Danyela

5 Mfumu Beleshaza+ watekejile babinemanga banji 1,000 kijiilo kikatampe kabiji watomenenga nabo binyu.+ 2 Beleshaza byo apendelwe, wakambizhe kuba’mba bamuletele bipe bya ngolode ne bya siliva, shanji aye Nebukaneza byo afumishe mu nzubo ya Lesa mu Yelusalema,+ pa kuba’mba mfumu, babinemanga banji, bantombo banji ne bakazhi banji bakwabo batomenemo. 3 Ponkapo baletele bipe bya ngolode byo bafumishe mu nzubo ya Lesa mu Yelusalema, kabiji mfumu, babinemanga banji, bantombo banji ne bakazhi banji bakwabo batomejilemo. 4 Byo batomene binyu, batendekele kutakaika balesa ba ngolode, ba siliva, ba mukuba, ba kyela kya kapotwe ne ba mabwe.

5 Pa kyonkakya kimye, minwe ya muntu yamwekele ne kutendeka kunemba pa lubumbulu watalañene na kya kutulapo lampi mu jilapa ja mfumu, kabiji mfumu wamwenenga kuboko byo kwanembelenga. 6 Ponkapo kilungi kya mfumu kyaalukile,* bintu byo alangulukilengapo byamulengeshe moyo kabiji tupole twanji twazukuminenga+ ne manungo anji atendekele kwipaaka.

7 Kabiji mfumu waichile boba bingelekezha, bena Kalodeya* ne bashayuka ba tubangabanga.+ Mfumu waambijile banabalume ba maana ba mu Babilona amba: “Muntu yense usakutanga bino byambo ne kundumbulwila mo byatala nsakumuvwika bivwalo byachiluluka, kumukobeka bupela bwa ngolode mu nshingo+ kabiji ukekala kalama wa busatu mu bufumu.”+

8 Ponkapo banabalume bonse ba maana ba mfumu batwelele mo ajinga, pano bino, bakankelwe kutanga byobya byambo nangwa kumulumbulwila mfumu mo byatala.+ 9 Onkao mambo, Mfumu Beleshaza waakaminwe bingi ne kilungi kyanji kyaalukile; kabiji babinemanga banji kibashinkile bingi bulaka.+

10 Na mambo a byambo byaambile mfumu ne babinemanga banji, inamfumu watwelele mu kibamba mwakujiila. Inamfumu waambile’mba: “Anweba mfumu mwikale myaka ne myaka. Kange muleke milanguluko yenu imulengele kwikala na kijikila ne kilungi kyenu kyaluke ne. 11 Mu bufumu bwenu muji muntu* uji na mupashi wa balesa bazhila. Mu moba a bashenu, aye wamwesheshe’mba wayuka bintu, uji na milangwe, kabiji uji na maana nobe a balesa.+ Ba Mfumu ba Nebukaneza bashenu bamutongwele kwikala mukulumpe pa bañanga ba lubuko, ba bingelekezha, bena Kalodeya* ne bashayuka ba tubangabanga;+ bino byo byaubile bashenu, anweba mfumu. 12 Pakuba Danyela ye batumbile jizhina ku mfumu amba Beleteshaza+ wajinga na mupashi wa kuyuka bintu, maana ne milangwe ya kulumbulula biloto, bishimpi ne kusolola byakatazha.*+ Mwane mwitai Danyela emulumbulwilebyo.”

