Masalamo
Lwimbo wa bulanda* Davida ye aimbijile Yehoba na mambo a byambo bya kwa Kushi mwina Benjamina.
7 Anweba Yehoba Lesa wami, mwi anweba mo mo mfyama.+
Mpulushai ne kumpokolola ku bonse babena kummanyika.+
2 Inge ne, basakuntabaula mu bipimvwa bipimvwa byonka byuba bokwe,+
Ne kunsenda kwa kubula wa kumpokololako.
3 Anweba Yehoba Lesa wami, umvwe nalenga mambo,
Nangwa umvwe naubapo kintu kyatama,
4 Kabiji inge namulenga mambo awa ungubila byawama,+
Nangwatu inge napukula bintu bya mulwanyi wami kwa kubula mambo,*
5 Mulekai mulwanyi wami ampupile ne kuntaana;*
Mulekai anyantawile bumi bwami panshi
Ne kulengela lukumo lwami konaikila mu lukungu. (Selah)
6 Anweba Yehoba, imanai na bukaji bwenu;
Kanyai bukaji bwa balwanyi bami;+
Buukai munkwashe ne kukambizha’mba kwikale bunchibamambo bwaoloka.+
7 Bisaka bya bantu bimuzhokoloke;
Kabiji mukebichibila mambo kufuma monka mwiulu.
8 Yehoba ukachibila bantu mambo abo.+
Anweba Yehoba, nchibilai mambo monka mwayila bololoke bwami
Kabiji monka mwayila kulumbuluka kwami.+
9 Pwishai mingilo yatama ya babi.
Bino kwashai baoloka,+
Mambo anweba mwi Lesa waoloka+ upimapima michima+ ne milanguluko ya mukachi mwine.*+
10 Lesa ye jikebo jami,+ ye Mupulushi wa boba baoloka michima.+
11 Lesa ye Mutonyi waoloka,+
Kabiji Lesa wamba pa luzhachisho lwa babi moba onse.
12 Inge muntu wabula kulapila,+ aye unona mpoko yanji;+
Unengezhezha jimo buta bwanji bwa mukanda ne kwibuvwemuna.+
13 Aye unengezha bilwilo byanji bya kwipayañenako;
Unengezhezha jimo miketo yanji iteema mujilo.+
14 Talai muntu waimita bubi;
Wimita bya malwa ne kusema bubela.+
15 Upoya kimbo kyazhika,
Bino uponena mu kimbo kyonka kyo apoya.+
16 Makatazho anji akabwela pa mutwe wanji mwine;+
Ne byubilo byanji bya bukapondo bikabwela pa lumbwichi wanji.