147 Totai Yehoba!
Kyawama kwimba nyimbo ya kutota Lesa wetu;
Byo kyawamapo ne byo kyayilamo kumutota!+
2 Yehoba ubena kushimika Yelusalema;+
Ukonkanya pamo bena Isalela bapalañenejilemo.+
3 Ubuka balajika michima;
Ne kukasa pa bilonda byabo.
4 Ubala tubangabanga;
Witutela tonse pa mazhina ato.+
5 Nkambo yetu ye mukatampe kabiji ye wa bulume bukatampe;+
Maana anji kechi aji na pa kupelela ne.+
6 Yehoba usuntula bakimote,+
Pakuba babi wibataya panshi.
7 Imbai kwi Yehoba na kusanta;
Imbai nyimbo ya kutota Lesa wetu na kyansa,
8 Yenka uvweta jiulu na makumbi,
Yenka unokesha mvula pa ntanda,+
Yenka ukomesha nsono+ pa mitumba.
9 Upa banyama kajo,+
Ne baana ba bikwangala bekakeba.+
10 Aye kechi usekela mu bulume bwa mbili;+
Nangwa kusekela mu byenda lubilo muntu ne.+
11 Bino Yehoba usekela mu boba bamwakamwa,+
Mu boba bapembelela butemwe bwanji bubula kwaluka.+
12 Obewa Yelusalema, tumbijika Yehoba.
Obewa Ziona, tota Lesa wobe.
13 Aye ukosesha mipingilo ya binzhilo bya mizhi yobe;
Ubila bibusa baana bobe baji mwi obewa.
14 Uleta mutende mu nyaunda yobe;+
Ukupa wichi mwine wawamisha.+
15 Utuma mukambizho wanji pa ntanda;
Byambo byanji binyema nobe kalume wenda bukiji.
16 Uvweta ntanda na mabebe nobe mwemba utoka;+
Usalañanya mabebe nobe buto.+
17 Unokesha mvula wa mabwe nobe bukuku bwa kajo.+
Ñanyi wakonsha kuchinchika ku mashika anji?+
18 Utuma byambo byanji, kabiji bisungulula mema achimba.
Ulengela mwela wanji kupupa+ ne mema kupita.
19 Ubuula Yakoba byambo byanji,
Malamuna anji ne mizhilo yanji kwi Isalela.+
20 Kechi waubapo kintu kya uno mutundu ku bisaka bikwabo ne;+
Abyo kechi byayuka mizhilo yanji ne.
Totai Yehoba!+