Yelemiya
1 Bino byo byambo byaambile Yelemiya* mwana Hilikiya wajinga ñanga waikalanga mu muzhi wa Anatota+ mu kyalo kya Benjamina. 2 Byambo bya kwa Yehoba byaishile kwi aye mu moba a kwa Yosiya+ mwana wa kwa Amonyi+ mfumu wa Yuda, mu mwaka wa bu 13 wa bukalama bwanji. 3 Kabiji wisambile nanji jikwabo mu moba a bukalama bwa kwa Yehoyakimu+ mwana wa kwa Yosiya mfumu wa Yuda, kufikatu ne ku mpelo ya mwaka wa bu 11 wa bukalama bwa kwa Zedekiya+ mwana wa kwa Yosiya mfumu wa Yuda, kufika ne kimye bangikazhi ba mu Yelusalema kyo bebatwajile mu buzha mu ñondo wa butanu.+
4 Yehoba wañambijile’mba:
5 “Saka nkyangye kukulenga munda mwa inobe, amiwa nakuyukile,*+
Kabiji saka ukyangye kusemwa,* nakusajile kwingila mwingilo wazhila.*+
Nakutongwele kwikala ngauzhi ku bisaka bya bantu.”
6 Pakuba amiwa naambile namba: “Mama, anweba Nkambo Mfumu Yehoba!
Amiwa kechi nayuka kwamba ne,+ mambo nkijitu kalombwana.”*+
7 Ponkapo Yehoba wañambijile’mba:
“Kange wambe’mba, ‘Nkijitu mwanyike ne.’
Mambo obewa wafwainwa kuya ku bantu bonse bo nkakutumako,
Kabiji wafwainwa kwibabuula bintu byonse byo nkakukambizha.+
8 Yehoba waambile’mba, kange wibachine na mambo a mwekelo yabo ne,+
Mambo ‘amiwa nji nobe, kabiji nkakupokolola.’”+
9 Ponkapo Yehoba watanyikile kuboko kwanji ne kunkwata pa kanwa.+ Kepo Yehoba añambijile’mba: “Nabika byambo byami mu kanwa kobe.+ 10 Umvwa, juba ja lelo amiwa nakupa luusa pa bisaka bya bantu ne pa bufumu, lwa kutupula ne kukundula, lwa konauna ne kuponesha, lwa kushimika ne kujimba.”+
11 Kabiji Yehoba wanshikishe’mba: “Yelemiya, ñanyi kintu kyo wamona?” Amiwa namukumbwile’mba: “Namona musampi wa kichi kya amonde.”*
12 Kabiji Yehoba wañambijile’mba: “Bintu byo wamona byo ibyo, mambo amiwa nakebesha bingi kufikizha bintu byo naamba.”
13 Yehoba wanshikishe ja bubiji amba: “Ñanyi kintu kyo wamona?” Amiwa namukumbwile’mba: “Namona mwipika* ubena kubila* pa mujilo, kabiji wavundamina ku kabeta ka ku buyeke ne kusendamina ku kabeta ka ku bulenge.” 14 Ponkapo Yehoba wambuujile’mba:
“Bya malwa bikafumina ku kabeta ka ku buyeke
Ne kufikila bantu bonse bekala mu kyalo.+
15 Mambo Yehoba waamba’mba, ‘Amiwa mbena kwita mikoka yonse ya mu bufumu bonse bwa ku kabeta ka ku buyeke,+
Kabiji bakeya; bamfumu bakabika matanda abo
Pa bibelo bya muzhi wa Yelusalema,+
Ne kulukuka masakwa anji onse amuzhokoloka
Ne mizhi yonse ya mu Yuda.+
16 Kabiji nkebabuula byo nkebachibila mambo pa bubi bwabo bonse,
Mambo bangalukamo,+
Kabiji babena kusoka bya kufutumuna ku balesa bangi+
Ne kufukamina bintu byo balenga.’+
17 Pano bino, wafwainwa kwinengezha,*
Kabiji wafwainwa kwimana ne kuya na kwibabuula bintu byonse byo nakukambizha.
Kange wibachine ne,+
Kuchina’mba nakakulengela kwikala na moyo na mambo a abo.
18 Mambo juba ja lelo amiwa nakwalula kwikala ke muzhi wakosa,
Kwikala jishiki ja kyela kya kapotwe ne nsakwa ya mukuba ku bantu bonse ba mu kyalo,+
Ku bamfumu ba mu Yuda ne babinemanga banji,
Ku bañanga bo aji nabo ne bantu ba mu kyalo.+
19 Kabiji abo bakalwa ne obewa,
Pano bino, kechi bakakushinda ne,
Mambo Yehoba waamba’mba, ‘Amiwa nji nobe, kabiji nkakupokolola.’”+