Yelemiya
6 Anweba baana ba kwa Benjamina, fumai mu Yelusalema muye na kukafyama kungi.
Mambo bya malwa bikafumina ku kabeta ka ku buyeke, byo bya malwa bikatampe.+
2 Mwana wa mukazhi Ziona wipasha na mwanamukazhi walamba bingi kabiji washiñama.+
3 Bakafunga bakeya na matanga abo.
4 “Inengezhai* kulwa nkondo na uno muzhi!
Imanai, twayai tukamutule bulemo pa kushinkamana juba!”
“Kyatama bingi mambo juba jazhika kala,
Mambo bimvule bya kimye kya mabanga bibena kulepelakotu!”
5 “Imanai, twayai tumutule bulemo mu kimye kya bufuku
Kabiji twayai tonaune byamba byakosa bya muzhi wanji.”+
6 Mambo Yehoba wa mabumba waamba’mba:
“Temai bichi ne kwibilumbika ke mulumba wa kulwilapo na Yelusalema.+
Ye muzhi ye bakapamo mambo;
Kafwamo kintu kikwabo kijimo ne, mujitu kumanama konka.+
7 Byonkatu mushima* byo alengela mema kuba munyango,
Ne uno muzhi byobyo akumbana bubi.
Mubena kumvwanyikatu bukapondo ne lonaiko.+
Kimye kyonse mmona bikola ne binkunka.
8 Obewa Yelusalema, umvwa byo naamba, inge ubule kumvwa, ukekala ke wa bunya kwi amiwa;*+
Nkakushatu masala, kya kuba kafwako nangwa umo ukekalamo mu kyalo ne.”+
9 Yehoba wa mabumba waamba’mba:
“Bashalapo ba mu Isalela bakebapupula byonkatu byo bapupula mañanzañanza ashala ku kichi.
Tanyikai jibiji kuboko kwenu nobe muntu ubena kwapa mañanzañanza ku bichi.”
10 “Ñanyi ye nkamba nanji ne kumujimunako?
Ñanyi ukomvwa?
Talai! Bashinka mu matwi abo,* pa kuba’mba babulenga kumvwa.+
Byambo bya Yehoba bebilengulula bingi;+
Kechi bebitemwa ne.
11 Onkao mambo, bukaji bwa Yehoba bubena kuteema nobe mujilo mwi amiwa,
Nakankalwa kwibukanya.”+
“Bwitulwilai pa baana baji mu mukwakwa,+
Pa jibumba ja bansongwalume bakonkana pamo.
12 Mazubo abo bakeapana ku bantu bakwabo,
Pamo na majimi abo ne bakazhi babo.+
Mambo amiwa nkatanyika kuboko kwami ne kukambula bantu ba mu kyalo,” byo byaamba Yehoba.
13 “Mambo kufuma ku mwanyike kufika ne ku mukulumpe, bonse bamwena bintu mu jishinda jatama;+
Kutatwila kwi ngauzhi kufika ne ku ñanga, bonse batambula mazhikakanwa.+
14 Kabiji bajimbaika bantu bami na kwibabuka bilonda byabo ne kwibambila’mba,
‘Kuji mutende! Kuji mutende!’
Bino saka kwabula mutende.+
15 Nanchi bomvwa bumvu pa bintu bya bunya byo boba nyi?
Kechi bomvwa bumvu nangwa pachechetu ne!
Kabiji kechi bayuka ne bumvu byo buji ne!+
Onkao mambo, bakafwila pamo na boba bo bakepaya.
Byo nkebakambula, baketuntula,” byo byaamba Yehoba.
16 Yehoba waamba’mba:
“Imanai pa mansanga mukenkente.
Mwipuzhe kuji mashinda a kala,
Mwipuzhe kuji jishinda jawama, kabiji muye monka,+
Kuba’mba mukokoloke.”
Bino bantu bakaine’mba: “Atweba kechi tusakuyamo ne.”+
Bino bantu bakaine’mba: “Atweba kechi tusakutelekako ne.”+
18 “Onkao mambo, umvwai anweba bisaka bya bantu!
Ne anweba jibumba, yukai,
Bintu bikebamwekela.
19 Anweba bonse mwikala pano pa ntanda, umvwai!
Amiwa mbena kuleta bya malwa pa bano bantu+
Na mambo a milanguluko yabo,
Mambo kechi batele muchima ku byambo byami ne,
Kabiji balengulwile mizhilo* yami.”
20 “Nanchi amiwa nsekela mu binunka bulongo byo mufumya ku Sheba
Ne mwenge* ufuma ku kyalo kya kwalepa nyi?
Nakana milambo yenu ya kusoka yonse,
Ne bitapisho byenu byo mupana kechi binsangajika ne.”+
21 Onkao mambo, Yehoba waamba’mba:
“Amiwa mbena kubika bintu bya kwituntulako bano bantu,
Kabiji baketuntulako,
Bashabo ne baana babo pamo,
Muntu ne yewa ye ekala nanji kipikipi,
Kabiji bonse bakavila.”+
22 Yehoba waamba’mba:
“Umvwai! Bantu babena kwiya kufuma ku kyalo kya ku kabeta ka ku buyeke,
Ne kisaka kikatampe kikeya kufuma ku mapunzha a kwalepa a pano pa ntanda.+
23 Bakangata mata a mukanda ne mafumo.
Bashinta bingi kabiji kechi bakebobila lusa ne.
Mawi abo akomvwanyikanga nobe kupoota kwa kalunga ka mema,
Kabiji bakendanga pa bambili.+
Bakeyanga mu munongo nobe bantu babena kwiya na kukulukuka, obewa mwana wa mukazhi Ziona.”
24 Twaumvwa nkuwa ya bino bintu.
Maboko etu akookatu zubulu;+
Bya malwa bitufikila,
25 Kange muye mu bujimi ne,
Kabiji kange mwende mu jishinda ne,
Mambo muji mulwanyi uji na mpoko;
Bilengesha moyo biji konse konse.
26 Obewa mwana wa mukazhi wa balongo bami,
Inyinge bisapi bya majila+ ne kwalañana mu buto.
Jila mabingo byonkatu bijila muntu wafwisha mwananji umotu,+
Mambo katatakatu awa wipayañana etulukuke.+
27 “Amiwa nakutongola* kwikala nobe muntu usungulula ngolode ne siliva mu bantu bami,
Utaletalenga bulongo;
Wafwainwa kuteshako muchima kuyuka byo babena kuba.
Baji nobe mukuba ne kyela kya kapotwe;
Bonsetu baji na bujimbijimbi.
29 Muntu wibikako kwibiwamisha, myuba yanji ipya.
Kyumbu kyo kifumatu pa mujilo kwapwa.
30 Bantu bakebatela’mba siliva ye bakana,
Mambo Yehoba wibakana.”+