Yelemiya
9 Nanchi kine inge mutwe wami wayula mema,+
Ne meso ami inge ajinga nobe masulo a mipolo!
Inge njila mute ne bufuku
Na mambo a balongo bami bo baipaya.
2 Umvwe najinga na mpunzha mu kiselebwa mwa kukokolokela bakañenda!
3 Bakonkomeka lujimi wabo nobe buta bwa mukanda;
Mu kyalo mwakumbanatu bubela ne bantu babula bukishinka.+
Yehoba waamba’mba, “Abo babena kuyatu na kutaminakotu,
Kabiji kechi bañumvwina ne.”+
4 “Muntu yense ajimuke na mukwabo mo bekela,
Kabiji kechi mwafwainwa kukinka manungo mu balongo benu ne.
5 Bantu bonse pa muntu pa muntu bebepa mulwabo,
Kafwako nangwa umo wamba bintu bya kine ne.
Bafunjisha njimi yabo kwamba bintu bya bubela.+
Bekookesha bene na kuba bintu byatama.”
6 Yehoba waamba’mba, “Anweba mubena kwikala mu bantu ba bujimbijimbi.
Na mambo a bujimbijimbi bwabo, kechi bakeba kungyuka ne.”
7 Onkao mambo, Yehoba wa mabumba waamba’mba:
“Amiwa nkebeseka ne kwibasungulula nobe kyela,+
Ñanyi kintu kikwabo kyo nakonsha kuba na bantu bami?
8 Njimi yabo iji nobe muketo wipayañana, yamba bya bujimbijimbi.
Muntu wambila mukwabo byambo bya mutende,
Bino mu muchima wanji saka amubelamina.”
9 Yehoba waamba’mba, “Nanchi amiwa kechi nafwainwa kwibazhachisha pa bino bintu nenyi?”
“Nanchi amiwa* kechi nafwainwa kushinkanya na kino kisaka nenyi?+
10 Amiwa nkajila mabingo ne kuwowakana na mambo a mitumba
Ne kwimba lwimbo wa bulanda* na mambo a jisaka mwajiilanga banyama,
Mambo bebisoka kuba’mba mukankalwe kupita muntu nangwa umo,
Ne kujila kwa banyama ba kulela kechi kumvwanyikamo ne.
Bañonyi ne banyama ba mungye bonse banyemamo.+
11 Yelusalema nkamwalula ke mulumba wa mabwe,+ pakekalanga balubwala,+
Kabiji nkalula mizhi ya Yuda ke masala, kechi mukekalanga bantu ne.+
12 Ñanyi uji na maana a kukwatakanya mwatala kino?
Nanchi Yehoba waambila ñanyi kuba’mba ambe kino kintu?
Mambo ka kyalo o bekyonawina?
Mambo ka o bekisokela nobe jisaka,
Kya kuba kafwako muntu nangwa umo upitamo ne?”
13 Yehoba wakumbwile’mba: “Mambo balengulula mizhilo* yami yo nebapele, kabiji kechi beilondela ne kukookela byo ñamba ne. 14 Bino boba bintu bikeba michima yabo+ ne kongolokela ku bankishi Babaela, byonka bibafunjishe bashakulu babo kuba.+ 15 Onkao mambo, Yehoba wa mabumba, Lesa wa Isalela waamba’mba, ‘Amiwa nkebalengela bano bantu kuja bintu byalula, ne kwibatomesha mema muji bulembe.+ 16 Nkebapalañenya mu bisaka bya bantu byo babujile kuyuka abo ne bashakulu babo,+ kabiji nkebatumina mpoko posotu ne byo nkebonauna bonse.’+
17 Yehoba wa mabumba waamba’mba,
‘Yuka bintu bibena kumweka.
Ita banabakazhi bemba nyimbo ya bulanda,*+
Ne kutuma bantu kuya na kwita banabakazhi bayuka kwimba amba beye,
18 Kuba’mba bapelawizhe kwiya na kwitujijishapo,
Pa kuba’mba mipolo ilukumukenga mu meso etu
Ne mu bikope byetu muyule mipolo nobe mema.+
19 Mambo mabingo abena kumvwanyikila mu Ziona amba:+
“Byo betonaunapo!
Byo kitulengapo bumvu!
Mambo twanyema mu kyalo kyetu, kabiji betukundawila mazubo etu.”+
20 Anweba banabakazhi, umvwai byaamba Yehoba.
Telekai byambo byo abena kwamba.
Funjishai baana benu ba bakazhi bya kujila,
Ne kwifunjisha anwe bene na bene bya kwimba uno lwimbo wa bulanda.*+
21 Mambo lufu lwatwelela pa bipenze byetu;
Lwatwela mu byamba byetu byakosa
Na konauna baana baji mu mikwakwa
Ne bansongwalume baji mu mikwakwa ikatampe.’+
22 Wibabuule’mba, ‘Yehoba waamba’mba:
“Mibiji ya bantu bafwa ikalaalazhamatu nobe mbolezha pa mushiji,
Nobe kajo ko bachimauna ku muntu ubena kwikanowa,
Kwa kubula muntu nangwa umo wa kwikabungizha ne.”’”+
23 Yehoba waamba’mba:
“Muntu uji na maana kange etote pa kwikala na maana ne;+
Kilobo naye kange etote pa kwikala na bulume ne;
Ne munonshi naye kange etote pa kwikala na bunonshi ne.”+
24 Yehoba waamba’mba, “Pano bino, awa witota etote na mambo a kuba’mba:
Uji na maana kabiji wangyuka,+
Kuba’mba amiwa yami Yehoba uji na butemwe bubula kwaluka, ne bunchibamambo bwaoloka kabiji umwesha bololoke mu ntanda,+
Mambo amiwa mmwena lusekelo mu bino bintu.”+
25 Yehoba waamba’mba, “Umvwai, moba abena kwiya o nkazhachishishamo muntu yense waya ku mukanda, bino umweka nobe kechi wayapo ne ku mukanda ne. + 26 Kabiji nkazhachisha bena Ijipita,+ bena Yuda,+ bena Edomu,+ bena Amonyi,+ bena Moabu+ ne bantu bonse batenda nsuki ya munshi kuzhokolosha mitwe yabo, bonka bekala mu kiselebwa;+ mambo bisaka byonse bya bantu kechi byaya ku mukanda ne, kabiji bena Isalela bonse nabo kechi baya ku mukanda wa ku muchima ne.”+