Ezikyo
22 Kabiji Yehoba wañambijile jikwabo amba: 2 “Obewa mwana muntu, nanchi winengezha kuya na kwamba bya kuchibila* mambo muzhi wazhatwa na mambo a mashi+ ne kumulengela kuyuka byubilo byanji byonse bya bunya nyi?+ 3 Ukambe’mba, ‘Nkambo Mfumu Yehoba waamba’mba: “Obewa muzhi wichila mashi,+ kimye kyobe kya kukuzhachisha kikafika,+ yenka obewa wizhilulula na bankishi ba bunya.*+ 4 Wazhatwa na mambo a mashi o waichijile+ ne kwizhilulula na bankishi bobe ba bunya.+ Wikepeshesha moba obe, ne myaka ya bumi bobe yapwa. O ene mambo o nkakulengulwisha ku bisaka bya bantu ne byalo byonse bikakwendelekanga.+ 5 Byalo biji pepi ne biji kwalepa bikakwendelekanga,+ obewa muzhi watumbalala mu bya bunya kabiji muji kiwowo. 6 Umvwa! Babinemanga bonse ba bena Isalela baji mwi obewa, babena kwingijisha bulume bo baji nabo kwichijilamo mashi a bantu.+ 7 Mwi obewa muji bantu babena kulama bibi bashabo ne bainabo.+ Bajiila bantu ba ku byalo bingi bintu kya lunkanankana ne kuyanjisha mwana wabula bashanji* ne mwanamukazhi wafwilwa.”’”+
8 “‘Walengulula nzubo yami yazhila kabiji wazhilulula masabado ami.+ 9 Mwi obewa muji bantu baluntepentepe baimenatu pa kwichila mashi a bantu.+ Baja kajo ko batapishisha bankishi pa mitumba ne kuba bintu bya bunya mwi obewa.+ 10 Mwi obewa muji bantu bazhilulula mwanya* wa bashabo+ kabiji balaala na banabakazhi baji ku mwenzhi.+ 11 Monka mwi obewa, muji bantu bamo boba bukende na ba muka bakwabo,+ bakwabo nabo bakuna bako babo ba bakazhi,+ kabiji bakwabo balaala na banyenga yabo bo basemwa nabo jivumo jimo.+ 12 Mwi obewa, muji bantu batambula mazhikakanwa kuba’mba bechile mashi a bantu.+ Obewa upotesha bintu kuba’mba umwenemo nsubu*+ ne kukongwesha kaloba kabiji utambula mali ku bakwenu kya lunkanankana.+ Obewa wamvulama amiwa,’ byo byaamba Nkambo Mfumu Yehoba.
13 “‘Tala! Amiwa napopwela mu maboko ami pa kumona bintu byo wajiila bantu na mambo a bujimuku bobe ne na mambo a kwichila mashi a bantu baji mwi obewa. 14 Nanchi ukatwajijila kuchinchika ne kukosa kimye kyo nkakuzhachisha nyi?+ Amiwa Yehoba yami naamba kabiji nkekyuba. 15 Nkakupalañenya mu bisaka bya bantu ne mu byalo bingi,+ kabiji nkakulekesha kuba bintu bya bunya.+ 16 Bakakulengulula ku bisaka bya bantu, kabiji po po ukayuka’mba amiwa yami Yehoba.’”+
17 Kabiji Yehoba wañambijile jikwabo amba: 18 “Obewa mwana muntu, bena Isalela baikala ke bincha kwi amiwa. Bonse bajitu nobe mukuba, kyela kyanekena kitoka, kyela kya kapotwe ne kyumbu kiji mu kisha kya mujilo. Baaluka ke ndochi yo bafumya ku siliva.+
19 “Onkao mambo, Nkambo Mfumu Yehoba waamba’mba: ‘Bonse mwaikalatu ke ndochi,+ kyo kyo mbena kwimukonkenya pamo monka mu Yelusalema. 20 Byonkatu byo bataya siliva, mukuba, kyela kya kapotwe, kyumbu ne kyela kyanekena kitoka mu kintu kimo kuba’mba banyukwilemo mujilo ne kwibisungulula, ne amiwa byo byo nkemukonkenya pamo na mambo a bukaji bwami, kabiji nkemunyukwila mujilo ne anweba mukasunguluka.+ 21 Nkemukonkanya pamo ne kwimunyukwila mujilo wa bukaji bwami+ kabiji mukasungulukila mukachi ka muzhi.+ 22 Byonkatu siliva byo bamusungulwila mu kisha kya mujilo, ne anweba byo byo mukasungulukila mukachi ka muzhi; kabiji mukayuka’mba amiwa Yehoba yami nemuzhingijila.’”
23 Kabiji Yehoba wañambijile jikwabo amba: 24 “Obewa mwana muntu, ambila muzhi amba, ‘Obewa wi muzhi ye bakabula kutokesha nangwa kunokeshamo mvula mu juba ja bukaji. 25 Bangauzhi banji bamulukuka muzhi+ nobe bokwe ubuluma ubena kuja nyama.+ Babena konauna bantu.* Babena kwangata bantu bintu bya buneme. Balengela banabakazhi bavula mu kyalo kwikala bituzhi. 26 Bañanga bajimo balala mizhilo yami+ kabiji batwajijila na kuzhilulula nzubo yami yazhila.+ Bakankalwa kuyuka bintu byazhila ne byabula kuzhila,+ kabiji bakankalwa kufunjisha bantu mwapusena bintu byabula kuzhila ne byazhila.+ Bakana kulama masabado ami kabiji bandengulwisha mukachi kabo. 27 Babinemanga baji mwi aye baji nobe misuka ibena kuja nyama; balukukañana ne kwipaya bantu* kuba’mba bamwenemo bintu mu bujimbijimbi.+ 28 Pakuba bangauzhi banji bavweta pa byubilo byabo byatama uba nobe babena kushinka milala ya lubumbulu na maloba atoka. Bamona bimwesho bya bubela ne kuponga bya bubela+ kabiji bamba’mba: “Nkambo Mfumu Yehoba waamba’mba,” bino Yehoba saka abula kwambapo kintu nangwa kimo ne. 29 Bantu ba mu kyalo bangata bakwabo bintu mu bujimuku, bebila bantu bintu+ ne kuyanjisha bakajilwa ne bayanji, kabiji bajiila bantu ba ku byalo bingi bintu kya lunkanankana ne kubula kwibachibila mambo mo aolokela.’
30 “‘Nakebelenga muntu umo mukachi kabo wafwainwe kushimukulula nsakwa ya muzhi nangwa kwimana pa kipenze kulutwe yami kwimenako ba mu kyalo pa kuba’mba muzhi babule kumonauna,+ pano bino nakankelwe kumumona. 31 Onkao mambo, nkebazhingijila ne kwibepaya na bukaji bwami buteema nobe mujilo. Kabiji nkebakambula monka mwayila byubilo byabo byatama,’ byo byaamba Nkambo Mfumu Yehoba.”