Yelemiya
18 Yehoba waambile bino byambo kwi Yelemiya amba: 2 “Imana uye ku nzubo ya mbumbi,+ kabiji konkakwa nkakubula byambo byami.”
3 Onkao mambo, nayile ku nzubo ya mbumbi, ne aye namutaaine saka abumba kintu na buchimba. 4 Pano bino, kintu kyabumbilenga mbumbi na buchimba kyatamine kimye kyo ekibumbilenga. Ponkapo mbumbi wikivingawile ne kubumba kintu kikwabo kwesakana na byo akebelenga.*
5 Kepo Yehoba añambijile’mba: 6 “Yehoba waamba’mba, ‘Anweba bena Isalela, nanchi amiwa kechi nakonsha kwimuba byonkatu byaubile uno mbumbi nenyi? Anweba bena Isalela, umvwai! byonkatu bikala buchimba mu maboko a mbumbi, ne anweba byo byo muji mu maboko ami.+ 7 Umvwe naamba bya kutupula, kuponesha ne konauna kisaka nangwa bufumu,+ 8 ne kyokya kisaka kyaleka bubi bwakyo bo nakainye, ne amiwa nkapimpula milanguluko yami* pa bya malwa byo nakebelenga kwikiletela.+ 9 Bino umvwe naamba pa kushimika ne kukosesha kisaka nangwa bufumu, 10 kabiji akyo kyauba bintu byatama kwi amiwa ne kubula kunkookela, ne amiwa nkapimpula milanguluko yami* pa bintu byawama byo nakebelenga kwikyubila.’
11 “Onkao mambo, buula bantu ba mu Yuda ne bangikazhi ba mu Yelusalema amba, ‘Yehoba waamba’mba: “Amiwa mbena kuleta* bya malwa kabiji mbena kulanguluka kwimuba kintu kyatama. Napopwela, bwelai, lekai kuba bintu byatama, wamishai mashinda enu ne byubilo byenu.”’”+
12 Bino abo baambile’mba: “Abyo byatu!+ Atweba tukendanga monka mwayila milanguluko yetu, kabiji atweba bonse tukoobilanga bintu monka mwayila michima yetu yatama.”+
13 Onkao mambo, Yehoba waamba’mba:
“Anweba bene kepuzhai ba mu bisaka bya bantu.
Ñanyi wakyumvwapo kala kintu kya uno mutundu?
Kisungu Isalela wauba kintu kya bunya bingi.+
14 Nanchi mabebe asunguluka ku mabwe a pa mitumba ya Lebanoni nyi?
Nangwa abya mema a munyango akakunkulukanga kufuma kwalepa, akooma nyi?
15 Pakuba bantu bami bamvulama.+
Mambo batapisha bitapisho* ku bintu byatu,+
Kabiji balengela bantu kwituntula mu mashinda abo, ko kuba’mba mashinda abo a kala,+
Ne kwenda mu mashinda a kala atama apoyaika,*
16 Pa kuba’mba kyalo kyabo kikalengeshenga bantu moyo+
Ne kwikala kintu kya kulengela bantu kwita milozhi pa kwikimona myaka ne myaka.+
Muntu yense ukapitanga kwipi ukakumya na mambo a moyo kabiji ukapukunya mutwe.+
17 Nkebapalañanya ku balwanyi babo byonkatu mwela wa ku musela byo olulula makunzhi.
Nkebavundamina kabiji kechi nkebamwesha kilungi kyami mu juba jo bakamona bya malwa ne.”+
18 Kabiji baambile’mba: “Iyai, twayai tumumvwañene kumuba kyatama Yelemiya,+ mambo bañanga betu kechi bakaleka kufunjisha mizhilo* nangwa ba maana kuleka kufundako bantu nangwa bangauzhi kuleka kwaula ne. Twayai tumunene byatama* kabiji kange tute muchima ku byo abena kwamba ne.”
19 Anweba Yehoba, ñumvwai,
Ne kuteleka bibena kwamba balwanyi bami.
20 Nanchi kintu kyawama bakonsha kwikipana pa kintu kyatama nyi?
Mambo bapoyila bumi* bwami kimbo.+
Vulukai byo naimene kwi anweba na kwamba byawama pe abo,
Kuba’mba mufwomone bukaji bwenu pe abo.
21 Onkao mambo, panai baana babo ku kipowe kya nzala,
Kabiji bapanai ku mpoko.+
Lekai bakazhi babo bafwishe baana babo ne bamwatawabo.+
Banabalume babo bafwe ku kinkunka,
Bansongwalume babo bebatape na mpoko mu nkondo.+
22 Lekai mabingo omvwanyike mu mazubo abo
Byo mukebaletela balwanyi kya kwibabazhimunatu.
Mambo bampoyila kimbo kuba’mba mponenemo
Kabiji bata tukose kuba’mba maulu ami afwemo.+
23 Pakuba anweba Yehoba,
Mwayuka bulongo milanguluko yo baji nayo ya kukeba kungipaya.+
Kange muvwete pa bubi bwabo ne,
Kabiji kange mufuute mambo o bemulenga ne.