Ezikyo

14 Kabiji bakulumpe bamo ba bena Isalela baishile ne kwikala po najinga.+ 2 Ponkapo Yehoba wañambijile’mba: 3 “Obewa mwana muntu, bano bantu bafuukulapo kulondela bankishi babo ba bunya,* kabiji babika kya kwituntulako kilengela bantu kulenga mambo. Nanchi nafwainwa kuswa namba bangipuzhe kintu nyi?+ 4 Pano isambe nabo ne kwibabuula’mba, ‘Nkambo Mfumu Yehoba waamba’mba: “Umvwe mwina Isalela wafuukulapo kulondela bankishi banji ba bunya, ne kubika kya kwituntulako kilengela bantu kulenga mambo, kabiji waya na kwipuzha ngauzhi, amiwa Yehoba nkamukumbula monka mwayila kuvula kwa bankishi banji ba bunya. 5 Nkalengela ba mu nzubo ya Isalela kwikala na moyo,* mambo bonse bansha ne kulondela bankishi babo ba bunya.”’+

6 “Onkao mambo, ambila bena Isalela amba, ‘Nkambo Mfumu Yehoba waamba’mba: “Bwelai kwi amiwa ne kusha bankishi benu ba bunya ne kusankilapo byubilo byenu byonse bya bunya.+ 7 Umvwe mwina Isalela nangwa muntu wafuma ku kyalo kingi wikala mu Isalela wipaatula mwine kwi amiwa ne kufuukulapo kulondela bankishi banji ba bunya ne kubika kya kwituntulako kilengela bantu kulenga mambo, kabiji waiya na kwipuzha ngauzhi wami,+ amiwa Yehoba yami nkamukumbula. 8 Amiwa nkamuzhingijila awo muntu ne kumwalula ke kayukilo ka kujimunako bantu ne kwikala ke kishimpi, kabiji nkamwipaya kumufumya mu bantu bami;+ po po mukayuka’mba amiwa yami Yehoba.”’

9 “‘Pano bino, umvwe ngauzhi bamutwala mungi ne aye waswa, ko kuba’mba amiwa Yehoba yami namutwala mungi awo ngauzhi.+ Nkatanyika kuboko kwami pe aye ne kumwipaya kufumya mu bantu bami bena Isalela. 10 Bonse babiji bakazhatwa na mambo abo bene; kabiji bintu bikalengela yewa waipuzha kuzhatwa na mambo, byo bikalengela ne ngauzhi naye kuzhatwa nao. 11 Kikekala bino pa kuba’mba bena Isalela bakabule kunsatukila ne kwizhilulula bene na mambo a byubilo byabo byatama. Kabiji abo bakekala bantu bami ne amiwa nkekala Lesa wabo,’+ byo byaamba Nkambo Mfumu Yehoba.”

12 Kabiji Yehoba wañambijile jikwabo amba: 13 “Obewa mwana muntu, umvwe ba mu kyalo bandenga mambo a kungalukamo, nkatanyikila kuboko kwami pe abo ne konauna kajo* kabo,+ kabiji nkebatumina kipowe kya nzala+ ne kwipaya bantu ne banyama bajimo.”+ 14 “Nkambo Mfumu Yehoba waamba’mba, ‘Umvwe bano bantu basatu, Nowa,+ Danyela+ ne Yoba+ bajinga mu kino kyalo, inge bo* bonkatu bapulukile na mambo a bololoke bwabo.’”+

15 “‘Nangwa inge naleta banyama bakaji mu kyalo kabiji abo bekilengela kwikala mwabula bantu* ne kulengela kyalo kushalatu masala, kafwako muntu nangwa umo ukapitamo ne, na mambo a banyama bakaji+ ba mungye.’ 16 Nkambo Mfumu Yehoba waamba’mba, ‘Byonkatu byo nji na bumi, umvwe bano bantu basatu bajinga monka mu kino kyalo, inge kechi bapulwishe baana babo ba balume nangwa ba bakazhi ne; inge bapulukiletu abo bene kabiji kyalo inge kyashajiletu masala.’”

17 “‘Nangwa umvwe naleta mpoko mu kyalo+ ne kwamba’mba: “Mpoko ipite mu kyalo” ne kwipaya bantu ne banyama bajimo,’+ 18 Nkambo Mfumu Yehoba waamba’mba, ‘Byonkatu byo nji na bumi, umvwe kya kuba bano bantu basatu bajinga monka mu kino kyalo, inge kechi bapulwishe baana babo ba balume nangwa ba bakazhi ne; inge bapulukiletu abo bene kwapwa.’”

19 “‘Nangwa inge natuma mwalo mu kyalo+ ne kwichila mashi a bantu bavula ne banyama na mambo a bukaji bwami,’ 20 Nkambo Mfumu Yehoba waamba’mba, ‘Byonka byo nji na bumi, umvwe Nowa,+ Danyela+ ne Yoba+ bajinga monka, inge kechi bapulwishe baana babo ba balume nangwa ba bakazhi ne; inge bapulukiletu abo bene* na mambo a bololoke bwabo.’”+

21 “Nkambo Mfumu Yehoba waamba’mba: ‘Byo byo kikekala ne kimye kyo nkatuma bintu bina bya kukambwilako*+ Yelusalema, ko kuba’mba, mpoko, kipowe kya nzala, banyama bakaji ba mungye, ne mwalo+ kabiji bikepaya bantu ne banyama bajimo.+ 22 Nangwa byonkabyo, aba bakashalamo, baana ba balume ne baana ba bakazhi bakapuluka ne kwibalupulamo.+ Byo bakeya kwi anweba ne byo mukamona mashinda ne byubilo byabo byatama, kikemutekenesha bingi pa mambo a bya malwa byo naletele pa Yelusalema.’”

23 “Nkambo Mfumu Yehoba waamba’mba, ‘Kikemutekenesha bingi inge mwamona mashinda ne byubilo byabo byatama, kabiji mukayuka’mba namukambwile kwesakana na byubilo byanji.’”+