Ku Bahebelu
5 Mambo ñanga mwine mukatampe yense bamusala kufuma mu bantu, bamutongola kwingila mwingilo wa Lesa+ mu kwimenako bantu kuba’mba alambule bya bupe ne bitapisho bya mambo.+ 2 Aye wakonsha kwibatekenya bulongo bantu babula kuyuka ne boba batamisha, mambo ne aye mwine kechi wakosa ne, 3 kabiji na mambo a kino, wafwainwa kulambula mulambo wa bubi bwanji byonkatu byo alambwilako bantu.+
4 Kafwako muntu nangwa umo wipa buno buneme ne, poso Lesa wamutongola, byonka byo atongwele Alona.+ 5 Byonkabyo, ne Kilishitu naye kechi witumbijikile+ kwikala ñanga mwine mukatampe ne, bino bamutumbijikile ku yewa wamwambijile’mba: “Obewa wi mwanami; lelo jino yami shobe.”+ 6 Kabiji waamba mu Kinembelo kikwabo amba, “Obewa wi ñanga wa myaka ne myaka byonka byajinga Melekizedeke.”+
7 Byo ajinga pano pa ntanda,* Kilishitu walombelenga milombelo ya misashijilo, na kujijisha ne mipolo,+ ku yewa wafwainwe kumupokolola mu lufu, kabiji Lesa wamumvwine na mambo a kumwakamwa. 8 Nangwa kya kuba wajinga mwana, wafunjile lukookelo ku bintu byo amanamine.+ 9 Kabiji byo aikele ke walumbuluka,+ waalukile ke upana lupulukilo lwa myaka ku bonse bamukookela,+ 10 mambo aye bamutongwele kwi Lesa kwikala ñanga mwine mukatampe byonka byajinga Melekizedeke.+
11 Tuji na bintu byavula bya kwamba pe aye, kabiji byakatazha kulumbulula, mambo kechi mumvwa bukiji ne. 12 Nangwa kya kuba pa kino kimye mwafwainwa kwikala bafunjishi, mubena kukebewa muntu wa kwimufunjisha jikwabo mafunjisho atanshi+ a mambo a Lesa, kabiji mwaaluka nobe muntu ubena kukeba mukaka kechi kajo kakosa ne. 13 Mambo yense utwajijila kutoma mukaka kechi wayuka bololoke bwa mambo a Lesa ne, mambo aye ye mwana mucheche.+ 14 Pakuba kajo kakosa ko ka bantu bakoma, bonka baji na milangwe* yo bafunjisha kuyuka kyawama ne kyatama na mambo a kwiingijisha.