13 Byonkabyo, Danyela bamuletele ku mfumu. Kabiji mfumu wamushikishe Danyela amba: “Nanchi yobe Danyela uji mu bazha ba mu Yuda,+ batata bamfumu ye bafumishe mu Yuda nyi?+ 14 Naumvwa kuba’mba uji na mupashi wa balesa,+ kabiji wayuka bintu, uji na milangwe ne maana akila.+ 15 Pakuba bano banabalume ba maana ne ba bingelekezha baji kwibaleta kwi amiwa kuba’mba batange bino byambo ne kundumbulwilabyo, bino abo baji kukankalwa kwibilumbulula.+ 16 Bino naumvwa kuba’mba obewa wakonsha kulumbulula+ ne kusolola byakatazha.* Pano umvwe utange bino byambo ne kwibindumbulwila, nsakukuvwika bivwalo byachiluluka ne kukukobeka bupela bwa ngolode mu nshingo, kabiji ukekala kalama wa busatu mu bufumu.”+

17 Danyela wamukumbwile mfumu amba: “Mwane lamai bya bupe byenu ne kwibipana ku bantu bakwabo. Pano bino, anweba mfumu, amiwa nsakwimutangila bino byambo ne kwimulumbulwila mo byatala. 18 Anweba mfumu, Lesa Mwine Wakila wapele bashenu ba Nebukaneza bufumu, bulume, lukumo ne buneme.+ 19 Na mambo a bulume bo bebapele, mitundu yonse ya bantu, bisaka bya bantu ne bantu bamba milaka yapusana pusana, bebakaminwenga bingi.+ Bantu bo bakebanga kwipaya bebepayanga, kabiji bo babulanga kukeba kwipaya bebalekanga, yense ye bakebanga kutumbijika bamutumbijikanga ne yense ye bakebanga kupelula bamupelulanga.+ 20 Pano bino, byo belundumikile ne kukosesha muchima wabo ne kuba bintu na bwitote,+ bebafumishe pa jitanda ja bufumu bwabo, ne munema wabo yense bebangachileye. 21 Bebafumishe ku bantu ne kwibalula muchima kwikala nobe nyama kabiji baikelenga na bambongolo ba mungye. Bajiilenga nsono nobe bañombe, bazobelenga na kime kufikatu ne byo bayukile’mba Lesa Mwine Wakila ye Kalama mu bufumu bwa bantu, kabiji amba ye upana bufumu ku muntu yense ye akeba.+

22 “Pano bino, anweba baana babo, ba Beleshaza kechi mwipelula ne, nangwa kya kuba bino byonse mwibiyuka. 23 Anweba mwitumbijika ne kulengulula Nkambo wa mwiulu,+ kabiji mwatumine bantu kwimuletela bipe bya mu nzubo yanji.+ Kabiji anweba ne babinemanga benu, bantombo benu ne bakazhi benu bakwabo mwatomejilenga binyu mu bino bipe kabiji mwatakaikilenga balesa ba siliva, ba ngolode, ba mukuba, ba kyela kya kapotwe, ba bichi ne ba mabwe, balesa babula kumona, kumvwa nangwa kuyuka kintu nangwa kimo.+ Kabiji kechi mwatumbijika Lesa ulama bumi bwenu+ ne kwimutangijila mu mashinda enu onse ne. 24 Onkao mambo, Lesa wajikutuma kuboko kwiya na kunemba bino byambo.+ 25 Kwaji kunemba’mba: MENE, MENE, TEKEL ne PARSIN.

26 “Muno mo mwatala bino byambo: MENE kilumbulula’mba, Lesa wabala moba a bufumu bwenu ne a kwibufumyapo.+

27 “TEKEL kilumbulula’mba, bemupima pa shikelu kabiji mwapelelelatu.

28 “PERES kilumbulula’mba, bufumu bwenu bebwabanyapo pabiji ne kwibupana ku bena Meda ne bena Pelisha.”+

29 Ponkapo Beleshaza wakambizhe kuba’mba Danyela bamuvwike bivwalo byachiluluka ne kumukobeka bupela bwa ngolode mu nshingo yanji, kabiji batayile mbila kuba’mba ye kalama wa busatu mu bufumu.+

30 Bonkabwa bufuku, Beleshaza mfumu wa bena Kalodeya bamwipayile.+ 31 Kabiji Daliusa+ mwina Meda ye waswaine pa bufumu; kabiji wajinga na myaka 62.