Musapwishi

10 Manyi anunka bulongo inge mwafwila malunzhi, anunka kutama. Po pamotu kukosama nako konauna byubilo byawama bya muntu ne kumulengela kubula kunemekwa.+

2 Muchima wa muntu wa maana ulondela jishinda jawama,* pakuba muchima wa muntu wakosama ulondela jishinda jatama.*+ 3 Konse muntu wabula maana* ko aya, ubatu bintu byatama,+ kabiji ulengela bantu bonse kumuyuka’mba maana ufwao.+

4 Umvwe mfumu wimuzhingijila, kange mufumepo ne,+ mambo kutekanya kulengela muntu kubula kulenga mambo akatampe.+

5 Namwene bintu bikatazha bantu pano pa ntanda byuba bakalama:+ 6 Bantu bakosama bebabika pa bifulo bikatampe byavula, bino banonshi* bebabika pa bifulo bicheche.

7 Namwene ba mingilo saka benda pa bambili, bino babinemanga saka bendatu panshi byonka byenda ba mingilo.+

8 Awa upoya kimbo wakonsha kuponenamo aye mwine;+ ne yewa usaba lubumbulu wa mabwe bakonsha kumusuma ku muloolo.

9 Awa upoya mabwe, mabwe akonsha kumukozha, ne yewa uvikaula myandalo, myandalo yakonsha kumukozha.*

10 Inge kapasa kashima ne muntu wabula kwikanona, kikamukatazha bingi pa kwikengijisha. Bino maana alengela kuba bintu bulongo.

11 Inge muloolo wasumana saka bakyangye kumufwomona, ko kuba’mba awa wayuka bya kufwomona* miloolo kafwako kyo akoba ne.

12 Byambo byamba muntu wa maana byawama bingi,+ pakuba byamba muntu wakosama bimuletela malwa.+ 13 Byambo bilupuka mu kanwa kanji bimwesha kukosama,+ ne bintu bifuma mu byo amba byatama bingi. 14 Pano bino, muntu wakosama kechi wikileka kwamba ne.+

Muntu kechi wayuka bikamweka kulutwe ne; pano ñanyi wakonsha kumubuula bintu bikamweka inge wafwa?+

15 Mingilo ingila muntu wakosama imukookesha, mambo ukankalwa ne kuyuka byo afwainwa kuya mu muzhi.

16 Kitama bingi umvwe kyalo kebekilame ku mfumu mwanyike+ ne babinemanga inge kebatendeke kuja kijiilo kimye kya lukelo. 17 Kiwama bingi umvwe kyalo kebekilame ku mfumu wasemwa ku muntu ye banemeka, ne babinemanga inge kebaje kijiilo pa kimye kyafwainwa kwa kubula kukizhamo kutoma binyu.+

18 Na mambo a kukilamo kwikala na bukope, musemi ukuluka, kabiji na mambo a muleele nzubo inoka.+

19 Kajo* kaletela muntu lusekelo, ne binyu nabyo bilengela muntu kusangalala;+ pakuba mali akwashañana mu bintu byonse.+

20 Kange mufinge* mfumu mu muchima* wenu ne,+ kabiji kange mwambile munonshi bintu byatama mu kibamba kyenu kya kukachi ne; mambo kañonyi* kakonsha kutwala byo mubena kwamba* nangwa kintu kikwabo kitumbuka kyakonsha kubwezhapo kwamba bintu byo mwaamba.