Mitonyi

6 Bino bena Isalela baubile jikwabo bintu byatama kwi Yehoba,+ onkao mambo Yehoba wibapaine mu maboko a bena Mijanyi pa myaka itanu na ibiji.+ 2 Bena Mijanyi bamanyikilenga bena Isalela.+ Na mambo a bena Mijanyi, bena Isalela belengejile mapunzha* mwa kufyama mu mitumba, mu mayengo ne mu mapunzha akatezhe kufikako.+ 3 Bena Isalela inge bajima kajo, bena Mijanyi ne bena Amaleki+ ne ba ku Musela+ baiyanga na kwibalukuka. 4 Bebalukukanga ne kwibonawina kajo ka mu kyalo kukafika ne ku Gaza, ne kushatu bena Isalela kwa kubula kajo, kwa kubula mukooko nangwa ñombe nangwa mbongolo.+ 5 Mambo baiyanga na banyama babo ba kulela ne matente avula nobe nzhiye,+ kabiji abo ne bangamela babo kechi bakonsheshe kubalwa ne,+ kabiji baiyanga mu kyalo na kwikyonauna. 6 Onkao mambo, bena Isalela bebayanjishe bingi ku bena Mijanyi; kabiji bena Isalela bamujijiile Yehoba amba ebakwashe.+

7 Bena Isalela byo bamujijiile Yehoba amba ebakwashe na mambo a bena Mijanyi,+ 8 Yehoba watumijile bena Isalela ngauzhi wibabuujile’mba: “Abino byo byaamba Yehoba, Lesa wa Isalela amba, ‘Amiwa nemufumishe mu kyalo kya Ijipita ne kwimulupulamo mu nzubo ya buzha.+ 9 Onkao mambo, nemupokolwele mu maboko a bena Ijipita ne ku bonse bemumanyikilenga ne kwibapanga kwi anweba, kabiji nemupele kyalo kyabo.+ 10 Kabiji nemwambijile namba: “Amiwa yami Yehoba Lesa wenu.+ Kechi mwafwainwa kwakamwa balesa ba bena Amoli bena kyalo kyo mubena kwikalamo ne.”+ Bino kechi mwankookejile* ne.’”+

11 Kabiji malaika wa Yehoba waishile+ ne kwikala munshi ya kichi kikatampe kyajinga mu Ofula, kya kwa Yoashi mwina Abieza.+ Mwananji aye Gidiona+ wapujilenga wichi mu kya kufiinamo binyu kuba’mba eifye na mambo a kuchina bena Mijanyi. 12 Malaika wa Yehoba wamusolomokele ne kumwambila’mba: “Yehoba uji ne obewa,+ obewa kitonzhi.” 13 Ponkapo Gidiona wamwambijile’mba: “Mwane bandekeleko mambo nkambo yami, bino inge Yehoba uji ne atweba, mambo ka bino bintu byonse o bibena kwitumwekela?+ Nga mingilo yanji yonse ya kukumya iji kwepi itulondolwejile bashakulu betu amba,+ ‘Yehoba witufumishe mu Ijipita?’+ Pano Yehoba witutaya+ ne kwitupana mu maboko a bena Mijanyi.” 14 Yehoba wamutajile ne kumubuula’mba: “Yanga na bulume bo uji nabo, kabiji ukapokolola bena Isalela mu maboko a bena Mijanyi.+ Nanchi kechi yami nakutuma nenyi?” 15 Gidiona wamukumbwile’mba: “Anweba Yehoba. Nakonsha kupokolola byepi bena Isalela? Akitalai! Mukoka* wami ye mukoka mucheche mwi Manase, kabiji yami nabula kunema pa bonse ba mu nzubo ya batata.” 16 Bino Yehoba wamwambijile’mba: “Na mambo a kuba nkekala ne obewa,+ ukebatapa bena Mijanyi uba nobe muntu umo.”

17 Kepo aye amwambijile’mba: “Inge mwangubila bibusa, mmweshai kiyukilo kya kumwesha’mba yenu mubena kwamba ne amiwa. 18 Mwane kange mufumepo pano ne, poso byo nsakubwela na bupe bwami ne kwimupa.”+ Byonkabyo, aye wamwambijile’mba: “Nsakwikala ponka pano poso ubwele.” 19 Kabiji Gidiona wayile ne kunengezha mwana mbuzhi, kabiji walengele shinkwa wabula mbizho kwingijisha bunga bwa kipimo kya efa.*+ Wabikile nyama mu ntumbe ne masuku wiabikile mu mpuki; kepo ebiletele kwi aye ne kwibitula munshi ya kichi kikatampe.

