinidusa. Na mambo a luvula wafuminenga ko twayilenga, twapichile kwipi na Keleta pa Salamona ko twazhikijilwe ku luvula. 8 Kabiji byo kitukatezhenga pa kupita ku musezho, twafikile pa mpunzha patelwanga’mba Kiito Kyawama, kwipi na muzhi wa Laseya.
9 Papichile kimye kyabaya lwendo nalo lwakatezhe bingi, mambo kuzhikilwa na nzala kwa Juba ja Kufuchila Mambo+ kwapwile, onkao mambo, Paulo wibabuujile 10 amba: “Anweba bakwetu, namona namba luno lwendo lusakuleta byatama ne bono bwavula, kechi ku bipetu ne bwato bonka ne, bino ne ku bumi* bwetu.” 11 Nangwa byonkabyo, mukulumpe wa bashilikale waumvwijile uvuwa bwato ne mwina bwato, bino wakaine kumvwina byaambile Paulo. 12 Kabiji pa kiito byo pabujile kuwama kwikalapo mu bañondo bamashika, bavula bakebelenga’mba bafumepo kabiji baambile’mba beseke kumona umvwe bakonsha kufika ku Fenese pa kuba’mba bakekaleko mu bañondo ba mashika, Fenese kyajinga kiito kya Keleta kyatalañene na kabeta ka ku buyeke musela ne kabeta ka ku bulenge musela.
13 Mwela wa ku kabeta ka ku bulenge byo apupilenga pachepache, balangulukile’mba basakufika bulongo, kabiji baabwile kimiko ne kutatula kusezha Keleta kwipi na kitulu. 14 Nangwa byonkabyo, byo papichile kakimye kacheche kwabuukile luvula mukatampe watelwanga’mba Eulakwilo.* 15 Bwato byo bebukwachile ku luvula ne kukankalwa kutala kwafuminenga luvula, twibulekeletu saka betukumpula. 16 Twayile na kupita kwipi na kajikuji katelwanga’mba Kaluda kuba’mba tuzhikijilwe ku luvula, kabiji kitukatezhe bingi pa kuba’mba tutole kabwato kacheche kajinga mu bwato kunyuma. 17 Bino byo bekakokele, baingijishe ntambo kuba’mba bebukoseshe bwato, kabiji byo bachiine’mba bwato bwakatapama mu buchichi pa Sulatisa,* baikizhe ntambo ya ku bisapi byendesha bwato, kebetukumpule ne kwitukumpula. 18 Bino na mambo a kuba bwato bebukumpwilenga ku luvula, juba jalondejilepo batatwile kutayapo bipe bimo byajinga mu bwato kuba’mba bupeele. 19 Kabiji pa juba ja busatu batayile na maboko abo bingijisho bya kwingijisha ku bwato.
20 Juba ne tubangabanga byo byabujilenga kumweka pa moba avula ne luvula mukatampe byo etukatezhenga, luketekelo lwetu lonse lwa kupuluka lwapwile. 21 Bonse bajinga mu bwato byo baikele na nzala pa kimye kyabaya, Paulo waimene pakachi kabo ne kwibambila’mba: “Anweba bakwetu, umvwe mwaumvwijile byo nemubuujile ne kubula kufumako ku Keleta na bwato, inge kechi mwamona bino bya malwa ne bono ne.+ 22 Pano bino, mbena kwimutundaika namba kosai, mambo kafwako muntu* nangwa umo mwi anweba usakonaika ne, posotu bwato bonka. 23 Bufuku bwa lelo, malaika+ wa Lesa wami ye ñingijila mwingilo wazhila waji kwimana kwi amiwa, 24 ne kuñambila’mba: ‘Paulo, kuchina ne. Wafwainwa kukemana kwi Kesala,+ kabiji Lesa wakupa bonse bo uji nabo mu bwato.’ 25 Onkao mambo, anweba bakwetu kosai, mambo naitabila Lesa namba monka mo bambuujila mo mo kikamwekela. 26 Bino bwato buketonaikila pa jikuji jingi.”+
27 Kabiji pa kufika bufuku bwa bu 14, byo betukumpawilenga kuku ne kuku pa Kalunga ka Mema ka Adalia, pakachi ka bufuku bakyabusha batatwile kulanguluka’mba pano ketunangijile ku mutunta. 28 Kabiji byo batayilepo kya kupiminako, bataaine’mba palepa mikwamba 20;* onkao mambo, baendeleko pacheche, kabiji byo bapimine jibiji, bataaine’mba palepa mikwamba 15.* 29 Kabiji na mambo a kuchina’mba twakeya kwipaaka ku mabwe, baikizhe bimiko bina kunyuma ya bwato ne kulombela’mba bukye bukiji. 30 Bino bakyabusha byo bakebele kunyemamo mu bwato ne kwikizha kabwato kacheche mu kalunga ka mema kuba’mba babepekezhe kuya na kwikizha bimiko kulutwe ya bwato, 31 Paulo waambijile mukulumpe wa bashilikale ne bashilikale amba: “Inge bano banabalume babule kwikala mu bwato, kechi musakupuluka ne.”+ 32 Kepo bashilikale bachibile ntambo ya kabwato kacheche ne kwikaponesha.
33 Kabiji byo bwayilenga na kukya, Paulo watatwile kwibatundaika bonse kuba’mba baje, kabiji waambile’mba: “Kufika lelo, mwaikala na nzala moba 14 saka mupembelelatu, kwa kubula kujapo nangwa kamo ne. 34 Onkao mambo, mbena kwimutundaika kujapo kajo; pa kuba’mba mubule kufwa, mambo kafwako lusuki nangwa umo wa ku mitwe yenu usakonaika ne.” 35 Byo apwishishe kwamba bino, washikwile shinkwa ne kusanta kwi Lesa bonse saka bamutala, kepo amutebawile ne kutatula kuja. 36 Onkao mambo, bonse bakosele, kabiji batatwile kuja kajo. 37 Bantu* bonse pamo mu bwato twajinga 276. 38 Byo baikuchile, batayile wichi mu kalunga ka mema kuba’mba bwato bupeele.+
39 Byo bwakile lukelo, kechi beiyukile mpunzha ne,+ bino bamwene kitulu kyaselebala kya busenga ne pano po po baesekele’mba bemike bwato. 40 Ponkapo bachibile bimiko ne kwibiponesha mu kalunga ka mema, kabiji pa kyonkakya kimye bakasulwile ntambo ya byalulula bwato; kabiji byo bakasulwile kisapi kya kulutwe ne kwikitazha kwafuminenga luvula, bayile ku kitulu. 41 Byo bafikile pa mwaba, bwato bwatapamine mu buchichi kabiji ntonga yakakachijilemo ne kukankalwa kushetumukapo, kabiji bwatatwile kubazauka kunyuma na manyaki.+ 42 Na mambo a kino, bashilikale basakile’mba bepaye bakaili, kuba’mba muntu nangwa umo abule kufwenka ne kunyema. 43 Bino mukulumpe wa bashilikale byo asakile kupulusha Paulo, wibakainye kuba kyo balangulukile. Wakambizhe bonse bayuka kufwenka amba bekale batanshi kwitaya pa mema ne kutuntukapo, 44 bino bakwabo balondele panyuma, bamo pa mapulanga ne bakwabo pa bitebu bya bazaukile ku bwato. Onkao mambo, bonse bafikile kumutunta saka baji batuntulu.+