Yelemiya
8 Yehoba waamba’mba, “Pa kyokya kimye, bikupa bya bamfumu ba bena Yuda, ne bya babinemanga babo, ne bya bañanga, ne bya bangauzhi ne bikupa bya bantu bekala mu Yelusalema, bakebizhiikula mu bilende byabo. 2 Bikupa byabo bakebimwesha patoka ku juba, ku ñondo ne ku tubangabanga ne ku bintu byonse bya mwiulu byo batemenwe, ku byo baingijilanga, ku byo balondelanga, ku byo bakebanga ne kwibifukamina.+ Kechi bakebikonkanya pamo nangwa kwibizhiika ne. Bikekalatu nobe mbolezha mu mushiji.”+
3 Yehoba wa mabumba waamba’mba, “Bakashalapo ba mu kino kisemi kyatama bakapuluka bakasalapo kufwa kukila kwikala na bumi mu mapunzha onse mo nebapangila.”
4 “Kabiji ukebabuule’mba, ‘Yehoba waamba’mba:
“Nanchi bakapona kwa kubula kubuukapo jibiji nyi?
Umvwe muntu waleka kuba bintu byatama, nanchi mukwabo naye kechi ukaleka kuba bintu byatama nenyi?
5 Mambo ka bano bantu ba mu Yelusalema o batwajijilatu kubula bukishinka?
Bakakachila ku bujimbijimbi;
Bakana kuleka kuba byatama.+
6 Amiwa nebatelekelenga bingi, pano bino, bintu byo baambilenga kechi byawamine ne.
Kafwako muntu nangwa umo walapijile ku bubi bwanji nangwa kwamba’mba, ‘Ñanyi kintu kyo nauba?’+ ne.
Bonse batwajijila kulondela byuba bakwabo nobe mbili ubena kuvundumuka kuya ku nkondo.
7 Ne bañonyi bo batela’mba ñendabwala bayuka kimye kyabo;*
Katela, kamimbya ne pwele* bonse bayuka kimye kyabo kya kubwelelamo.*
Pakuba bantu bami kechi bayuka bunchibamambo bwa Yehoba ne.”’+
8 ‘Pano anweba mwamba byepi amba: “Tuji na maana ne mizhilo* ya Yehoba tuji nayo”?
Pano bino, kinembesho*+ kya bubela kya banembeshi bekingijishatu kunembelako bintu bya bubela.
9 Bantu ba maana bebalengesha bumvu.+
Bebazakamisha kabiji bakebakwata.
Bakana byambo bya Yehoba,
Pano ñanyi maana o baji nao?
10 Onkao mambo, nkapana bakazhi babo ku banabalume bangi,
Majimi abo nkeapana ku bantu bangi;+
Mambo kufuma ku mwanyike kufika ne ku mukulumpe, bonse bamwena bintu mu jishinda jatama;+
Kutatwila ku ngauzhi kufika ne ku ñanga, bonse batambula mazhikakanwa.+
11 Kabiji bajimbaika bantu bami na kwibabuka bilonda byabo ne kwibambila’mba,
“Kuji mutende! Kuji mutende!”
Bino saka kwabula mutende.+
12 Nanchi bomvwa bumvu pa bintu bya bunya byo boba nyi?
Kechi bomvwa bumvu nangwa pachechetu ne!
Kabiji kechi bayuka ne bumvu byo buji ne!+
Onkao mambo, bakafwila pamo na boba bo bakepaya.
Byo nkebakambula, baketuntula.’+ byo byaamba Yehoba.
13 ‘Byo nkebapwizha pamo, nkebavizhatu bonse shata,’ byo byaamba Yehoba.
‘Kechi kukashalapo mañanzañanza nangwa amo ku kichi ne, nangwa makuyu ku kichi kya mukuyu ne, kabiji mabuula abyo akooma.
Ne bintu byo nebapele bikapwa.’”
14 “Nanchi twaikela ka kuno?
Twayai twikonkanye pamo tutwele mu mizhi yakosa+ ne kufwila monka.
15 Twatengejilenga mutende, bino kafwako kyawama kyaishile ne,
Ne kimye kya kubukwa, bino kwaishiletu bintu bilengesha moyo!+
16 Kupumbula kwa bambili kubena kumvwanyikila mu muzhi wa Danyi.
Umvwe bambili ke bapumbule,
Kyalo kyonse kitenkena.
Beya na konauna kyalo ne bintu byonse bijimo,
Muzhi ne bantu bekalamo.”
17 Yehoba waamba’mba, “Amiwa mbena kwimutumina miloolo,
Miloolo ya bulembe yo mwakonsha kukankalwa kufwomona,
Kabiji ikemusuma.”
18 Nji na bulanda bubula kupwa;
Napopomenwa.
19 Kuji babena kukeba bukwasho bekala ku kyalo kiji kwalepa
Ba mu balongo bami, babena kwamba’mba:
“Nanchi Yehoba kechi uji mu Ziona nenyi?
Nanchi kechi muji mfumu nenyi?”
“Mambo ka o banzhingijisha na mambo a bankishi babo ba kusonga,
Ne na balesa babo batu?”
20 “Kimye kya kunowa kyapwa, ne kimye kya mayoo kyapita,
Pano bino, atweba kechi twapuluka ne!”
21 Kyankola bingi ku muchima na mambo a kumanama kwa bantu bami;+
Nji bingi na bulanda.
Bya malwa byamfikila.
22 Nanchi mu Gileada+ kechi muji manyi a balasama* nenyi?+
Nanchi kafwamo muntu ubukañana* nyi?
Mambo ka bantu bami o babujila kwikala na bumi bwawama?+