20 Kabiji malaika wa Lesa wa kine wamwambijile’mba: “Shikula nyama ne shinkwa wabula mbizho wibibike popa pa jibwe jikatampe, kabiji witulwilepo ne masuku.” Kabiji aye waubile byonkabyo. 21 Kepo malaika wa Yehoba atanyikile kamama kajinga mu kuboko kwanji ne kwikakinka pa nyama ne pa shinkwa wabula mbizho, kabiji mujilo wateemene kufuma mu jibwe ne kusoka nyama ne shinkwa wabula mbizho.+ Ponkapo malaika wa Yehoba wazhimañene. 22 Gidiona po po ayukile’mba wajinga malaika wa Yehoba.+

Kepo Gidiona aambile’mba: “Mama, anweba Nkambo Mfumu Yehoba, namona malaika wenu kilungi na kilungi, anweba Yehoba!”+ 23 Bino Yehoba wamwambijile’mba: “Mutende ekale ne obewa. Kuba moyo ne;+ kechi usakufwa ne.” 24 Onkao mambo, konkakwa Gidiona washimikile kya kusokelapo bitapisho kwi Yehoba, kabiji bekitela’mba Yehoba ye Mutende*+ kufika ne lelo jino. Ne luno mo kikiji mu Ofula wa bena Abieza.

25 Bonkabwa bufuku Yehoba wamwambijile’mba: “Shikula mwana ñombe mulume wa bashobe, yenkawa mwana ñombe wa bubiji wa myaka itanu na ibiji, kabiji ukundule kya kusokelapo bitapisho kya kwa Baela kya bashobe, ne kutema kichi* kya mulumbulumbu kyazhila kiji kwipi.+ 26 Byo usakupwisha kushimika kya kusokelapo bitapisho kwi Yehoba Lesa wobe na mikuku ya mabwe peulu ya ino mpunzha yazhikijilwa, ushikule mwana ñombe wa bubiji ne kumulambula kwikala mulambo wa kusoka pa nkunyi ya kichi* kya mulumbulumbu kyazhila kyo usakutema.” 27 Onkao mambo, Gidiona wasendele bakalume banji jikumi ne kuba byonka byamubuujile Yehoba. Bino wachiine bingi ba mu nzubo ya bashanji ne bantu ba mu muzhi, kechi wikyubile mute ne, bino wikyubile bufuku.

28 Bantu ba mu muzhi byo babuukile lukelo, bamwene’mba kya kusokelapo bitapisho kya kwa Baela bekikundula ne kichi kya mulumbulumbu kyazhila kyajinga kwipi bekitema, kabiji mwana ñombe wa bubiji bamulambula pa kya kusokelapo bitapisho kyo bashimikile. 29 Beshikishenga mulwabo amba: “Ñanyi wauba kino kintu?” Byo bakebele kebele, baambile’mba: “Gidiona mwana wa kwa Yoashi ye wauba kino.” 30 Onkao mambo, bantu ba mu muzhi baambijile Yoashi amba: “Mulupule mwanobe kuba’mba afwe, mambo wakundula kya kusokelapo bitapisho kya kwa Baela ne kutema kichi* kya mulumbulumbu kyazhila kyajinga kwipi.” 31 Kepo Yoashi+ aambijile aba bamukatezhenga’mba: “Nanchi yenu mwafwainwa kulwilako Baela nyi? Nanchi mukeba kumupokolola nyi? Yense ubena kumulwilako bafwainwa kumwipaya lonka luno lukelo.+ Inge ye lesa, mulekai mwine elamwine,+ mambo muntu wakundula kya kusokelapo bitapisho kyanji.” 32 Kabiji pa jonkaja juba wamutumbile Gidiona amba Yelubaela* ne kwamba’mba: “Mulekai Baela mwine elamwine, mambo muntu wakundula kya kusokelapo bitapisho kyanji.”

33 Bena Mijanyi+ bonse ne bena Amaleki+ ne ba ku Musela bakonkene pamo;+ kabiji baabukile* Kimpachiko* kya Yezelela ne kutebelela konkakwa. 34 Kepo mupashi wa Yehoba aishile pe* Gidiona+ ne aye wavuminye lusengo,+ kabiji bena Abieza+ bamulondejile. 35 Watumine baluwe monse mu mukoka wa bena Manase, ne abo bamulondejile. Kabiji watumine baluwe monse mu mukoka wa bena Ashela ne wa bena Zebuluna ne wa bena Nafitali, kabiji bayile na kumutundaila.

36 Kepo Gidiona aambijile Lesa wa kine amba: “Inge mukapokolola bena Isalela kupichila mwi amiwa, byonkatu byo mwalayile,+ 37 nsakubika boya bwa mukooko pa kipujilo. Inge kime kikaletu ku boya, ne mushiji yense po buji ekale wauma, po po nsakuyuka namba mukapokolola bena Isalela kupichila mwi amiwa, byonkatu byo mwalayile.” 38 Ne kumweka kyamwekele byonkabyo. Byo abuukile lukelokelo juba jalondejilepo ne kukama boya, wakamineko mema a kime avula ku boya ayujile nsanyi ikatampe. 39 Nangwa byonkabyo, Gidiona waambijile Lesa wa kine amba: “Mwane kange mumbuukile bukaji ne, bino nswishai kwamba japelako. Nswishai ngeseke japelako na buno boya. Mwane boya bwikale bwauma bunke bwabo, ne kime kikale pa mushiji yense.” 40 Byonkabyo, Lesa waubile kino abwa bonka bufuku; boya bo bonkatu bwaumine, kabiji pa mushiji ponse pajinga kime.